IBRIMI 8 - BAIBEL (BSI)

Jisu no Ningu Achine tou

¹ Ti pi ighivekeulo atsa akhoto huye hike: ninguye achinetou hukithipu anie, kungughalo Akughushuu kuka lakhu ajeu iqa chekeuke;

² Shishe Akimthe-alo, tiye timino shikeu kumono Ampeu no shipe puakeu phiki kuchoulo achinetou kumla shi acheni.

³ Achinetomi lakhi khino akumllagho ngo lhoxu heqhi pesu Alhou mlla penike susupe puani; tighenguno nichinetou ghi kiwala pesu mlla masakepu shiani.

⁴ Pano ayeghilo akenapiaye paye khilemu achinemi lakhi shimoni cheke, kughengu Ayezah kiqi lono akumllagho pesu mllakemi achinemi akhanike.

⁵ Achinemi tipaqono shichekeuye kungughalo akimthe-a akeu julho kimihike; kughengu Muse no aphiki shiniaye akelo Alhou no pa piputoghi ishipi, “Naghutolo khikhi opiyekeno tipau agholaahila kimihi lono thwokha kumtsu shimaye sake.”

⁶ Ikemu Jisu no Alhou ngo timi dolo puloshoqhi shipe qhitsukeuye akiviuke, tiye thime kivi piqhipuakeqo shou bepuzu shike ghenguno; tihutoi, achine kumla shipeniye pa tsupuakeu ghi achine kumla shichekeu aqau nguno shishe akiqheuke.

⁷ Puloshoqhi atughiulo akuyiqupu kiumu kuha kena piaye puloshoqhi akiniu avehupu shimo nicheke.

⁸ Ikemu Alhou no ishi pikeulo paye pawu timiqo lau akuyiqupu ithulupe anie: “Ampeu no piani, Ino Israil kibolomi ngo Juda laghami sasu puloshoqhi akitheu shinikeu tsalaqo ighini cheni.

⁹ Tiye pano puasuno Ijip yeghilo akelo a-u lono ino sunhephe pesu ipeke tsalanino Ino panoqo sasu puloshoqhi shikeu toimo nani. Ino panoqo sasu puloshoqhi shikeulo panonguno pukhubekile moveke, ike ino panongu jukutomoveke, ipi Ampeu no pi:

¹⁰ Ampeu no pi, Tipa tsalaqo thikhauno ino Israil kibolomi sasu puloshoqhi hipau shi nani, Ino iyezah pesu panongu kukumsulo sutsu nani, Ino tipau panongu mlolo yepukutsu nani, Ino panongu Lhou shive nani, Eno panonguye iwu timi shive nani.

¹¹ Eno panongu lakhi nomu pano kusau vilo, momu pano likhi pano timi vilo, ‘Ampeu ithilo’ ipi shikakilemo nani. Kughengu panongu gholo akuamighiu lono iku akijeu akushuu kutolo kumtsuno ni ithi nani.

¹² Panonguno hekibide xine shikeu shou imlo ighiqhiyikeu anani, Eno niye panongu xineqo khilemu kihikula tsumove nani.”

¹³ Puloshoqhi akitheulo pikeuno, Alhou no puloshoqhi atughiu pesu adou shivetsuke; eno kiu kiu namu adou shiveno aqa shivekeuye payi hauve nanike.