IBRIMI 3 - BAIBEL (BSI)

Jisu ye Muse nguno Akijeu

¹ Tighenguno athikuzumi akimthemiqo, khunoqo Alhou no kuluve akeno nikupulu pepimhe chekeulo Apostol eno Achinetou Jisu hu jukutolo.

² Alhou kilo Muse no pa kumlalo pukhubekulushi shiluke toi Alhou no Jisu pelo hipau kumla shipekeulo paye pukhubekulushi shike.

³ Aki kishiuno aki shipuakeu nguno gihukuzupu alau ithuluke toi Jisu ye Muse nguno akimthe jekipi alau ithulukuzupue.

⁴ Aki shipuakeu kumtsu timi khamino shipuanike, ikemu thwokha jeli shipe puakeuye Alhou noke.

⁵ Ike Muse ye aqemi lakhi kehu Alhou kilo pukhubekulu shike, eno Alhou no ighinikeulo kiu piniye akeno tipau shepe shitsuke;

⁶ Khristo ye anu kehu Alhou kilo pukhubekulu shike. Ninguno ithamono mutotoi akeu tsuqupe eno ningu wu lajupulo amlo kuloghishi aye, ninguye Alhou kike.

Alhou Pulumokemi Kutughu

⁷ Tighenguno kuchoyesulo pikeu toi: “Ishi tsalalo, nonguno Alhou sutsa chilukeulo,

⁸ Nonguno pa hebideve kelo toi, Timi kughunamoke-alo nonguno pa ghukeju kelo toi Nongu mlo shikumka kevilo.

⁹ Ampe lhobidi kutolo ino kiu shikeno panonguno ithulu keghi nopu- asu qono tilano ighukejuke, ipi Alhou no pike.

¹⁰ Tighenguno niye timi tipaqo shou imlo shimove, Ikehu ino ishi pike, ‘Panonguye panongu mlolo pulhapuju akumolau wuve cheni; Panonguye khilemu ilaghi mthae.’

¹¹ Ino amlo shimoveno ishi tushoqhive: ‘Panonguye khilemu ilokughuno alo iloghimla nani.’ ”

¹² Ithikuzumiqo, kutokupuyilo, kutou nongu gholo milakhi nomu amlo lhoksa eno pulumlakeu mlo xapu aghipuzu xuakeu Lhou launo ikiqivenosake.

¹³ Ikemu kuchoyesulo “Ishi tsala” ipiake kutolo nonguye tsalakipetsulo lakhino lakhi shikumtolo, tishianguno axineno nongu lakhimu pishiqhive pemonike eno amlo mukamughaive pemonike.

¹⁴ Kughengu ninguno abothulo amlolo mutotoi akeuhu ashekha kutolo ithamono tsuqupe a-aye ninguye kumtsu Khristo gholo kuloji- kemike.

¹⁵ Kuchoyesulo ishi pipuani: “Ishi tsalalo nonguno Alhou sutsa chilukeulo, Nonguno pahebideve kelo toi, Nongu mlo shikumka kevilo.”

¹⁶ Alhou sutsa chiluve keghi pa hebidevekemiqo huye khunoqo kya? Timi tipaqoye Muse no sakipheu shipuzu Ijip yeghi lono sasu ipeghi kemiqoke.

¹⁷ Eno Alhou ye khunoqo shou ampe lhobidi amlo shimove kya? Tiye khunoqono axine shivekeno tipaqo lau amlo shimoveke, asayeqha lono panonguye ikiqi thikhaveke.

¹⁸ Eno Alhou ye khunoqo vilo, “Panonguye khilemu ilokughuno alo iloghimla nani” ipi tushoqhive kya? Khunoqono hebidekeno tipaqo shou pano pike.

¹⁹ Ike ninguno ithulu anike panonguno tipaulo ilomlavekeuye pulumoke ghengunoke.