ISAIAH 1 - BAIBEL (BSI)

¹ Kaku hipaulo Alhou no Amuz nu Isaya lau Juda ngo Jerusalem vehu piyesukeu ani, hiye Juda yeghilo Uziya, Jotham, Ahaz eno Hezekiya noqono akukau shiake ghuloki lonoke.

Alhou no Pa wu timiqo Sakiyi

² AMPEU nopi, “O ayeghi ngo atsutsu, ino kiu piani keno inijulo! Atianuli ino tuchomujo puthu keqono ishou hebide ani.

³ Pichepighi ghi pano pighiu ithi ani eno gadaha ghi panoqo mpeuno khilehino panoqo achuqupu tsu cheni keno ithi ani, ikemu Israilmi iwu timiye ni ithi chemoe.”

⁴ Nonguye axine shichekemi shiayeh, lhoksakugha eno shikupsapu ahakusa timiqoke! Nongu xineno nongu sunheqhike. Nonguno Israilmi Lhou AMPEU akimtheu miliveno nongu zupo pa tsuveke.

⁵ Kushiepi nongu ghimeqhi anipe kya? Nonguye kushiye hebide auve cheni kya? Itaghi alaushi nongu ghimeqhi peniye kesha? Israilmio, nongu kutsuye azakuno nhaluvae eno nongu mlo phomoyivae.

⁶ Nongu kutsu lono apukhu mza kuto lo vithaikeu-a kuhavae, ikemu veshokeu ngo apiyi eno azakuno nhakhavae. Nongu zakuye shikimtheve momu khave momu teli pesu vakumtsha puamoe.

⁷ No yeghiye kutsapiniyivae eno no phughiye amino pitikhavae. Nonguno jupulaghi inaghamino no yeghi kutsave, ti luve eno thwokha shipusakhavae.

⁸ Jerusalem likhivae, aghumino khasupe ngoluvae eno atsayilulo axapiki putu khamokeu toivae, akukalilo apusho shipuakeu toivae.

⁹ AMPEU Akughushuuno timi khami likhimu ghutsumoke aye Jerusalem ye Sodom ngo Gomora toi qhoi kutsapinyiveni cheke.

¹⁰ Jerusalem, owu ayehkipemiye Sodommi toike eno owu timiqoye Gomorami toike. AMPEU no nongu vilo kiu piani keno tsaqui inilo!

¹¹ Pano piani, “Nonguno aghashipe hijejehi imlla achekeu niye lunishi ani kughashi kumsu cheni kesha? Nongu lhoxu heqhino akuchopu pesu pitikeu kumlla shikeu eno lhoxu kivi tha pesu pitikeu kumllagho lukumkhashi kughokumovae. Niye amshitsu ji bheri ji eno anetsu ji ingaghaivae.

¹² Nonguno imlla huthuniye ighikeulo khuno nongu vilo hipaqo ilau sughilopi kya? Khuno nongu vilo hikithipushi ichineki tiphe alopi kya?

¹³ Nongu kumllagho sughikeu adouke. Nonguno axo kutsungu pitikeu tsungu lukelo niye imiti puke. Nonguno Aqhi Kithe Tiqhetini pinyi keu, Sabat pineyeqo eno chine chini hoho shi kelo niye ngosumlake; tipaqo kumtsu nongu xineno xeveake.

¹⁴ Nonguno Aqhi Kithe Tiqhetini pinyikeu ngo akimthe tsala pinyiche keu niye mithike; tipaqoye ighenguno amakhoke eno niye tipau xapukeno izuzuvae.

¹⁵ “Kughou nonguno au peqhe pe inikhuni keno niye nongu lau jupuwumo nani. Nonguno khijejehi inikhu anamu niye initsumo nani kughengu nongu ulo aji dapusu anike.

¹⁶ Nongu qhuve paghilo; nongu shikimthevelo. Nonguno alhoksa hipaqo kumtsu shiakeu ino ithulu anike tipaqo ikhive paghilo. Alhoksa shichekeu phevelo,

¹⁷ achipiu shini keu shikalulo. Achipi lono xathakeu phulo, nedaqoda vekemiqo xaqhelo, mighimghaqo saphulo eno chimemi susholo.”

¹⁸ AMPEU no pi, “Itehino ningu avehu kimchiveni nolo. Nonguye axineno huchuhulesu xapu ani, ikemu ino nongu shikithe pesu murasu toi shitsuni. Nongu hedapusu akeuno ighono huchuyi aghi namu asupha toi metsughoi shivetsu nani.

¹⁹ Nonguno ilau aghokulu shiaye ayeghilo thime kivi jeli ipeghi pekeu chulu nani.

²⁰ Ikemu ihebide napiaye nonguye ghuyi lono thiniputsa. Ni AMPEU kichi lono piqhi ani.”

Axine shikicheu Phughi

²¹ Aphughi amikucho shi achekeu huye kutuqhalimi ilhouvae! Ghuthu lakhiye tipaulo timi akumzumino chhitoi acheke ikemu itehiye ghikiqhimi likhi acheuvae.

²² Jerusalem, ghuthu lakhilo noye tsandiyi toike ikemu itehiye abaghu shivae; noye atsayi ji kivi toike ikemu itehiye azu kitekeu toi shivae.

²³ Nongu sakiphemiye hekibidemi eno kupukami poshuu shivae; panonguye pulhapuju tughotili eno kulugho luacheni. Panonguye kughakutha-alo khilemu mighimghaqo sushotsu chemoe momu chimemino xathatsu peniye atsa sughikelo initsu chemoe.

²⁴ Ike itehiye Akughushu AMPEU, Israil Lhou akuka kumtouno kiu piani keno tsaqui inilo: “Ino nongu ighumiqo shou amkhu luni eno hinguno hilauye nonguye ipunaqhimo nani.

²⁵ Ino nongu shou i-u ghapuku nani eno ayi piti kimthe ketoi ino nongu thakutsughuni eno nongu baghu kumtsu ikhiphe nani.

²⁶ Atughulo shicheke toi ino kughakuthami nongu tsuchileni eno kha-ghi abothulo toi mije kutsumi nongu tsuni. Tileno Jerusalem ye amikucho eno pukhukulu phughi ipi kuluve nani.”

²⁷ AMPEU ye amikuchoke ghenguno pano Jerusalem xachileluve nani eno tileno xaide ighivekemiye xaluve nani.

²⁸ Ikemu khunono axine shini eno pa shou hebide nikeno tipaqo kumtsu pano chunidaqhive nani; khunono pa qhiveni keno pano tipaqo pithive nani.

²⁹ Nonguye kushiye asubo mllache eno akimthe ghutu pighiche kelapi amlokusashi kujomuzave nani.

³⁰ Nonguye aphisubo thivekeu toive nani eno khunomu azu sumovekeu ghutu toi thive nani.

³¹ Ami kumpano aghijinilo ami iquveke toi timi akumtomiqo hu pano kumla lhoksano kutsapinyive nani eno khunomu kutsakungokeu hu lakhamlave kepu shive nani.