ISAIAH 11 - BAIBEL (BSI)Iquighaikeu Kukaqha 1 Jese suzungu lono apishe lakhi ipeghi nani eno pakuhu lono aloka lakhi ipeghi nani. 2 AMPEU Ghungu no alokutsu ngo akighithi eno asuqekithi pawu timiqo shou ayehpelu penike pa tsu nani. 3 Paye AMPEU pulou ithi nani eno pa gihu nani, eno pa ghokulu shinike amloqi nani. 4 Paye anhethino ithukulu likhi lono kughathamo nani, momu chikulu lo likhino xathabe mo nani; pano kumlhomiqo ghenguno achipiu lono kughatha nani; eno ichhe imechekemi chipiu phujutsu nani. Pano ahza tsukelo timi ghimeqhive nani, eno kixikilamiye pa tuthu kishe lono pithive nani. 5 Pano kuchou xakutha eno amikucho lono pawu timi shou ayehpe nani. 6 Atine ngo bheritiqono iqunei kumtsa acheuve nani eno angushuno aneti sasu iqunei ihozu nani; Amshiti ngo abongushuti no kumtsa achumuza nani; eno itimi kititiqono panoqo kheu shi nani. 7 Amshi ngo avaqono kumtsa chu nani, eno panoqo tino kumtsa ihozu nani. Abongushuno amshi toi aghijini chu nani. 8 Angaqono tughukupu pighi phivilo ililu nani, eno ititununo pighizu phivilo ililu nani. 9 Alhou wu akimthe toghi Zion lo akuighupu eno shipusave kepu kiumu kuha nani. Azughilo azu chhitoi akeshi ayeghilo AMPEU kighithino chhitoi ve nani. Halevekemi Ideghi nani 10 Tipa tsalani David kuka lagha lono akukau akithe ipeghikeu no ashiayehqo lau amchipu kumla lakhi shi nani; panonguno aphughilo pa phuighi nani eno ajekipishi pa gihu nani. 11 Tipa tsala ighikelo, AMPEU no ghuthu akiniu ghi pa kuka peitha puzu pawu timiqo ayeghi hipaqolo qhivepuaghi keqo sachilesaghi nani: Asiriya, Ijip, Pathro, Sudan, Elam, Babilon, Hamat lo ngo zudo yeghiqolo eno azu sumxape akeqo yeghilo. 12 AMPEU no ashiayehqo piyenike michiphi peqhe nani, tiye ayeghi cheku bidi lono Israilmi ngo Judami apanagha hale puakeqo itaghi hekutsu kumqono sachile saghi niyeke. 13 Israil kukaqhaye Juda kukaqha jupesu khilemu anheshumove nani eno Juda ye Israil ghumi shimove nani. 14 Kuma kumqoluve puzu kulolau Filistiyami lewu nani eno kipelau akemiqo tuleqhi leluve nani. Kumano Edommi ngo Muabmi shou aghutoluve nani eno Amunmino panoqo ghokulu shi nani. 15 AMPEU no Suez lo azucheku puthovetsu nani eno pano shukuthui keu mulhu puwu puzu Eufrati ghokizu fuputhove nani eno aghokiti tsuni likhi qhive nani, tishi kehu timino alachesu kathawuluve nani. 16 Asiriya kudauno alaghila lakhi pawu Isrilmi ghenguno auve nani, tilau puxupe aghikeqo ghenguno, tiye panoqo puasuno Ijip qhive no wuvekelo aghikeu toi nani. |
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
Bible Society of India