IPEKULU 9 - BAIBEL (BSI)

Pighiche keu Lhoxu Thive

¹ AMPEU no Muse vilo pi, “Akukau lau wulo eno pilo, Ibrimi Lhou AMPEU no pi ani pilo, ‘Iwu timiqo wuvepelo eno panongu pelo imlla pelo.

² Nono itaghi panongu no wunikeu lo milivetsu aye

³ ino oghimeqhi nani tiye owu pighiche keu lhoxu: khurshi, gadaha, kemel, amshi, bheri eno aneqo shou akusu kusa lakhi puwu nanike.

⁴ Ino Israilmi wu pighiche keu lhoxu ngo Ijipmiqo wu kuma dolo kiyequ keu shivetsu nani eno Israilmi wu lhoxu ye thipemo nanike.

⁵ Ni, AMPEU no thoghiuno hipau shinikeu shi ado kihipe puanike.’ ”

⁶ Tishiwo thoghiu ye pano piqhive keu toi AMPEU no tipau shike eno Ijipmi wu pighiche keu lhoxu kumtsu thive ikemu Israilmi lhoxuye lakhimu thimoe.

⁷ Kiu kishive kela akukau no iniju kelo Israilmi wu lhoxu lakhimu thimo keu pa vilo pitsue. Ikemu paye amlo hekike pesu auve eno timiqo pelo wupe move.

Amishe

⁸ Tipathiu AMPEU no Muse ngo Aron pama vilo pi, “Amphoki lono ayevu au ki-e lakhi lulo; akukau zu lono Muse no tipau pesu amlhulo vepuwulo.

⁹ Tiye Ijip yeghiqha kumtsulo qhughu toi phowove nani eno aqha kumtsulo tipau no amishe shi no timi ngo lhoxuqo shou apiyi shive nanike.”

¹⁰ Ikehu pamano ayevu hami pesu akukau zulo puthugho; Muse no tipau pesu amlhulo vepuku eno tipauno timi philo ngo Lhoxuqo philo amishe ipeghivepe eno apiyi shivepe.

¹¹ Kuduumiqoye Muse zulo ipeghi mlave kughengu panonguye Ijipmi kutamiqo toi amisheno panoqo philoghi ipeghiveke.

¹² Ikemu AMPEU no akukau mlo hekikevetsu eno AMPEU no pivekeu toi akukauye Muse ngo Aron tsa initsumove.

Apughu

¹³ Tileno AMPEU no Muse vilo pi, “Thoghiu inaqhe itheno akukau sasu kusholo eno pavilo Ibrimi Lhou AMPEU no ishi piani pilo, ‘Iwu timiqo puwuvelo tishiaye panonguno imllalu penike.

¹⁴ Ishiuloye owu kijemi ngo owu timiqo likhi kumono noghi ghimeqhinike, tishi anguno ayeghiqhalo itoikeu milakhimu kuhakeu nono ithi penike.

¹⁵ Ino iu peqhe puzu kusukini pesu no eno owu timiqo heke napiaye nonguye qhoyi kutsaveni cheke.

¹⁶ Ikemu ikuka opiyenike ino opelo xuaghi anipeke tishianguno ijekipiye ayeghiqha kuchopulo vekuphawo peniyeke.

¹⁷ Ikeghi noye qheza laki ani eno iwu timiqo puwomono anike.

¹⁸ Thoghiu hikutotilo Ijip xu ghililo tikithipu khilemu mthano akeu ino apughu kimishi ghuqhi penanike.

¹⁹ Tighenguno itehino ahza tsupuzu nowu Lhoxu khijehi khalau chekhani keno ihjeluve kepu qholo qhiluvelo. Apughuno timi na lhoxu pinamu ashou sukusho kuhakemiqo shou qipuku nani eno tipaqoye kumtsu thive nanike.’ ”

²⁰ Akukau wu kijemi khamiye AMPEU no pikeulo musave eno pano qemi ngo lhoxuqo akilo ihjeluve penike alou sailove.

²¹ Ikemu kutamiqoye AMPEU no kutughukeulo amlo suyikeu shimoe eno pano Lhoxu ngo aqemiqo khalau qhive.

²² Tileno AMPEU no Muse vilo pi, “Ou kunguu peqhelo eno Ijip yeghiqha shou apughu iqighi nanike; timi shou, lhoxu shou eno aluzalo asutsuniqo shou iqighi nanike.”

²³ Ikehu Muse no pa kusu pesu kunguu peqhe eno AMPEU no tsutsukusu ngo apughu puwutsue eno amusuno ayeghi cheke. AMPEU no

²⁴ pasapagha lono apughu ihulokeu puwuke eno tsutsu phano hula hila kuloke. Ijip xu lo titoikeu pasapagha khilemu mutha aphikeu lakhike.

²⁵ Ijip yeghiqhalo khalau akeu jeli timi ghi lhoxuqo ghi kumtsu apughuno ghaqhi khave. Tipauno aluzalo asutsuni eno asuboqo kumtsu vechheqhiveke.

²⁶ Israilmiqono achekeu Goshen qhalo likhino apughu qimoke.

²⁷ Akukau no Muse ngo Aron kupuwu eno pi, “Ishiu loye ino axine shivae; AMPEU no achipiuke eno iwu timiqo ngo ino achipikumoke.

²⁸ AMPEU vilo khuinilo! Tsutsukusu ngo apughu hipau lukumkha shi nishou ighivae! Nonguye wuve peniake, ino tushoqhi anike, nonguye hilau ngokithe pemoake.”

²⁹ Muse no pa vilo pi, “Ino aphughi lono ipeve kemtsa AMPEU lau iu peqhepe inikhutsu nani eno apughu qimove nanike tishianguno ayeghiye AMPEU wuke pi opelo ithipeni.

³⁰ Ikemu ino ithi anike no eno owu kijemiye AMPEU Alhou sumsakeu kuhae.”

³¹ Yeqhiyebo eno asuo thi shipsakhave, asuo thi ye ni ayeake eno yeqhiyeboye mini ipeghi ake.

³² Ikemu ashothiye shipusamoe tiye munu nicheni kehuke.

³³ Muse no akukau qhiveno aphughi lono khalau ipe puzu pau peqhe pesu AMPEU vilo khu inike. Tsutsukusu, apughu eno tsutsughu kumtsu tave.

³⁴ Kiu shivetsu keno akukauno ithuluve mu paye axine shikitheuve, pa eno pawu kijemiqoye puzuu tholono amlo hekikepe auve.

³⁵ AMPEU no Muse vechewo puzuuno pivekeu toi akukauye Israilmi puwumo nikeu shive.