IBRIMI 4 - BAIBEL (BSI)

Alhou Lokughuno Tushokiqhi.

¹ Tighenguno Alhou lokughunolo ilokulupu shi aphi kepi piqhi puani. Ike alokughuno alo iloni keulo milakhinomu ikiqive nosake ninguye musa ani nolo.

² Kughengu ningughi panoqo toi Atsakiviu chiluveake. Panonguye atsape tipau chilu ikemu tiye panoqo kivipu shimlaveke, kughengu panonguno tipau chilu kelo akupulu supuzu tipau ikhilumoveke.

³ Tishiaye ningu khunoqono pulu ani keno Alhou no khikhi alokughuno piqhipuani keno tipau ithulu cheni. Tiye pano piveketoi; “Ino amlo shimove eno ashoqhi lakhi shive: ‘Panonguye khilemu ilokughuno alo iloghimla nani.’ ” Ayeghiqha lhophe kelono pa kumla shikhave keghi pano hipau pike.

⁴ Kughengu kuchoyesu hamilo pano atsala akutsuniu vehu ishi pipuani, “Atsala akutsuniulo Alhou no pa kumla kumtsu shitaveno akulhoqhike.”

⁵ Tipau vehu itaghi ishi pipuani, “Panonguye khilemu ilokughuno alo iloghimla nani.”

⁶ Khunoqono puzuuno Atsakiviu chilukeno pulumokeu ghenguno Alhou lokughuno alo ilomlaveke. Tishiepimu kutami khamiye tipaulo ilolupe eno aloino lupeke.

⁷ Hiye tishiputsa kepi mutsuqheyi shilu akeuye Alhou no atsala kutau “Ishi tsala” qhipuani. Kuchoyesu tsa tipivekeu huye ampe kutomo thiuno David vechewo Alhou no pike. “Ishi tsalalo nonguno Alhou sutsa chilukeulo, Nongu mlo shikumka kevilo.”

⁸ Kughengu Joshua no timiqo sakipheu shino alokughuno tsulu aye, Alhou ye hithiu atsala kutau vehu pimonicheke.

⁹ Tishi aye, Akimthemi ghenguno Alhou no atsala akutsuniulo aloinokeu kimihi akulhokiqhi lakhi achephike.

¹⁰ Tighenguno khunono Alhou lokughuno lo iloluni keno, Alhou no pa kumla shitaveno akulhoqhi kehutoi timi tipau ghi pano ime mlachekeu launo akulhoqhilu nani.

¹¹ Tighenguno ninguye pukaputsa puzu alokughuno tipaulo iloni nolo, eno ningu gholo milakhimu panongu toi agholumokeu shiveno ilomlave nosake.

¹² Kughengu Alhou tsaye akuxu eno akuka kuau,putoputo zutakihi nguno akutsughauke. Hino angulho ngo angugha kikimea kutolo eno aquki-anhuki kikime kutolo ghitha ilo cheni. Hino timi mlolo kumsupu akeu ngo shinishi keu jupililu cheni.

¹³ Alhou zuloye lhophepua keu kiumu kusuvemlae, ikemu thwokha pa zuloye nhamono thebei ithulu ani; eno pa lau ningu kumtsu kihikulayi pesu tsu nani.

Jisu Achinetou Akijeu

¹⁴ Tishiaye ninguno pikiphe shichekeu kupulu hu mutotoi tsuqupe ani nolo, kughengu ningu chinetou kije lakhi ani, Alhou Nu Jisu ke, paye kungughalo wuvae.

¹⁵ Ningu chinetouye nino tomochhimo keulo amlo imekuqha tsumla keu kumoe, ni chinetouye alaghi thwokha lono ningu ghukeju cheketoi pa ghujupe puani, ikemu paye axine shipuamoe.

¹⁶ Tishiaye, ninguno amlo kuloghi shipuzu Alhou kuka lakhu khilehi kupukini ani keno tipa-alo kupunu wuni nolo. Tileno ninguno avehupu shikutu akelo ningu kuphulu kepushi Alhou kikimiye ithulu eno paw kupukini phulu nani.