IBRIMI 9 - BAIBEL (BSI)

Ayeghilo eno Kungughalo Alhou mllakeu

¹ Puloshoqhi atughiu ghi Alhou mllakepu yeh eno mllakepua shipuacheke.

² Khalau bocho phiki shipe qhipuakeu pesu Akimthe-A ipi piche, eno tipau alou akulu ghopeqhikeu ngo akibepulo Alhou mllakeu shopa ngo ishi ache.

³ Nhaqhiphi akiniu veche ilokelo Akimthe nguno Akimthe-A ipi keu phiki ache.

⁴ Tipau alou tsungquyi keu kiptia shunano shikeu ngo puloshoqhi bohu shunano ajibo kumtsu kuzunhakeu ngo ishi ache. Tipau bohu alou manasho sukepu shunano shikeu bohu, Aron wu akusu anipa isheipeghivekeu eno atulipha kinilo puloshoqhi tsaqo yepeqhikeu ngo ishi ache.

⁵ Abohu shou mulapuyikeu lhoxu Kerubim no Alhou jukuvu shi-ghi ae, eno achishibo sukhopesu axine pevetsuchekeua khonhape ache. Hipaqo ghili itehiye kishekulu shi piakhamlake.

⁶ Hipaqo kutopesu qhipuzu, achinemino tsalakipetsu shichekeu kumlapu shiniaye khalau phikibolo iloche;

⁷ ikemu aphiki akiniu boloye achinetou likhino ampelo ghuthu lakhi likhi iloche. Tighi pa likhi pa ghenguno Alhou mllakeu jih ngo timiqono mtha puzu axine shivekeu ghenguno Alhou mllakeu jih ishi pemokeloye ilochemoe.

⁸ Hitoi kutopuakeulo Aghungu Kimthe no ningu vilo piyetsukeuye khalau phikibo akethaqhuloye Akimthe nguno Akimthe alo ilolunikeu shimla aphie.

⁹ Hiye itodolo ghuloki michike. Hipaqo kiqiye akumllagho ngo lhoxu heqhi pesu Alhou mllakeqoye mlla akemi mlo shikimtheve tsumlae.

¹⁰ Tipaqoye kuchu kusho eno qhukimthe anikeu yeh likhike. Hipaqoye Alhou no shikithekeu sughikumo dolo aphimpi ghenguno bekutha yehqoke.

¹¹ Ikemu Khristo ye thime kivi achekeqo ghenguno achinetou shi ighivae. Pano achineu shiakeu phikiye akijeu eno kupukuluu alau timino shikeu phiki kumoe, ike tiye lhophekeu yeghilo akeu kumoe.

¹² Pano ghuthu khavino pulhapuju ghenguno aphiki vechesu Akimthe-A lo ilokelo, paye anetsu ngo anetiqo jih pesu ilomoe ikemu pa likhi pa jih pesu ilopuzu ningu ghenguno lhokta xakulupu phutsuke.

¹³ Kughengu anetsu ngo amshitsu jih eno amshiali pitikeu yevu pesu timi shou kuzutepuku puzu achineyeh kiqilo mitheluvepe cheni aye,

¹⁴ Khristo jihye tinguno shishe alau shilupe puanike. Pano lhokta Ghungu vechewo tukutiye kuhamithe ghi Alhou lau pa likhi pa pephe tsuvekeu pa jih huye avehupu kuhamithe keu kumla lono ningu mlo lotsuh shikimthe pesu akuxupu Lhou qelupeniyeke.

¹⁵ Highenguno Khristo no Puloshoqhi Akitheu pekime kutsuuke, tishianguno Alhou no kuluvekemi pelo lhokta mheghi piqhipuakeu ithulupe niyeke, kughengu akithi lakhi thipe puakeu huno timino puloshoqhi atughiu qholo akelo pimipuakeu launo panongu xachile phelu anike.

¹⁶ Kughengu puloshoqhi lakhi aghikelo khuno tipau shikeno timi tipau thiakemokeno mutsuqheyi shipaghi masae.

¹⁷ Puloshoqhi lakhiye khuno tipau shikeno timi tipau xuaphi loye kiumu akiqi kuhae, ikemu pano thive kethiuno tipau pekishewo cheni.

¹⁸ Tishike ghenguno puloshoqhi atughiu ghi ahji sukethiuno pekishewoke.

¹⁹ Muse no timiqo kumtsu vilo Ayezahlo ahza tsupuakeu kumtsu asheshuve kethiu, pano amshiti jih ngo ane jih ikhilu puzu azu gholono ayiloni ngo ayeho akuhu pesu Ayezah kaku ngo timiqo kumtsu shou kuzutepukuno

²⁰ ishipi, “Hiye Alhou no khikhi nongu vilo ahza tsukeno tipau puloshiqhi shikeu jih ke.”

²¹ Tihutoi itaghi Muse no aphiki ngo Alhou mllakeulo peitha chekeu akhu-ali kumtsu shou ghi ahji kuzutepuku.

²² Mutsuqheyino Ayezah qholoye thwokha ahji pesu shikimthe che eno ajhi pelemo keloye axine pevetsukeu kuhake.

Khristo Kithino Axine Ikhisuwuve

²³ Kungughalo nhemgha kimihi hipaqoye hitoikeu pesu shikimthe masakepu shiveke, ikemu kungughalo nhemghaqoye hipaqo nguno heqhipe mllakeu akivino shikimthekepu shianike.

²⁴ Kughengu Khristo ye timino shipeqhikeu Kimthe-alo iloke kumoe, Akimthe-A tiye kuchou kimihi shianamu, ikemu paye kungugha-alo iloke, itehi paye tilehi Alhou zulo ningu zuqhushi ngotsuani.

²⁵ Judami chinetouno ampe atsutsu lhoxujih pesu Akimthe-A lo ilokeu toi Khristo ye ghuthu kutomo pa kughapesu mllakeu kumoe;

²⁶ tishike aye ayeghi lhophe kemtsa lono paye ghuthu kutomo aghime shive nicheke. Ikemu tilehiye tiqheli kumtsu kishekhaveni chekelau pano pulhapuju ghenguno ghuthu khavino ipeghivae, tiye pa likhi pa pesu aghashi thikeu vechewo axine pevetsu niyeke.

²⁷ Timi kumtsu ghuthu lakhiye thivenikeushi kutovetsu eno tipathiu Alhou no kughatha bekeu ighi cheni.

²⁸ Tihutoi Khristo ghi timi kutomo xine puluvetsu nike ghuthu khavino pa likhi pa ikhiphetsuve. Paye ghuthu akiniu ipeghi nani, tiye axine ikhive tsunike ghenguno kumoe ikemu pa huqhekhe aghikemiqo xaluniyeke.