IBRIMI 7 - BAIBEL (BSI)

Achineu Milkhizedek

¹ Melkhizedek hipauye Salem phughilo akukauke eno Alhou wu Akiqheu Achineuke. Abraham no aghulau puzu kukami ghiqhiveno wochekelo Melkhizedek no pa sasu kusho eno pa kumghatsu,

² tileno Abraham no pano aghu lepughikeqo gholono saje chighilo lakhi pe pa tsu. Melkhizedek je akiqi atughiuye “amikucho kukau,” eno paye Salem lo ghi akukau, tipau kiqiye “Iquighayikeu kukau.”

³ Melkhizedek ye apuaza kuha, alagha kughuko kuha, pa kuxu shekha momu pa kuxu bothu eno pa kuxu shekha kuhae. Ikemu Paye Alhou Nu kimihike, paye alhokupuju ghenguno achineu lakhike.

⁴ Timi hipauye kiutoi kijekeno kumsukutojulo! Asu Abraham no aghu lepughikeqo gholono saje chighilo lakhi pesu pa tsue.

⁵ Eno Levi laghami khunoqono achinemi keno Israilmi launo saje chighilo lakhi qhalu peni keushi Ayezahlo ahza tsupuani; ike tiye, pano wu timiqoye Abraham laghami keghi.

⁶ Melkhizedek ye Levi laghami kumokemu, Alhou no piqhi puakeu ithukuluu Abraham launo pano saje chighilo lakhi qhalue eno pa kumghatsue.

⁷ Tishiaye, kukumgha tsuakeu timi huye kukumgha ithulu akeu timi nguno akijeu kepi ithithaivae.

⁸ Judami achinemiye thiveni kuami shianamu saje chighilo lakhi qhalucheke ikemu Melkhizedek ye xu acheni kepi kuchoyesulo pike eno pano saje chighilo lakhi qhalue.

⁹ Eno pinikeuloye, saje chighilo lakhi ithulu chekeu Levi hughi Abraham gholono saje chighilo lakhi pesu tsuvae.

¹⁰ Kughengu kughou Melkhizedek no Abraham sasu kusho keno Levi ye punu mphike tishie pinamu pasu philo acheke.

¹¹ Tishiaye Levi laghano shichekeu chine ghola vechewo kupukulu shilu cheni aye (kughengu tipau chine qholo akelono timiqono Ayezah ithulukeke), kushiniaye Aron gholauno ighikeu ipi pimo puzu Melkhizedek gholauno itaghi achineu kutau ipeghikepu avehupu shivepe kya?

¹² Kughengu kughono achine shichekeu kiliveni keno ayezah ghi kilivekepu shimasave cheni.

¹³ NiMpeu, khuu ghenguno hipaqo thime pipepuani keno paye kutami laghake, tipano laghaloye lakhimu akumlla kipti-alo mlapuamoe.

¹⁴ NiMpeu ye mutsuqheyino Juda laghamike; eno Muse no achinemi vehu pipuakeulo paye hipano lagha jekupe puamoe.

Melkhizedek kimihi Achineu kutau

¹⁵ Hipau vehu itaghi mutsuqheyi kitheve nikeu hitoi ani: achineu kutau lakhi Melkhizedek kimihi shighi ipeghivae.

¹⁶ Paye timino shikeu yezah ngo bekuthaqono pa pesu achineu lakhi shitsuke kumoe, ikemu kutsavemla keu kuxu kuka vechewo achineu shilue.

¹⁷ Kughengu pa ghenguno hitoi ashepe shipuani: “Noye Melhizedek no shikeughola lono alhokupuju ghenguno achineu lakhike.”

¹⁸ Puzuu ahza tsukeu huye miqemileyi eno avehupu kuhake ghenguno qhivae.

¹⁹ Kughengu Ayezahno kiumu kupukulu shitsupe puamoe. Ikemu itehiye lajupu akiviu sailoghivae, tipau vechewo ninguno Alhou kupunu ighilu cheni.

²⁰ Hiye Alhou shoqhi supepuanike. Kutamino achinemi shilukeulo tikithipu ashoqhi sumono shipe puani,

²¹ ikemu Jisu ye Alhou no ishi ashoqhi shikeu vechewo achineu lakhi shilue: “Ampeu no ashoqhi lakhi shivae, Eno pa kukumsu kilivemo nani; ‘Noye alhokupuju ghenguno achineu lakhike.’ ”

²² Kutuqukeu hipauno Jisu pelo akiviu puloshoqhi pepimhekutsuu shiveapeke.

²³ Kutuqukeu kutau ghi ani, ike tiye: achinemi kutamiye kutomoke, kughengu panonguno akumla mula achekeu lono akithino panongu vekhave cheke;

²⁴ ikemu Jisu ye alhokupuju xu acheni eno pano achine kumla shikeuye kutami lau pekishetsumlae.

²⁵ Ikehu, khunono pa vechesu Alhou lau ighini keno, paye tipaqo itehi ghi eno pulhapujulo xakulupu shilu anie, kughengu panoqo ghenguno Alhou vilo qhuiniju tsunike paye alhokupuju xu acheni.

²⁶ Tishiaye, achinetou tikithipuno nino avehupu shiakeulo achipi shianike! Paye akimthe; tichetighepu kuha; tukutiye kiumu kuha; axinepu timiqo launo pakutashi pesu qhi eno atsutsu nguno kunguu ikhiqhe pukue.

²⁷ Paye achinemi kutami toimoke. Paye atsala kipetsu pa likhi pa xine ghenguno eno tipathiuno timiqo ghenguno lhoxu heqhi pesu Alhou lau akumllagho tsukepu avehupu kuhae. Kughou pano pa likhi pa mpi ikhiphepe tsukeno tileno ghuthu khavino alhokupuju ghenguno hipau shivae.

²⁸ Muse yezah no miqemileyikemi pelo achinetomi shipenikeu susu cheni; ikemu Alhou shoqhitsa, ti ayezah thiuno ighikeu huno kupukulu Anu hu alhokupuju ghenguno susulue.