IPEKULU 7 - BAIBEL (BSI)

¹ AMPEU no pi, “Ino opelo akukau lau Alhou kimihi shitsuni cheni eno omu Aron no owu tungkupu kumlhoshi pa vilo pinanike.

² Ino ahza otsukeu kumtsu Aron vilo pilo eno pano akukau vilo pipuzu Israilmi pelo pa yeghi qhive penike.

³ Ikemu ino akukau pelo kuthovi auve pe nani eno akumsapu jeli khije jehi shinamu paye otsa initsumo nanike.

⁴ Tithiuno ino Ijip shou aghime kitikhi sughi nani eno iwu timi lagha qo tipa yeghi lono saipeve nani.

⁵ Ino panoqo shou iube kethiuno eno pano ghakhu lono Israilmi saipeve kethiuno Ijipmiye tileno niye Alhou kepi ithi nani.”

⁶ Muse ngo Aron pamaye AMPEU no ahza tsukeu shie.

⁷ Pamano akukau putsawuke ghulokilo Muse ye ampe lhotache shiae eno Aron ye ampe lhotache kuthu shiake.

Aron Kusu

⁸ AMPEU no Muse ngo Aron vilo pi,

⁹ “Akukau no nokujo vilo kuchouno pi ani kemokeno amchipu shipiye lopi khu aye. Aron vilo pa kusu ikhipesu akukau zulo veqhilo pilo eno tiye apighi lakhi shive nanike.”

¹⁰ Ike Muse ngo Aron pama ye akukau lau wuno AMPEU no ahza tsukeu toi shike. Aron no pa kusu pesu akukau ngo kijemiqo zulo veqhi kelo tiye apighi ilhouve.

¹¹ Tileno akukauno pawu kighithimi ngo kuduumi kusaghi eno panonguno kuduu shipuzu tipaphi shiluve.

¹² Panonguno akusuqo pesu veqhi kelauye apighi ilhoukhave. Ikemu Aron kusuno tipaqou munove.

¹³ Tishiepimu akukauye pamlo hekike pesu auve, eno AMPEU no pikeu tho lono akukauno Muse ngo Aron tsa initsumoe.

Kutsakungo keu Ijip shou Ighi Ahji

¹⁴ Tithiu AMPEU no Muse vilo pi, “Akukauye kuthovi ani eno timiqo puwu moke.

¹⁵ Tighenguno inaqhe pano Nayil lo iqike ghuloki lono pa sasu kusholo. Ou lo apighi ilhovekeu kusu pesu wulo eno aghoki mukulo pa khealo.

¹⁶ Tishino akukau vilo ishi pilo ‘Ibrimi Lhou AMPEU no ovilo pawu timiqo puwuve lopi pipeniye ipuwue, tishi anguno panonguno asayeqha lono pa mllalu penike. Ikemu itehi kutolo nono ini tsumoe.’

¹⁷ Jualo, akiqheu AMPEU no pi anike paye khuu keno pano kiu shiniye anikeno tileno nono phulu nani. Julo ino akusu hipau pesu azulo ghapuku nani eno azuye ahji ilhouve nanike.

¹⁸ Akhaqoye thive nani eno aghokiye muna shushuive nani ikehu Ijipmiye tipau zu yemulave nani.”

¹⁹ AMPEU no Muse vilo pi, “Aron vilo pa kusu pesu Ijip lo aghoki, azula eno azu kucho akeu kumtsu shou chhope ngolo pilo. Azuye ahji shikhave nani eno aghakhuqha kumtsu azu tughuko ngo atu tughuko loghi ahji shive nani.”

²⁰ AMPEU no ahza tsukeu kiqi lono Muse ngo Aron pama no shie. Akukau ngo kijemiqo gizulono Aron no pa kusu peqhe puzu Nayil ghokilo ghasu, ike tile azu akeu kumtsu ahji ilhove.

²¹ Aghokilo akhaqoye thikhave eno tiye shishe muna kehu Ijipmiye tipauzu yemulave. Ijip qha kumtsulo azuye ahji ilhouve.

²² Ikelo akukau kuduu miqoghi pano kuduu pesu tipaphi shiluve eno akukauye puzuu tho lono kuthovi auve. AMPEU no pive ketoi akukauye Muse ngo Aron tsa initsumoe.

²³ Akukauye tipaughi jukutomono pa kuka kilo idewove.

²⁴ Ijipmi qoye aghokizu yemlave kehu aghoki mukulo azukikhe chhusu.

²⁵ AMPEU no aghokilo ghadakeu atsala tsuni tove.