IBRIMI 13 - BAIBEL (BSI)

Alhou pulou Shilunikeu

¹ Khristo lono nongu lakhino lakhi kimiyekile chelo.

² Nongu kilo inami sasuthi nikeu kughucho kevilo, kughengu tishikeu lono muthapuzu kungumi sasu puaghiluvi.

³ Akughumiqo gholo nongu ghi akughushi akeshi panoqo kumsululo; no ampino shilusa akeshi aghime shiakeqo kumsululo.

⁴ Timi kumtsuno kulakupu gihukepu shilo; eno akimi anipu dolo pukhukile kulupu shilo; kughengu kiptimi totimi dolo mithemokemi eno kutuqha chekemi shou Alhou no kughathabe nani.

⁵ Pisa kimine lono okuxu putosuluvelo eno nono aghikeulo ogakiqishilo. Kughengu Alhou no ishi pipuani, “Niye khilemu oqhivemo nani, niye khilemu ophevemo nani.”

⁶ Ikehu ninguno amlo kumtoshi pilu nani, “Ampeu ye ikukuphu-u, q 1 Niye msavemo nani; Timino ilau kiu shiluni kya?”

⁷ Nongu sakiphemi khunoqono nongu vilo Alhou tsape shichekeno tipaqo kumsululo. Panoqoye kishi xuche puzu thivekeno kumsululo; eno panoqo kupulu halo.

⁸ Jisu Khristo ye ighi, ishi eno alhokupujulo aphiphike.

⁹ Kutau jeli kukutsu ngo muzamughaleyi keu kukutsu pelo muzuchoikeu la lono nongu sawuvepe kevilo, kughengu achuqupu-yeh papekeu lono kumo puzu Alhouw kupukinino ningu mlo shikumtolu kepu anike; khunono ayeh tipaqo pape chenikeno panoqo kuphulu chenike kumoe.

¹⁰ Judami chine phikilo mlaitha chekemiye ni kumllagho pitikeu-alo chukepu achipi kumoe.

¹¹ Judami chinetouno lhoxujih pesu axine ghenguno aghashikeu kumllagho tsunike shishe Akimthe-alo sailoghi cheni; ikemu lhoxu kumoye kughunachekeu-a nguno khalauno pitive cheni.

¹² Ikehu Jisu ghi aphughi liwo nguno khalauno pithiveke, tiye pa likhi pa ji pesu axine lono timiqo shikimthe niyeke.

¹³ Tighenguno ninguye kughunachekeua nguno khalau pa lau wuni eno pa jukunatha keu kusajeni nolo.

¹⁴ Kughengu ningu ghenguno ayeghiloye haumokepu phughi kuhae; ninguye ighinikuau phughi phu cheni.

¹⁵ Tishiaye, Jisu vechewo ninguno pulhapuju sheqhekeu pesu Alhou lau akumllagho shighi mllani nolo; ike tiye, ningu kichi lono pulhapuju pa je shikimthi ani nolo.

¹⁶ Akivipu shinikeu kughucho kevilo eno nonguno aghikeu kusajekilelo, kughengu akumllagho hipaqono Alhou lokiqipu shilu cheni.

¹⁷ Nongu sakiphemi gholulo eno panoqono pikeu qhoqhulo. Panongu kumla Alhou lau kihikulayi tsu nani kehu panonguye tamo puzu nongu kuxu jukutotsu achenike. Ikehu panongu pelo amlo saqhiyimono aloviqhiyi pano kumla shipelo, kughengu tishimoaye nongu vehupu kiumu shimlave nani.

¹⁸ Nighenguno inikhutsu alo, Nimlolo kiumu susushikeu kuhakepi ninguno mutsuqheyi shilu ani, kughengu ado kumtsulo kiuno achipi keno tipau shinishiqhiyi achenike.

¹⁹ Nonguye amlo tsuqhiyi hipau alau shipenike ino nongu qhuiniju ani, tishianguno ipelo nongu lau keyi ideighilupenike.

Akighini

²⁰ Itehiye alokughunopu Lhou, khuno niMpeu Jisu akithi lono xuputhuvekeno, pa ji pesu lhokta kutolo puloshoqhi mekhatsukeu bheriqo wu Akheu Akijeu;

²¹ pa pelo thwokha kivi jeli pesu nongu tsupuzu pa pulou shilupeniu, eno pano Jisu Khristo vechewo pa lokiqipushi nilolo shilupeniu; alhokupuju lono alhokupuju ghenguno pa lau akimthejekipi achepelo! Amen.

Kishekha Tsa

²² Athikuzumiqo, ino shikumtokile keu tsa hipau tsuakeu tsaqui initsulopi ino nongu qhuiniju ani, kughengu niye ikhonhei shighi nongu lau yepuwu anike.

²³ Nithikuzuu Timothi ye akughu lono ipeghive keu nongu pelo ithive penishi ani. Pano keyi ighi aye igholo pa sasu ighi puzu niye nongu sasu kusholuni cheni.

²⁴ Nowu sakiphemi ngo Alhou wu timiqo kumtsu lau niwu petha tsuani. Itilimi athikuzumiqono petha nongu tsupuwu ani.

²⁵ Alhou wu kupukini nongu kumtsu gholo achepeniu,Amen.