IBRIMI 6 - BAIBEL (BSI)

Ikiqive nikeu Kumsapu

¹ Tishiaye khristomino pepimhe chekeu atughilo kukutsu nguno alau ninguye tekhoyikeu kukutsu kudau azuu hawoni nolo eno axine lono xakide ighi puzu Alhou pululukeu,

² baptiz shilu keu, a-u kukumgha betsukeu, kithimi xuputhukeu eno lhokta kutolo kughatha bevekeu vehu ishi pesu itaghi aboqha qhakithe akepu kumoe.

³ Ikemu Alhou no alepikepu shiaghi aye ninguno hipau shia nani.

⁴ Kishipuzu khunoqono ikiqisu wuvenikeno tipaqo sachilesawo itaghi akuxu xaide ighilu nani kya? Khunoqono ghuthu lakhi Alhou kuvulo ache, kungughagho micheve, Aghungu Kimthe gho ithuluve,

⁵ Alhou tsaye akivi kepi micheluve eno ighiniye akeu yeghi kuka ithiveno

⁶ ikiqive aye, panonguno itaghi Alhou Nu kros lo yeda kithe ani eno aqha zulono ikhiphepe pa shikukujo anike ghenguno timi tipaqo sachilesaghi puzu akuxu xukidelu nikeuye kushokutsu puke.

⁷ Khipau yeghi shou tsutsughu ghuqhi puku cheni keno tipauye Alhou no kumghatsu cheni, tipau pelo tsutsughu yitsu ilolupe puzu asutsuni thu ipeghilupe cheni eno khuno ghenguno tipalu chinikeno tipaqo vehupu shilu chenipeke.

⁸ Ikemu tipaulo asahu ngo alupi thuipeghiaye tiye ame kuhae; eno ghushove peno amino pitive nani.

⁹ Ikemu nino hikithipu pianamu kimiyechekeqo, nongu sheloye xakulupu gholo nongu kukumghapu akiviu anike.

¹⁰ Alhou ye amikuchoke ghenguno nonguno mla akeu pa jelono pawu timiqo lau kikimiye pephepiye puakeu eno itehi kutolo titoi shiakeu paye kumsumavemo nani.

¹¹ Nino kumsupulo akeuye nongu lakhi khino ashekha kutolo azukinishi apenishi ani, tishianguno nonguno laju achekeu hu kumtsu mutsuqheyi shilupenike.

¹² Nonguye khilemu kughuchove kepu kumoe ikemu khunoqono akupulu eno kheakulu shikeu vechewo Alhou no piqhipuakeu mheghi iyighilu keno tipaqo kimihi shipenishi ani.

Alhou no Piqhipuakeu Kuchou

¹³ Kughou Alhou no Abraham vilo atsapiqhi keno, pano piqhipua keu tsa shikupunike ashoqhi lakhi shie. Ike pa likhi pa nguno akijeu kuhakehu pa likhi pa je kuno ashoqhi ishi shike.

¹⁴ “Kuchokuchono ino piqhi ani ike, ino okumghatsuni eno olagha kutomo kughukotsuni.”

¹⁵ Ike Abraham ye kutuuno kheakulushi puzu Alhou no piqhive keu hu ithuluke.

¹⁶ Timino tushoqhini kelo pa likhi pa nguno kutami akijeu jekuno ashoqhi shi cheni eno timi dolo kutsala keu kumtsulo ashoqhino xakutha ashekhau shi cheni.

¹⁷ Khunoqono Alhou ye khilemu kilive chemokepi ikhilu keno panoqo lau pano ashoqhi lakhi pe kuphatsue.

¹⁸ Tishiaye thime hikumaye kilivemlake eno hipaulo Alhou ye khilemu akimiki shiaghivemla nanike. Ikehu ningu khunoqono susholu peniye poluve akeno ninguye nizulo lajupu qhitsu keu mutotoi tsuqulu peniye shishe shikumtovae.

¹⁹ Lajupu hipauye ithamo keu eno iqemo keu pufulukepu-kuba toi nilolo anie. Hipau lajupuno kungugha chinekilo nhaqhi phi vechesu akimthechebo aloulo wu cheni.

²⁰ Jisu no nizuuno nizuqhushi tilehi ilovae. Pano Melkhizedek no shikeu ghola lono alhokupuju ghenguno achinetou shiluvae.