IPEKULU 25 - BAIBEL (BSI)

Alhou Kungo-a Kumllagho

¹ AMPEU no Muse vilo pi,

² “Israilmi vilo akumllagho lakhi ilau sughi tsulo pilo. Pututano kiu pesu akumllagho tsunishi anikeno tipau lutsulo.

³ Akumllaghoye hipaqo shipelo: Shunayi, tsandiyi, alazayi,

⁴ phephei phi akivi, amhiphi tsulakibiyeikeu, hughaikeu eno huchuikeu, ane mhino shikeu phimini,

⁵ bheri yiko huchui bevekeu, ashiyiko kivi, akasiasu,

⁶ akulu ghenguno teli, nukepu teli shinike eno tsungqui piti kumna kepu ta jeli,

⁷ Achinetou wu ephod phimini ngo amla kunha philo supu kepushi karnalia tu eno akughupu chi kutauqo ishi pesu mllalo.

⁸ Timiqo pelo ighenguno akimthe phiki lakhi shipe masa tishi anguno ino panoqo gholo ngoni.

⁹ Kishi shikepu keno ino opiyekeu kiqi lono aphiki tipau eno tipaulo supe qhikepu jeli kumtsu shimasake.

Puloshoqhi Bohu

¹⁰ “Akasia su pesu abohu lakhi mlalo, akushu lau sentimiter 110 akije lau sentimiter lhotsugho tsugho eno akiqhelau sentimiter lhotsugho tsugho shilo.

¹¹ Shunayi tsughukhui keu pesu alou ghi ashou ghi kuzuvelo eno ashe kumtsulo shunayi pesu mekhavelo.

¹² Tipau xapunikelo ghenguno shunayi bocho bidi mlalo eno tipau pukhu bidilo meda pukulo, abocho kinino tuxatuxalo qhilo.

¹³ Akasia su pesu xapukeu khadu mlalo eno shunayi pesu tipaqo kuzuvelo

¹⁴ eno tipaqo pesu abohu jibolo shunayi bocho akeulo chuxu sulo.

¹⁵ Akhadu tipaqoye abocholo tishi qhilo eno tiye ikhipheve kepu kumoke.

¹⁶ Tipathiu no abohu lo ino otsuniye akeu atu pha kuma ikhisulo, tipaqo shou ahzaqo yepuanike.

¹⁷ “Tsughukhui keu shunayi pesu akunha lakhi mlalo, akushu lau sentimiter 110 eno akije lau sentimiter lhotsugho tsugho shilo.

¹⁸ Shunayi hekupha pesu achishibo kupu kerubim kini mlalo,

¹⁹ lakhi khino akunha kichi ghenguno shilo: Tikumaye akunhalo medakuqha keu shi mla pe qhilo.

²⁰ Achishibo kupu kerubim ye akunha shou kujukile ghi shilo eno tipaqo chishiboye sukho pesu tipau nhakeu shilo.

²¹ Atupha kuma abohu alou sulo eno akunha pesu tipau nhalo.

²² Tilehino ino osasu kusholuni eno akunha shou kerubim kuma mtalono ino Israilmi ghenguno iyezah kumtsu pesu otsu nani.

Alhou Mllakeu Sho Kibepu

²³ “Akasia su pesu akibepu lakhi mlalo, akushulau sentimiter lhotache tache, akije lau sentimiter lhobidi eno akiqhe lau sentimiter lhotsugho tsugho shilo.

²⁴ Tsughukhui keu shunayi pesu tipau kuzuvelo eno tipau kichi sumxa shunayino veho mukhalo.

²⁵ Akichilo kuluqhe keu akijelau milimiter lhotsuni pungu veholo eno shunayi pesu tipau kuluqhekeu mukhalo.

²⁶ Tipau xapu kepu shunayibocho bidi shilo eno tiye ako bidilo khile apukhu anikeno tipaulo sulo.

²⁷ Akibepu xapukepu khadu xipenikeu bocho akibepu mutsu kuluqhekeu phivilo sulo.

²⁸ Akasia su pesu akhadu mlalo eno shunayi pesu tipau kuzu velo.

²⁹ akhu, ajukhu, ghokepu jukhu eno chithakhuqo atsayi-ji pesu mlla keulo peitha kepushi mlape qhilo.

³⁰ Akibepu huye Puloshoqhi Bohu gizulo qhilo eno akibepu shou pulhapujulo imllavekeu akimthe sho qhipua chelo.

Akulu Kibepu

³¹ “Tsughukhui keu shunayi pesu akulu kibepu lakhi mlalo. Tipau pukhu ngo tipau kumutsuye shunayi hekupha pesu shilo; eno tipau kumtsulo axamunu shikeu anhethi ngo anipaqo tipau pukhulo shikimepukulo.

³² Tipau jibo lono aloka tsugho ikawokeu shilo, hulau kuthu hilau kuthu shilo.

³³ Aloka tsugholo lakhikhino axamunu toi keu shi almon puakelo anhethi eno anikapuakeu jukoghe shilo.

³⁴ Akulu kibepu amtau kumtsuye axamunu toi keu shi almon puakelo anhethi eno anika akeu ju koghe bidi shipe qhilo.

³⁵ aloka tuna kuthu akeu lakhikhi qholo anhethi lakhi shipe qhilo.

³⁶ Anhethi, aloka eno akulu kibepuye shunayi leqhi lakhi lono hepha keu tsughukhuyi keu shunayi no shilo.

³⁷ Akulu kibepulo qhikepushi akulubo tsuni mlalo eno tipaqo pewo qhilo tishi anguno tipaqoye azuu kudau yevuqai pelo.

³⁸ Tipaqo tsakepu eno khapewu kepuye tsughukhui keu shunayi no shilo.

³⁹ Akulu kibepu eno tipaulo peitha kepu hipaqo kumtsu mlanike ghenguno shunayi kilogram shighi pungu peitha lo.

⁴⁰ Ino naghutolo opiyeve keu koghe kiqi lono tipaqo kishekulu shi mlalo.”