IPEKULU 10 - BAIBEL (BSI)

Tulhaqu

¹ Tipathiu AMPEU no Muse vilo pi, “Wuno akukau sasu kusholo.Ino papelo eno pau kijemi pelo amlo hekike auve apeke tishi anguno panoqo gholo ino akumzapu michi hipaqo shiniyeke.

² Tishi anguno nonguno ngongu nuli eno notilimiqo vilo ino kishi Ijipmiqo qokughuzu eno panoqo gholo kiu akumzapu michi shikeno tipaqo vilo pipeniyeke. Tishianguno niye AMPEU kepi nonguno ithi peniyeke.”

³ Ike Muse ngo Aron pamano akukau lau wuno pavilo pi, “Ibrimi Lhou, AMPEU no pianike, ‘Noye khitohi kutolo izulo itsaqimono mili auvea kya? Iwu timiqo pelo imllape kepushi puwuvelo.

⁴ Nono mopi auve aye thoghiu ino noyeghilo tulhaqu saghi nani.

⁵ Tipaqoye kumzapu kehu ayeghi nhachhive nani. Apughuno kutsa mono aghikeu, asuboqo ghupuaghikeu pinamu tipaqono chuve nanike.

⁶ Tipaqono oki, owu kijemi ki eno owu timiqo ki chhive nani. Tipaqoye nopuasuqono ayeghilo akelo khilemu ithulu puamo keu shi akusa akusau shinanike.’ ” Tishi puzu akukau launo idesu cheve.

⁷ Pawu kijemiqono akukau vilo pi, “Timi hipau pelo khitotohi ningu shipusaqhi apeni kya? Israilmi kiptimiqo pelo wuvepelo tishi anguno panongu pelo pano Lhou AMPEU mllalu penike. Ijip shipsakhave ake noye kumsumla kesha?”

⁸ Ikehu akukau lau Muse ngo Aron pama saide saghi eno pano pama vilo pi, “Nonguye wuno noLhou mllalu nani; ikemu khunoqo wuni kya?”

⁹ Muse no pi, “ningu ititunu eno kitemi kumtsu wunanike. Ninguye ninunoqo eno ningaqo, niwu bheriqo ngo aneqo eno amshiqo kumtsu sasu wuni kughengu ninguye AMPEU gihunikeu shi aghulhu pinye lakhi shi masake.”

¹⁰ Tile akukauno pi, “AMPEU pesu ino tushoqhi anike niye khilemu nongu pelo nowu totimiqo ngo atianuliqo sasu wupemoe: Nonguye alhoksa, hebide nikeu muqu kutope anie:

¹¹ Khilemu tishimlake! Nonguno pulokutu aye nongu kiptimi likhi wuno AMPEU mllalu nanike” Tishi puzu Muse ngo Aron pamaye akukau zulono hapheve.

¹² Tileno AMPEU no Muse vilo pi, “Tulhaqu saghi kepushi Ijip yeghi shou ou peqhelo. Tipaqono ighi no abo ipeghi akeu eno apughuno ghupe puaghikeu jeli kumtsu chuve nani.”

¹³ Ike Muse no pa kusu peqhe eno AMPEU no tipa tsala putho pucho kupuju kipelauno amlhu tipau yeghi shou mulhu puku. Inaqhe ye tipau mulhuno tulhaqu saghive.

¹⁴ Tipaqono amqo amqono chokive ighi puzu ayeghi kumtsulo ngoluve. Tulhaqu muqo titoi keu khilehimu ithumla aphike momu itaghi ithuluni chemoke.

¹⁵ Tipaqono ayeghi nhaluve ikehu ayeghiye tsubui ithuluwuve; apughuno ghupe puaghikeu jeli kumtsu tipaqono chuve; asubolo axathi aghikeu ghi chuve. Ijip yeghiqhalo asutsuni momu asubolo akeu jeli lakhimu qhitsumove.

¹⁶ Tileno akukauno mtazu Muse ngo Aron pama kupuzu pi, “Niye noLhou AMPEU shou eno nongu shou axine shivae.

¹⁷ Itehiye hi ghuthu lakhi ixine qhivetsulo eno aghime kitikhi hipau ilauno ikhisuwuve tsupenike AMPEU Alhou vilo inikhulo.”

¹⁸ Muse no akukau qhiveno wuve eno AMPEU vilo inikhutsu.

¹⁹ Ike AMPEU no kipelau mulhu kilipesu kulolau mulhu akumto lakhi shivetsu eno tipauno tulhaquqo fuqhive eno fupesu Akuhu Zughilo suvetsu. Ijip qhalo tulhaqu lakhimu qhitsumove.

²⁰ Ikemu AMPEU no akukau pelo amlo hekikepe auvepe eno pano Israilmi pelo wupemove.

Zumoikeu

²¹ AMPEU no tipathiu Muse vilo pi, “Ou kunguu peqhelo eno zumoikeu shishoi keuno Ijip yeghi nhaluve nanike.”

²² Muse no kungu kudau au peqhe kelauye Ijip yeghiqhalo atsala kuthu zumoikeuno shishoipe auve.

²³ Ijipmiqoye lakhino lakhi ithumlave eno tishi akelo khuumu pututa ki qhivemoe. Ikemu Israilmino akeu aloye akuvu ake.

²⁴ Akukau no Muse kuno pi, “Nonguye AMPEU mlla kepushi wulu nani; nongu gholo totimi ngo atianuliqo ghi wulu nanike. Ikemu nowu bheri, ane eno amshiqoye hilau ngovepe masake.”

²⁵ Muse no khochile pi, “Tishiaye niLhou AMPEU lau heqhi mlla eno piti pe mllakepu shinike ghenguno nono lhoxuqo kutopesu ningu tsukepu shinanike.

²⁶ Tishimoe! Ninguye niwu lhoxuqo apukhu mutsu kupu lakhimu qhimono sasu wunani. Nilikhi ninguno lhoxu khipaqo pesu nilhou AMPEU mllani keno kishekide masa nanike. Ninguno wo tomphi loye kiu lhoxuqo heqhi pesu pa mlla nanikeno ninguye ithini chemoe.”

²⁷ AMPEU no akukau mlo hekikevetsu eno pano panoqo puwumove.

²⁸ Pano Muse vilo pi, “Igizu lono chevelo! Ipelo itaghi noithulupe kevilo! Ino noithulu ke tsala lono noye thiniake.”

²⁹ Muse no pi, “Nono pike toi, noye khilemu ni ithulu kithe move nanike.”