IBRIMI 11 - BAIBEL (BSI)

Akupulu

¹ Akupuluye ninguno laju achekeu mutsuqheyi shilukeuke, ninguno ithumlano achekeu thime aniputsakepi mutsumisheyi shilu keuke.

² Khaghilomi kichimiqoye pano kupulu ghenguno Alhou ye pano shou amlo kiqipu shiluche.

³ Akupulu lono tsutsu yeghiye Alhou tsano lhophe kepi ninguno ithi kuthulu cheni, tishi kehu kiu ithulu anikeno tipaqoye kumu kuhakeu lono mlaphepuanike.

⁴ Akupulu lono Abel ye Kain nguno akiviushi Alhou no ikhikulupu lhoxu heqhipe mllakeu lakhi shilue, eno pa kupulu vechewo paye amikuchomi kepi Alhou no ikhilukepu shilue, kughengu Alhou ampino pa kumllagho ikhilukeu shepe shitsuke. Abel ye thive pinamu pa kupulu vechewo itehi ghi piacheni.

⁵ Akupulu lono Enok ye thive pemoniaye Alhou no kunguu saikuve; ikehu khunomu pa phumlave kughengu Alhou no kunguu pa saikuveke. Pa saikuve mphi lono paye Alhou mlo kiqipu shiche kepi pa shepe tsupe puani.

⁶ Akupulu kuhakeloye timi khumu Alhou mlo kiqipu shi mlae. Kughengu khunono Alhou lau ighini keno paye Alhou acheni eno pa phusu ighikemiqo pano asaxu tsuchenikepi akupulu aghimasae.

⁷ Akupulu lono Noha ye ighinikeulo kiushini chekeno pano ithumlano akemu Alhou no pa kutughukeu chilu puzu aghokulushi ashukaki lakhi shipeqhi eno pa ngo pa kibolomiqo xakulupu shilue. Hipau lono pano ayeghiqhami kuchopu akipimi shivetsu eno akupulu vechewo amikucho shiluche keu mheghi ithulukemi shilue.

⁸ Akupulu lono Abraham ye Alhou no pa kukelo aghokulu shike, eno Alhou no pa tsunikeushi piqhipuakeu ghakhulo wuke. Paye khilau wucheni keno mthakemu pano yeghi bocho qhiveno wuveke.

⁹ Akupulu lono paye inami ghakhulo achekeshi Alhou no pa tsunikeushi piqhipuakeu yeghilo ache. Alhou no piqhipuakeu mheghi pa gholono kumtsa ithulukemi Isak ngo Jakob pama sasu aphikilo ache.

¹⁰ Kughengu Abraham ye Alhou no kughuphe eno shipeqhi keu phughi, khipau boqhano mutotoi keno tipau phughi kheju ache.

¹¹ Akupulu lono Sara ye li philo timi kuxu kuhave kethiu pinamu mishilukepu kuka ithuluke, kughengu lino Alhou ye pano piqhipuakeu shikupu chenikepi pukhubeke.

¹² Ike liye thiveke kumlho shivekemu, timi lakhi hipau launo atsutsulo ayepuqo ngo azughi mukulo asayeh toi ati-anuli kughukolue.

¹³ Akupulu lono timi hipaqo kumtsu thivae. Panonguye Alhou no piqhipuakeu ithumla ikemu putouno pishipuwo tipaqo ithuluno ikhilukileve, panonguye ayeghilo inami, kupokichemi eno haphevekemi kepi ithipuqaive cheke.

¹⁴ Timi khunoqono hipaqo vehu picheni keno panonguye pano yeghi lakhi phucheni kepi mutsuqheyi shivetsue.

¹⁵ Panonguye panono qhiveno wuvekeu yeghi kumsu ake aye panonguye tilau idewove kepu dokivi ghi ithulu acheke.

¹⁶ Tishinike zuqhulo, panonguye ayeghi akiviu, ti kungughalo akeu kumsukutu cheke. Tighenguno panonguno Alhou ye pano Lhou kepi pikeulo Alhou ye kujomzavemoe kughengu panoqo ghenguno pano aphughi lakhi kutopuanike.

¹⁷ Alhou no Abraham pejukelo, pano akupulu lono panu Isak pesu Alhou mllae.

¹⁸ Alhou no Abraham vilo Isak ghenguno piqhi puakeuno, “Isak vechewo oti-anuli kughukolu nani” ipi puakeghi paye pa nu tilikhi akeu heqhipe Alhou mllanike kutoveke.

¹⁹ Alhou ye akithi lono Isak xuputhuve kepu kuka anikepi Abraham no kiqiluve, eno kimighijuniaye, Abraham ye akithi lono Isak ithuluchile ke.

²⁰ Akupulu lono Isak ye asheazushi Jakob ngo Esao pama lau kukumgha piqhitsuke.

²¹ Akupulu lono Jakob ye pano thive nicheke zulo Josef nuli lakhi khi shou kumghatsu, paye pa kussu kutuchope puzu Alhou lau inikhuke.

²² Akupulu lono Josef ye pa kuxu ashekha shivenike kupunuvekelo Israilmi Ijip yeghi qhiveno wulunikeu tsa pitsuke eno pa saghi pesu kishimasa keno piputotsu.

²³ Akupulu lono Muse ye pa punu kelo papu azano aqhi kuthu kutolo pa pekusu. Anuye jukivipushi panonguno ithuluke ghenguno panonguno panonguye akukauno ahza tsukeu hebideve nikeu msamoe.

²⁴ Akupulu lono Muse ye kughou kichimi shi thuwuve keno Farao nga nu kepi kupenikeu mopive.

²⁵ Paye axinelo ado ikhonhei aghakiqipu shinikeu zuqhulo Alhou wu timiqo gholo shilusakeu pavi kumsuluve.

²⁶ Mesiya ghenguno timino pa peitha pusakeulo Ijip yeghilo kua-kini kumtsu nguno amekushou shi kihiluve; kughengu paye ighinikeulo asaxu akeu shou jupuku acheke.

²⁷ Akupulu lono paye akukau mlo kighide msamono Ijip yeghi qhiveno wuve; paye ithumlakeu Lhou ithulu akeshi igho ideghive moe.

²⁸ Akupulu lono paye Hechekulu Ghulhu shitsu eno ahji pesu ahukikhalo kuzute pukupe, tishianguno Akithi Ghahwu pelo Israilmi nuanoghiu pithivetsu pemoniyeke.

²⁹ Akupulu lono Israilmiye ayeghi qhayike shou wuke toi Akuhu Zughi hechesu wulupeke; ikemu Ijipmino titoi shiju kelauye azuno panoqo putsuqhive.

³⁰ Akupulu lono Israilmino ghulo tsuni Jeriko phughi vehomuxa kelauye aliwo tupi hu iluqive.

³¹ Akupulu lono asalhau Rahab ye Alhou hebide chekemi gholono thimo kepu shilue kughengu lino Israilmi pukujumi shompami toi sasuke.

³² Niye alaughi kiu pinia? Gideon, Barak, Samson, Jafta, David, Samuel eno tungkupmiqo ghili piakepushi anamu ighenguno adono kuhae.

³³ Akupulu vechewo panoqoye akukaqha lelue, achipiu xakutha peithatsue eno Alhou no piqhipuakeu kuchou kepi phulu, abongushuu baxa lakhalue,

³⁴ ami kuyiqu pinhelue, ghiqhi pithivekepu lono polue. Panonguye qeinayive kelomu mutotoilue; aghushilo akumtoshi shilue eno inaghauno ighikemi aghumi halepuwulue.

³⁵ Akupulu vechewo kithimi xuchile puthuvetsukeu totimiqo pelo ithulupe. Khamiye akuxu akiviulo xuputhu peniaye, kuqhopheve nikeu ghi milive puzu panoqo shikighime qhipeke.

³⁶ Khamiye ghushoqhi eno heqhi buqhie, tshuluve eno akughu shipeke.

³⁷ Atu pesu panongu veqhike, panongu xaphokini shiveke, panongu ghiqhi pithike; panonguye bheriyiko aneyiko pepusu iqhoiqike, aquaghake, shikighime qhike eno peitha pusake,

³⁸ panoqo ghenguye ayeghiqhaye amekuapu kumoe. Panonguye kupokichemi toi timi kughunamoke-alo, atolo, atukilo eno ayeghi kichepilo itsu itshucheke.

³⁹ Ike hipaqo kumtsu, panoqo kupuluno panonguye amikucho kepi pitsu anamu Alhou no piqhipuakeu ithumlaveke,

⁴⁰ kughengu Alhou no ningu ghenguno kiukela akiviu jupe pughu puakehue, ike ningu sumokeloye panongu likhino tipau kupukhave pemo niyeke.