IPEKULU 3 - BAIBEL (BSI)

Alhou no Muse Kulu

¹ Ghulo lakhi Muse ye pangu Jethro, Media lo achineu wu bheri ngo ane loji kheakelo pano asayeqha kathasusu akimthe naghuto Sinai lo ighi.

² Tileno AMPEU wu kungumi lakhino asuminipho mtalono ami kuyiqu lakhi toi pa lau ipeghi. Asu minipholo ami iqu akeu Muse no ithulu ikemu tipau pitivekeu shimoe.

³ Pano ishi kumsuve, “Hiye akichiqhi kepue, kushiye asuminipho pitivemo kya? Ino kupunu wu puzu junie.”

⁴ Muse no kupunu ighino juniye cheghikeu AMPEU no ithuluve puzu asu minipho mta lono pano pakuno pi, “Muse! Muse!” Pano khochile pi, “Ni hile anie!”

⁵ Alhou no pi, “Tinguno alau kupunu ighikevilo. Opukhu kuqho ikhivelo kughengu noye akimthe-alo puthugho anike.

⁶ Niye nopu asuqo Lhou ke; Abraham, Isak eno Jakob Lhou ke.” Ikehu Muse no pagi nhaluve kughengu paye Alhou lau jupukunikeu msaveke.

⁷ Tileno AMPEU no pi, “Ijip lo iw timiqo kishi ayikusashi peitha anikeno niye ithuluvae; panoqono aqemi heqhikemi launo hakholuve tsulopi ighamuku keu ino chiluvae. Panoqono ichhe ime akeu kumtsu ino ithi ani,

⁸ eno niye Ijipmi launo panoqo xaphelunike iqighivae eno panoqo sasu Ijip lono aghakhu aqha kivilo saipeghini cheni, tiye kinikulu eno aghuma kua yeghike, Kananmi, Hatimi, Amarimi, Perizimi, Havimi eno Jebusimi no kughuna achenike.

⁹ Niye kuchono iwu timiqo ghugha chiluvae eno Ijipmino kishi panoqo shikighimeqhi acheni keno ithuluvae.

¹⁰ Ike ino Ijip lo akukau lau opuwuni tishi anguno nono iwu timi Israilmiqo pa yeghi lono saipeve peniyeke.”

¹¹ Ikemu Muse no Alhou vilo pi, “Niye khuu keno ino akukau lau wuni eno Ijip lono Israilmi saipeghini kya?”

¹² Alhou no khochile pi, “Ino ogholo anani eno kughou nono Ijip lono timiqo saipeghi nikeno noye hipau naghuto lono imlla nanike. Tipauno ino opuwu akeu michipu shinanike.”

¹³ Ikemu Muse no Alhou vilo pi, “Ino Israilmiqo lau wupuzu, ‘Nongu pu asu Lhou no nongu lau ipuwuke,’ ipi panoqo vilo pikelo panonguno ivilo, ‘Pajeye khuu kya?’ ipi iniju kelo niye kiu pesu panoqo vilo pini kya?”

¹⁴ Alhou no pi, “NIYE NIKE. Noye panoqo vilo ishi pilo: ‘Khuu kela NIKE ipikeuno nongu lau ipuwuke.’

¹⁵ Israilmiqo vilo panoqo pu asu Lhou ni AMPEU, Abraham, Isak eno Jakob Lhou no panoqo lau opuwu kepi pilo: Alhokupujulo ijeye hipauke, ighinikeu tiqhelimi kumtsuno hipau je pesu iku nani.

¹⁶ Wulo eno Israilmi sakiphemi hekutsu kumqolo eno panoqo vilo panoqo pu asu Lhou ni AMPEU, Abraham, Isak eno Jakob Lhou no olau ipeghi ke pi pilo. Niye panoqo lau ighi ani eno Ijipmino panoqo shou kiu shi ani keno ino ithuluve akepi pilo.

¹⁷ Ijip lo ayikushushi panoqo peitha akeu lono saipeghini keu ino xathavae, eno kinikulu aghuma yeghilo panoqo sawu nani, tiye Kananmi, Hatimi, Amarimi, Perizimi, Havimi eno Jebusimino achekeu yeghike.

¹⁸ “Nono iwu timiqo vilo kiu pikeno panoqoye tipau ini nanike. Tileno noye Israilmi sakiphemiqo sasu Ijip lo akukau vilo ishi pilo, ‘Ibrimi Lhou AMPEU ampino nilau pephe piyevae. Ike ningu pelo atsala kuthu ghenguno asayeqha qalo chesu wuno nilhou AMPEU lau lhoxu heqhi pe akumllagho tsulupelo.’

¹⁹ Ino ithi anike, Ijip lo akukau ye pavilo tsuyikhomo tishilo pimokeloye khilemu nongu puwumo nanike.

²⁰ Ikemu ino ikuka peitha nani eno akuighupu jeli tilau shikeu lono ino Ijip ghimeqhi nanike. Tishike thiuno pano nongu pelo wulupe nani.

²¹ Ino Ijipmiqo pelo nongu qhoqhupe nani tishi anguno kughou iwu timiqono cheveni keno panonguye a-u kumsa wumo nanike.

²² Israilmi totimi kumtsuno pano kisughumi Ijipmi totimi lau wuno tiphimini, shuna, tsandi eno akughupuchi khuni. Israilmino hipaqo pesu panongu tianuli pipeni eno Ijipmiqo kuakini xapusu wuveni.”