IBRIMI 5 - BAIBEL (BSI)

¹ Kughengu achinetouye timi gholono kishephe puzu timiqo zuqhushi axine ghenguno akumllagho ngo lhoxu heqhipe mllakeu pesu Alhou zulo pewu cheni.

² Achinetou ghi ala kutomolo tomo-chhimokeu akehu, paye ayekumthami ngo alavezuvekemi lau mutshaivukeu lono peitha cheni.

³ Pa ghi tomo-chhimokeu akehu, pa likhi pa xine ghenguno eno timiqo xine ghengu ghi ishi lhoxu heqhipe Alhou lau aghashi masave cheni.

⁴ Timi khunomu achinetou shinike alikhi ampino kishephelu chemoe, ikemu Aron toi timi tipauye Alhou no kuluve cheni.

⁵ Titoi, Khristo ye pa pelo achinetou shipeniye pa likhi pa sunheqheke kumoe, ikemu pa susukeu Alhou no ishi pa vilo pi, “Noye Inuke; Ishitsala lono ino oPu shiluvae.”

⁶ Pano a-a kutaulo ghi ishi pipuani, “Noye Melkhizedek no shikeughola lono Alhokupuju ghenguno achineu lakhike.”

⁷ Jisu no ayeghilo xuachekelo aghugha kuloghi eno anhezu piji puzu pa kighini pesu akithi lono pa xakulupu shiakeu, Alhou vilo inikhu cheke eno pano Alhou sukumsa akeu ghenguno pa kighini ikhilutsue.

⁸ Ikemu paye Alhou Nu shianamu pa ghime vechewo aghokulu shinikeu pano shikalu.

⁹ Pa pelo kupukuluu shiluvepe puzu paye pa gholu kemi kumtsu ghenguno alhokupujulo xakulupu pukishiluveno

¹⁰ Melkhizedek no shikeughola lono achinetou lakhi shipenike Alhou no pivetsu.

Ikiqi pemonike Ghutu

¹¹ Hipau vehu ninguye kutomo pikepushi aphi, ikemu chixechilei pinikeu sho ani, kughengu nonguye qei-nai puzu ithikuthuni chemoe.

¹² Itehi nonguye akukutsumi shiluve aghikepu kelauye kutami pelo itaghi Alhou tsape pepimhetughiuqo pesu nongu vilo pikepu avehupu shiaphike. Nonguye mukamughayi keu chuqupu chunike zuqhulo akichhizu yekepu shiaphie.

¹³ Khunoqono akichhizu yechephi keno angakughunu shiaphike eno achipi vehu ngo achipikumo vehulo puju-shijukeu kuha aphike.

¹⁴ Akumka chuqupuye kichimi ghenguno ke, ike tiye pano wu michikulupu kighithi qophethi puzu ti peithano akivi ngo alhoksa kututa shithikemiqoke.