IPEKULU 6 - BAIBEL (BSI)

¹ Tileno AMPEU no Muse vilo pi, “Itehiye ino akukau lau kiu shini cheni keno nonguno ithulu nanike. Iwu timiqo puwuve penike ino pashou aka agha vesu nanike. Mutsuqheino ino papelo payeghi lono panoqo hapheve penike ino pashou aka agha shinanike.”

Alhou no Muse Kulu

² Alhou no Muse vilo pi, “Niye AMPEU ke.

³ Niye Akughushu Lhou shi ghi Abraham lau Isak lau eno Jakob lau ipeghi cheke, ikemu niye ije kimthe AMPEU pesu panoqo piye puamoe.

⁴ Ino panoqo sasu ghi puloshoqhi shike, Kanan yeghi panoqo tsunikeu shi tushoqhi ke, tipau yeghilo panonguye inaghami shi xuacheke.

⁵ Itehi ino Israilmi no aghimeshi suakeu ghugha chilu vae, panonguye Ijipmino aqemi shi acheni peke eno niye iwu puloshoqhi kumsuluvae.

⁶ Tighenguno Israilmi vilo ino pia keu pilo, ‘Niye AMPEU ke; ino nongu xaphelu nani eno nonguno Ijipmi qechekeu lono ino kuqhopheve nanike. Ino iu kumto kuka peqhe puzu panoqo shou aghime sughi nani eno ino nongu xalunike.

⁷ Ino nongu pesu iwu timi shini eno niye nongu Lhou shini. Ijip lo nonguno aqemi shi akeulo kughono ino nongu kuqho pheveni keno tileno niye nongu Lhou AMPEU kepi nonguno ithi nani.

⁸ Ino tsaqui no Abraham, Isak eno Jakob tsunikeu shi tushoqhi vekeu yeghilo ino nongu saighi nani; ino tipau nongu mheghipu shi nongu tsu nani. Niye AMPEU ke.’ ”

⁹ Muse no hipatsa Israilmi vilo pike ikemu panonguye patsa initsumoe kughengu panongu kughapesu ayikushu shi timi qeche keuno panoqo nguagha kubopinive tsukehu.

¹⁰ Tipathiu AMPEU no Muse vilo pi,

¹¹ “Wupuzu Ijip lo akukau vilo pilo ike paye Israilmi pelo pa yeghi qhivepe masake.”

¹² Ikelo Muse no khochile pi, “Israilmi ghi itsa initsumoe ike akukauye khile initsu ni kya? Niye atsa pishelho kemi ke!”

¹³ Tileno AMPEU no Muse ngo Aron pama vilo ahzatsu: “Israilmi ngo Ijip kukau vilo ino nokujo pelo Ijip lono Israilmi saipeghive penike ahza tsuvapi pilo.”

Muse ngo Aron Ghili Yekithi

¹⁴ Jakob nu anoghiu Ruben ye anu bidi ake: Hanok, Palu, Hezron eno Karmi ishi ke; panonguye panonguje kuluve kemi laghaqo puasuqoke.

¹⁵ Simon ye anu tsugho shike: Jemuel, Jamin, Ohad, Jakhin, Zohar eno Kananmi totimi lakhi nu Shaul ke; panonguje kuluvekemi laghaqo puasu qoke.

¹⁶ Levi ye anu kuthu shike: Gershon, Kohat eno Merari; panonguye panonguje kuluvekemi laghaqo puasuqo ke. Levi ye ampe 137 kutolo xuke.

¹⁷ Gershon ye anu kini shike: Libni ngo Shimei pamaye alagha kutomo auve.

¹⁸ Kohat ye anu bidi shike: Amram, Izhar, Hebron eno Uziel. Kohat ye ampe 133 kutolo xue.

¹⁹ Merari ye anu kini shike: Mahli ngo Mushi. Hipaqoye Levi lagha ke panoqo ti anuli iko ighikeuke.

²⁰ Amram no papu chepu Jokhebed luke, pano Aron ngo Muse punutsuke. Amram ye ampe 137 kuto xuke.

²¹ Izhar ye anu kuthu shike: Kora, Nefeg eno Zikhri.

²² Uziel ghi anu kuthu shike: Mishael, Elzafan eno Zithri.

²³ Aron ye Aminadab nonga Elisheba luke, liye Nahshon chepuke; lino Nadab, Abihu, Eleazar eno Ithamar punutsuke.

²⁴ Kora ye anu kuthu shike: Asir, Elkana eno Abiasaf; panonguye Kora nuli kokupha shive keu puasu qoke.

²⁵ Aron nu Eliazar ye Patiel nonga luke eno lino Fineha punutsuke. Hipaqono Levi laghalo alagha eno akiboqolo atou ke.

²⁶ Aron ngo Muse ye AMPEU no pama vilo ishi pikemi ke, “Ijip lono Israil lagha saipevelo” pike.

²⁷ Ijip lo akukau vilo Israilmi phepuwuvelo pi pikemiqo ke.

Muse ngo Aron lau Ahza Tsu

²⁸ Kughou AMPEU no Ijip yeghilo Muse putsa keno pano ishi pike,

²⁹ “Niye AMPEU ke. Ino ovilo pikeu thwokha kumtsu Ijip lo akukau vilo pesu pilo.”

³⁰ Ikemu Muse no ishi khochile, “Nono ithi anike niye atsa pishelho kemi lakhie, akukauye khileno itsa initsuni kya?”