IPEKULU 35 - BAIBEL (BSI)

Sabat Pinye Yeh

¹ Muse no Israilmi aqo-aho kuchopu ku kumqo no panoqo vilo pi, “AMPEU no nongu pelo shipenike ahza tsukeuye hipaqoke:

² Nongu kumla mlanike ghenguno atsala tsugho ani, ikemu atsala akutsuniuye AMPEU lau akimthe shilo eno iquighai akulhokiqhi tsala lakhi shilo. Timi khuu no tipa tsalani akumla kiu kiumu shinikeno pa pithivelo.

³ Sabat loye nongu kilo ami mu shikevilo.”

Akimthe Phikilo Akumllagho

⁴ Muse no Israilmi kumtsu vilo pi, “AMPEU no ahza tsuakeu ye hike:

⁵ AMPEU lau akumllagho lakhi shilo. Khunoqono tishinishi anikeno paye akumllagho hipaqo sughi pelo shunayi, tsandiyi momu alazayi,

⁶ phephei keu phi, tsulabiyeikeu, hughai keu eno huchui keu amhi phi, ane mhi pesu gho keu phi,

⁷ bheri yiko huchui bevekeu, ashiyiko kivi akasia su,

⁸ akululo sukepu teli, nuni keu teli ngo tsungqui axokutsungu-ta shikepu shi amkhu jeli;

⁹ eno achinetou ephod phi akimthe ngo amlalo xipu kepulo dakepushi karnelia ngo akughuputuqo ishi pesu mllalo.

AMPEU Phiki lo Nhemgha

¹⁰ “Nongu gholo akumla shikithimi kumtsuno ighi masa eno AMPEU no ahza tsukeu thwokha shilo:

¹¹ Aphiki, tipau nhaqhikeu eno khalaulo nhaqhikeu, pufukepu kughuhoyi eno tipau nhaqhikeu eno khalaulo nhaqhikeu, pufukepu kughuhoyi eno tipau akuchughi khagho; heptakepu khadu, tipau tsukucho qo eno tipaulo ghope qhikepuqo;

¹² Puloshoqhi Bohu, tipaulo akhadu, tipau kunha, tipau shope kepu nhaqhiphi,

¹³ akibepu, tipaulo peitha kepu jeli kumtsu, Alhou mllavekeu sho;

¹⁴ akuvu ghenguno akulu kibepu eno tile peithakeu jeli akulu eno tipa gholo teli,

¹⁵ tsungqui keu kiptia eno tipau khadu, nunikeu teli ngoyini munakeu ta, Aphikilo ikulolalo nhaqhiphi

¹⁶ akumllagho kiptia tipaulo alazayino akhoje shipe dakeu, tipau khadu eno tile pitikepu kumtsu, qhukepu chithakhu eno tipau ghokepua,

¹⁷ bothasu kepu nhaqhiphi tipau tsukucho eno ghokepuqo, bothasukeu ikulolalo nhaqhiphi,

¹⁸ pufu kepu kughuhoyi eno Aphiki ngo bothasukeu ghenguno akighiqo

¹⁹ eno achinemi pelo Akimthe alo mla akelo akimthe phimini pepu kepuqo ti achineu Aron ngo panuliqo ghenguno akimthe phi miniqo.”

Timiqono Akumllagho Sughi

²⁰ Israilmi kumtsu chesu wu

²¹ eno milakhi khino pano pulo keu kiqi lono AMPEU lau akumllagho sughi, tiye AMPEU no ache keu Phiki shiniyeke. Akumllalo pe ithanike avehupu shi akeu eno achinemi phimini mlakepu kumtsu panonguno sughi.

²² Kiptimi ghi totimi ghi khunono tishini shi keno ayipu jeli, akinilo kighi chekeu, anguthi, achi nichekeu eno akughupu chi ajeli sughi no AMPEU lau tipaqo ikhiphetsuve.

²³ Phepheyi phi, tsulabiyei keu, hughaikeu momu huchuikeu amhino shikeu phi; ane mhino shikeu phi, bheri yiko huchui bevekeu ashiyiko kivi aghikemi kumtsuno tipaqo pesu ighi.

²⁴ Khunoqono tsandiyi momu alazayi tsulu kepu shikeno AMPEU lau akumllagho tipaqo pesu ighi eno khunoqono akasia su akumlapulo peithalu kepu aghikeno tipaqo pesu ighi.

²⁵ Totimi atshamgha shikithimino phepheyikeu, tsula biyekeu, hughaikeu ngo huchuikeu amhino aye shikeu kighi panoqono mlakeu pesu ighi.

²⁶ Panonguno ane mhi pesu ayekighi ghi mlape qhi.

²⁷ Sakiphemiqono akimthe ephod lo ngo amlalo xipukeulo sunike ghenguno karnelia ngo akughupu-tu sughike,

²⁸ eno akulu ngo nunikeu teli eno ngoyini munakeu ta ghenguno amukhu ngo teli ghi sughike.

²⁹ Israilmi kiptimi totimi khunoqono AMPEU no Muse vilo shilo pi ahza tsukeu kumla ghenguno tsunishi kumsulu keno AMPEU lau panoqono puloniqhiyi keu kumllagho pesu tsuke.

Aphiki Ghenguno Atshamgha

³⁰ Muse no Israilmi vilo pi, “AMPEU no Uri nu Bezalel kisheluvae, pasuye Hur ke eno paye Juda laghami.

³¹ Alhou no pa ghungu pesu pa shou lepukuve tsuke eno shitsa shikeu, shikithi eno jukivi kumlapu jeli vethalu kepu kumtsu pa tsuvae.

³² Tiye aye shithikeu kughupenike eno tipauye shuna, tsandi eno alazayi pesu mllanikeu,

³³ medanike akughupu-tu ghatha keu, asu pesu akoghe shisu nikeu, eno kutau jukivipu jeli kumla kumtsu kighithi tsuvae.

³⁴ AMPEU no pa eno Dan laghami Ahisamak nu Oholiab lau pamano shithi akeu pesu kutamiqo shikalu penikeu ghi tsuvae.

³⁵ AMPEU no pama lau ayi yetha kemi, aye shipuku kemi, aphi kivi jeli gholukemi tsula biyei keu, hughaikeu eno huchui keu amhi phi ghothi kemi eno kutau phi ghokithi lokutsu pesu tsuvae, pamaye akumla jeli kumtsu eno aye shisu keu jeli kumtsu shilu nani.”