IPEKULU 16 - BAIBEL (BSI)

Mana eno Atsungu

¹ Israilmi aqoaho kumtsu Elim lono cheve eno panongu no Ijip qhivekeu aqhi akiniulo chighi apunguu tsalani panonguye Sin sayeqhalo ighilu, tiye Elim ngo Sinai kuma dolo anike,

² Asayeqha tilehi panongu kumtsu no Muse ngo Aron pama vilo muchhou khave

³ eno pama vilo ishi pike, “Ijip lono AMPEU pelo ningu heqhi pithive keumu pavi nicheke. Tilauye ninguno chunishi ke thaqhu ashi chulu eno achuqupu jeli chuluni cheke. Ikemu nokujono asayeqha hipaulo ningu pelo akhuavashi puzu thive penike sa ipeghianike.”

⁴ Tileno AMPEU no Muse vilo pi, “Jualo, ino nongu kumtsu ghenguno kunguuno achuqupu ghuqhi tsuni chenike. Timiqoye ghulo atsu tsu khalau ipeghi puzu tipa tsalani ghenguno lukumukhashi pekutsulu masae. Hitoi shikeu lono panonguye ino shilo pikeu papenikemo keno ino panoqo ghukejuni cheni.

⁵ Atsala akutsughoulo panonguye puzuu nguno ghuthu kini jejehi pekutsulo eno tipau kutope qhilo.”

⁶ Ikehu Muse ngo Aron pamano Israilmi kumtsu vilo pi,”AMPEU no Ijip lono nongu saipe ghi keu itijino nonguno ithi nanike.

⁷ Inaqheno AMPEU gholo saghu saghuiakeu kuvu nonguno ithulu nani. Nonguno pa shou muchhokeu eno pipukukeu pano chiluvae kughengu ningu vilo shilopikeu likhi shitsu ani kethono.”

⁸ Muse no ishi pi, “AMPEU no avelauno nongu pelo chupeniye ashi tsu nani eno inaqhe no nonguno lunishi ake thaqu asho nongu tsu nanike, kughengu nonguno kishi pa shou muchho cheni keno pano chiluvae. Kughou nonguno nishou muchho keno nonguye kuchouno AMPEU shou muchho anike.”

⁹ Muse no Aron vilo pi, “Aqo ahomi kumtsu ighi puzu AMPEU zulo puthugho lo pilo kughengu panonguno muchhokeu pano chiluveake.”

¹⁰ Aron no aqoahomi kumtsu putsa akelo panonguno asayeqha kudau jukelo paikhavino AMPEU kuvu saghu saghuikeu khungkusu lakhilo ipeghi.

¹¹ AMPEU no Muse vilo pi,

¹² “Israilmino muchho akeu ino chiluvae. Panoqo vilo pilo ike avelau zughuive kelo panonguye ashi chukepu ithulu nani eno inaqheno panonguno lunishi ake thaqhu asho ithulu nani. Tileno ni AMPEU ye panoqo Lhou kepi panonguno ithi nani.”

¹³ Avela shivekelo atsungu loji kije lakhi panonguno ngo akeu qha nhaluve nikeshi yeighi, inaqhe shivekelo panonguno ngo akeu qha sukumxa kumtsu atsuzu qi ae.

¹⁴ Kughono atsuzu chethovekeno asayeqhalo kiu kela ipumihei lha lhaike auve. Tiye avutsa toi sasayike.

¹⁵ Israilmino kughou tipau ithulu keno panongu ye tiye kiu kela muthano lakhino lakhi vilo,Hiye Mana ipi inijukileke. Muse no panoqo vilo pi, “Hiye AMPEU no nongu pelo chupenike tsuakeu chuqupuke.

¹⁶ AMPEU no ahza tsuke nongu milakhi khino khije avehupu shinikeno tijehi xukumuqo lulo, akibolo milakhi khino ahukimghi lakhi khi xukumuqo lulo.”

¹⁷ Israilmino titoi shike, khamiye alau xukutsuluve eno khamiye tomono lue.

¹⁸ Kughou panonguno tipau mighiju keno, khunoqono kutomo xulukeno ala kutomo shi aghimoe eno khunoqono aghulo xulukeno tulalo kutu keu shimoe. Milakhi khino pano avehupu shiakeu qhemi xukumuqo lue.

¹⁹ Muse no panoqo vilo pike, “Timi khumu thoghiu ghenguno tipau qhikevilo.”

²⁰ Ikemu panongu khamiye Muse tsa inimo puzu tipau hami qhipuave. Thanau tipauye apithe iloveno tsu munauve eno Muse ye tipaqo shou amlo ideve.

²¹ Inaqhe atsu tsu pututano avehupu shi akeu qhemi xukumuqolue; kughou tsukinhe shukuthui ipeghiveni keno ayeghilo qhivekeqo huye mula hauveke.

²² Atsala akutsughou loye panonguno puzuu ithulu chekeu jehi ghuthu kini xukumqolu timi lakhilo ahukimghi kini xukumqolu che. Aqo aholo sakiphemi kumtsuno ighi puzu Muse vilo tipau vehu pike,

²³ eno pano panoqo vilo pi,”AMPEU no ahza tsukeuno thoghiuye akulho kiqhi tsalake akimthe palau pephe tsuvekeuke. Nonguno ishino ghunishi aye ghu eno nonguno be nishi aye ishino belulo. Kiu pepuaveni keno tiye thoghiu ghenguno tikutashi qhilo.”

²⁴ Muse no ahza tsuveke toi panonguno kiu qhive keno thoghiu tsala kutolo qhike, tiye shipusamoe momu apithe tipaulo ilomoke.

²⁵ Muse no pi, “Ishiye tipau chulo, kughengu ishiye Sabat akulhokiqhi tsalake. AMPEU lau ikhiphe tsukeu tsalake nonguye akungo -a phivilo achuqupu kiumu phumla nanike.

²⁶ Nonguye atsala tsugholo achuqupu xukumqolu masae ikemu atsala akutsuniu akulho kiqhi tsala loye kiumu ithumla nanike.”

²⁷ Atsala akutsukiulo timi khamino achuqupu xuluniaye wujuke ikemu panongu ye kiumu ithumlae.

²⁸ Tileno AMPEU no Muse vilo pike, “Khitotohi kutolo nongu timiqoye ino ahza tsukeu agholumono aniaphi kya?

²⁹ Ni, AMPEU no akulho kiqhi tsala lakhi nongu tsukeu kumsululo eno tishi kehu atsala akutsughou loye ghulo kini ghenguno achuqupu lukumkha ino pulhapuju nongu tsu nani. Timi kumtsuno akutsuniu tsala loye pano khile anikeno tipa-alo paki qhive kevino ngolo.”

³⁰ Ikehu timiqoye atsala akutsuniu loye akumla shimoe.

³¹ Israilmino achuqupu tipau pesu Mana kutsue, Hiye alothi kititi metsughoi keu toi ke eno miche kelo akhingozuno asho shikeu toi ke.

³² Muse no pi, “AMPEU no ningu vilo Mana hami kikepe qhilopi ahzatsue, tiye ningu polo kughukomiqo ghenguno qhitsuni keu, tishi anguno panongu pelo AMPEU no Ijip lono ningu saipeghi kelo asayeqhalo ningu pelo chupenike pano achuqupu tsukeu ithulu peniyeke.”

³³ Muse no Aron vilo pi, “Abohu lakhi lupuzu tipaulo Mana ahu kimghi lakhi sulo eno tipau pesu AMPEU no akeu alo qhilo, tiye nipolo kughukomi ghenguno qhilo.”

³⁴ AMPEU no ahza Muse tsukeu toi Aron no tipau pesu Puloshoqhi Bohu zulo qhi, ikehu tiye qhipualue.

³⁵ Israilmiye tipathiu Kanan yeghi wo tomoke kutolo ampe lhobidi Mana chuche. Athiuye panonguno tipa alo wo ngoluveke.

³⁶ (Tipa ghulokilo peithachekeu akimighipu bohuye ahukimqhi muku ilokeu qhemike.)