IPEKULU 12 - BAIBEL (BSI)

Hechekulu Ghulhu

¹ Ijip lono AMPEU no Muse ngo Aron pama vilo pike,

² “Hipa qhiye nongu ghenguno ampelo aqhi atughiu shini.

³ Israilmi aqo aho kuchopu vilo hipa tsa pesu tsulo: Hipaqhi atsala achighiulo timi lakhi khino pa kibo ghenguno bheriti momu ane alhothe lakhi kishelu masa.

⁴ Tsala pa kiboye aghulo likhi puzu lhoxu tipau kuchopu chukhamla kepu shi aye, paye pa kisughuu sasu tipau lhoxu kuxalu nani, timi khije aghini eno lakhikhino khije chulu nani keno tipaqhemi lono kusajelo.

⁵ Nonguno bheri na ane pinamu kishe kide luvi ikemu tipauye ampe lakhi atsu tukutiye kuhakeu shi masake.

⁶ Tishi no tipaqhi atsala chighi abidiulo kijiliuno Israilmi aqo aho kumtsu ghano lhoxuqo heqhilo.

⁷ Timiqono ahji pesu aki khipau lono tipau shi chuni keno tipau hukikha tsukucholo eno ahukikha kunguu nudalo.

⁸ Tipajino ashiye ghuveno khumtsayi keu tsuni gholono eno kholaqhi sumokeu sho gholono chulo.

⁹ Ashi tipau akuxu shi momu lhove puzu chukevilo, ikemu tiye akutsu ngo apukhu eno kighinoli kumtsu akuchopu tishi peno ghupuzu chulo.

¹⁰ Inaqhe shikelo tipau leqhi kitilamu puaghimoni; tipau chukhamove keu ye pitive masake.

¹¹ Nonguye hipa ghola lono chuni: nongu chita khapuluveni, apukhukuqho puluveni, nokusu aulo peni eno nonguye tipau mighi mghai chuni. Hiye AMPEU gihukeu Hechekulu Ghulhuke.

¹² Tipaji, niye Ijip yeghi qhalo wunani, timi na lhoxu pinamu kiptimi anoghiu heqhini cheni eno Ijip lo alhouqo kumtsu ghimeqhi ni cheni. Niye AMPEU ke.

¹³ Ahukikha tsu kucholo ahji akeu huno nongu no ngo akeu ki michipu shi nanike. Ino ahji ithulu kelo niye nongu hechesu wuve nani eno ino Ijipmi kutsaqhi akelo nongu shou kiumu shikupsa ikughimo nani,

¹⁴ Nonguye hipa tsalaye achineyeh lo tiqhetini lakhi shi ikhiluche masake, ni AMPEU no kiu mla keno nonguno kumsuchilelu masake. Ighinikeulo hipau ikhiluchelo.”

Aqhi Sumokeu Sho Ghulhu

¹⁵ AMPEU no pi, “Atsala tsuni ghenguno nonguye kholaqhi sukeu sho kiumu chukevilo; aqhi sumokeu sho likhi chulo. Atsala atughiulo nongu kilono kholaqhi kumtsu pevelo kughengu nongu gholo khuuno ti atsala tsuni dolo kholaqhi sukeu sho chuni keno paye iwu timiqo gholo kihisu move nani.

¹⁶ Atsala atughiu eno itaghi akutsuniu tsalalo nonguye imlla kuhonike kumqolo. Tipa tsalalo nonguye kiu kumlamu shimoni ikemu achuqupu likhi kutolu nani.

¹⁷ Hipau pinye pinyi chelo kughengu hipa tsala lono ino noshiayehqo Ijip lono sa ipeghike. Ighinikeu tsala kumtsulo ghi nonguye hipau tsala pinye pinyikeu ikhilu masake.

¹⁸ Aqhi atughiulo atsala chighi abidiu avelau kuto lo nonguye kholaqhi sukeu sho kiumu chukevilo.

¹⁹ Atsala tsuni dolo nongu kilo kholaqhi qhimoni, kughengu kiche ghuzumi shiakeu na, aghakhu lomi shi anamu, timi khuuno kholaqhi sukeu chuni keno paye Israilmi gholono kututa shive tsunani.

²⁰ Nonguye kholaqhi suvekeu kiumu chumoni; nonguno ngokeu kumtsulo kholaqhi sumokeu sho chulo.”

Hechekulu Pinye Atughiu

²¹ Muse no Israilmi sakiphemi kumtsu kuno panoqo vilo pi, “Nongu milakhi khino bheriti momu ane alhothe lakhi kishelulo eno tipau heqhilo tishianguno nobolomiqoye Hechekulu Ghulhu ikhilu kepushi.

²² Ayilo loka lakhi lulo eno akhulo lhoxu tipau jih akeulo chosu puzu nongu hukikhaqo tsukucholo eno ahukikha kikhalo nuda pukulo nongu gholo milakhimu inaqhe shimoke kutolo aki qhive kevilo.

²³ Kughou AMPEU no Ijipmi heqhinike Ijip qha kumtsu wuchekelo pano ahukikha kuchosu ngo piphisulo ahji aghi keu ithulu nani eno Akithipu Kungumi pelo nongu kilo ilo pemo eno nongu nu heqhi pemo nanike.

²⁴ Nongu eno nongu nu tianuliqoye ayeh hipau alhokuthulo peche masake.

²⁵ Kughou nonguno AMPEU no nongu tsunikeu shi tushoqhi puakeu yeghilo iloluni keno nonguye hipau chine khuayeh shiche masake.

²⁶ Nongu tianuliqono hipau vehu, ‘Hipau chine khuayeh kiqiye kiu kya’ ipi iniju aye

²⁷ nonguno ishi khochilelo, ‘Hiye AMPEU gihu keu. Hechekulu lo heqhi mllakeuke, kughengu Ijip lo pano Ijipmi heqhi pithivetsu ikemu ninguye puxu tsuke.’ ” Israilmiqono khoqhunheno mllake.

²⁸ Tishino panonguno wupuzu AMPEU no Muse ngo Aron pama ahza tsukeu toi shike.

Anoghiu Thivekeu

²⁹ Zubumtalo AMPEU no Ijip lo anu anoghiu kumtsu heqhi pithivetsu, akukau nu, akuka lakhu mheghi ighiniye akeu lono akughukilo akughu shiakeu nu kutolo pithivetsu ke; eno lhoxu piti tughiu ghi kumtsu pithive tsuke.

³⁰ Tipaji, akukau, pawu kijemi eno Ijipmi kutamiqo kumtsu kuda puthuveke. Ijip qha kumtsu vekipighi qa auve, kughengu aki lakhi lomu anu thimokeu kuhave.

³¹ Tipajino akukauno Muse ngo Aron kuno pi, “Chevelo, nongu eno Israilmiqo! Ighakhu qhivelo; wulo eno nonguno khu akeu toi AMPEU mllawulo,

³² nongu wu bheri, ane, amshi ishi sasu chevelo! Eno ishou kukumgha khuini tsulo.”

³³ Ijipmino timiqo vilo aghakhu qhiveno wuve penike mutazu hakite; panonguno ishi pike, “Nonguno chevemo aye ninguye kumtsu thiniake.”

³⁴ Ikehu timiqono panoqo sho kishi lilo kholaqhi sumokeu sho kukunu suluve eno aphino mushopu puzu pano muqa lono xapuwu.

³⁵ Israilmino Muse no pikeu toi shike eno Ijipmi vilo shuna ngo tsandiyino shikeu achi jeli eno aphi mini jeli khuluve.

³⁶ AMPEU no Ijipmi pelo timiqo qhoqhupe ke eno panoqono khukeu tsupeke. Hitoi shipuzu Israilmino Ijipmi kini kulu xapu wukhave tsuke.

Israilmino Ijip Qhive

³⁷ Ramese lono Sukot kutolo Israilmiye apukhu no chesusu wuke. Tilehi totimi ngo ititunuqo kihi kuqha mokelo timi asakithe 6,00,000 cheke.

³⁸ Timi kutami kutomo, bheri ngo ane eno amshi kumzapu ghi panoqo gholo wuke.

³⁹ Panonguno kholaqhi sumokeu sho Ijip lono asho kukunu supeghikeu pesu shie, kughengu pai khavino Ijip lono panoqo hapuwuve kehu panonguye achuqu kuto kepu do kuhaveke momu kholaqhi sho kukunu kuto mlaveke.

⁴⁰ Israilmiye Ijip lo ampe 430 acheke.

⁴¹ Ampe 430 toveke tsalalo Alhou wu timiqo shiayeh kumtsu Ijip qhive.

⁴² Tiye AMPEU no khepesu juachekeu putho tsala, Ijip lono pano qo saipeghi nikeu shi ache keuke; tipau putho tsalaye hinguno hithiu ighini keulo ghi AMPEU lau ikhipheve tsukeu, tipau putho tsala ighikelo Israilmiye khe pesu ju amasake.

Hechekulu Ghulhu Yeh

⁴³ AMPEU no Muse ngo Aron vilopi, “Hechekulu Ghulhu khu ayeh hipaqo kene; Inaghami khuumu hipau Ghulhu libe chumoni,

⁴⁴ ikemu nonguno qhuluvekeu aqemi aghi aye nonguno aphighu yiko ghavetsuke thiuye tipau chulu nani.

⁴⁵ Kupokichemi momu qeleqemiye tipau chu pemoni.

⁴⁶ Alibe akuchopu tipau kuto keu ki lono chu khaveni; tiye khalacheu pe ipe moni. Lhoxu qo saghi lakhimu hepho tsumoni.

⁴⁷ Israilmi aqo aho kumtsu ghano hipau pinye pinyikeu ikhiluni,

⁴⁸ ikemu aphighu yiko ghamokemiye hipau chumoni. Inaghami lakhino nongu gholo kughuna acheuveno AMPEU gihuniye hipau Ghulhu ikhilu nishi aye, nonguye pa kibolo kiptimi kumtsu aphighu yiko ghave tsupaghilo. Tithiuno paye Israilmi lakhi shi ghi punu kemi toi pa peithalo eno pinyi keu lo sulu nani.

⁴⁹ Ayeh hipauye nongu Israilmi shi punu kemi eno inaghami nongu gholo acheuve kemi kumtsu shou aphiphike.”

⁵⁰ Israilmi kumtsuno aghokulu shi eno AMPEU no Muse ngo Aron pama lau ahza tsukeu shike.

⁵¹ Tipa tsalalo AMPEU no Ijip lono Israilmi shiayehqo saipeghike.