IBRIMI 10 - BAIBEL (BSI)

Khristo Ghakishi

¹ Judami yezah ye mutsuqheyi no thime kuchou akeqo sasu aphiphi kumoe. Hiye thime kivi ighiniye kuto akeu julhoke. Ampe atsutsu ishwokibe aphiphishi lhoxu heqhipe mllache keuye Alhou lau kupunu ighikemiqo pesu khilemu viwotolu keu shipemlae.

² Alhou mllakemiqo xine ghuthu khavino shikimtheve tsu keaye, panonguye axine shipuakeu khilemu kumsupu moveni cheke eno lhoxu heqhipe mllakeu kumtsu qhive nicheke.

³ Ike tikekumo puzu, ampe ampelo lhoxu heqhipe mllakeuno timiqo pelo pututa xine kumsujukithe peke.

⁴ Kughengu amshitsu jih ngo ane jihye khilemu axine ikhisuwuve tsumlae.

⁵ Tishike ghenguno, Khristo no ayeghiqhalo iloghi nichekelo pano Alhou vilo ishipi: “Noye lhoxu heqhipe aghashikeu eno mllakeulo aghaqi chemoe, Ikemu ighenguno nono aphimpi lakhi kutope qhitsuke.

⁶ Noye lhoxu akuchopu piti pesu omlla keulo, momu axine ghenguno pesu omlla keulo alovive chemoe.

⁷ Tileno ino ishipi, ‘O Alhou, Ayezah likukuzukakulo ighenguno kiu yehpe puani keno titoi opulou shinike, ni hi anie.’ ”

⁸ Pano atughushi ishipi, “Noye lhoxu heqhipe aghashikeu eno ikhiphepe mllakeu ngo lhoxu kuchopu piti pesu omllakeu eno axine ghenguno ikhiphepe omllakeulo aghakiqi shichemo momu alovive chemoe.” Aghashi keu jeli hipaqo kumtsu Ayezah kiqi lono shipe puanike.

⁹ Tipa shelo akiniuno pano, “O Alhou, opulou shinike ni hi anie” ipike. Aghashichekeu atughiuqo kumtsu Alhou no ikhive puzu tipaqo alo Khristo no aghashikeu pesu qhianike.

¹⁰ Pano Alhou pulou shike eno pano ghuthu khavino pulhapuju ghenguno pa phimpi pesu mllavekeuno axine launo ningu shikimthe pesu pa huthupe nikeu shitsue.

¹¹ Judami achinemino tsalakipetsu puthughono pa kumlapu shi acheni eno lhoxu heqhipe mllakeu hipaphi likhi pesu anguno anguno mlla acheni, ikemu tipaqoye khilemu axineqo ikhisuwuve tsumlae.

¹² Ikemu Khristo no axine ghenguno ghuthu lakhi aghashivekeu huye alhokupuju ghengunoke, eno tishive puzu pano Alhou u-ajeu iqave.

¹³ Itehi paye Alhou no pa ghumiqo pesu pa pukhu kinepu shitsumoke kutolo tilehino ngokhe ani,

¹⁴ Tishiaye, pano ghuthu lakhi aghashikeu huno axine launo shikimthe pesu pa huthu peniye qhikemiqo alhokupuju ghenguno kupukulu shivetsue.

¹⁵ Kughengu Aghungu Kimthe ghi ashepe hitoi nitsuke. Pano atughushi pikeuno,

¹⁶ “Ampeu no ishipi, Tipa tsalaqo thikhau ino panoqo sasu, Puloshoqhi hipau shi nani; Ino iyezah pesu panongu mlolo sutsu nani, Eno ino tipau panongu kukumsulo yepukutsu nani.”

¹⁷ Tipa shelo pano ishipi, “Ino panongu xine eno hekibide kumlaqo kumsumaqhoive tsu nani.”

¹⁸ Ike kughono hipaqo pevetsu akeno axine pevetsu peniye ikhiphepe mllakeu avehupu shimae.

Ningu Alhou Kupunu Ighini

¹⁹ Tighenguno athikuzumiqo, Ampeu Jisu no thivekeu jih lono Akimthe- A lo ilonikeu ningu mlo mutotoi anike.

²⁰ Pano nhaqhiphi, tiye pa phimpi vechewo ningu ghenguno ala kithe, akuxupu-la lakhi khaqhivetsuake,

²¹ eno Alhou ki shou ninguye achinemi akijeu lakhi anikehu

²² ninguno amlo-pu puzu mutsuqheyi keu kupulu shino alhoksa-lotsuh launo ningu mlo shikimtheve eno azu kimthe pesu ningu phi-ashi qhuveno Alhou lau kupununi nolo.

²³ Ninguye khilemu ithamo puzu ninguno kugha-kuptsa chekeu lajupu mutotoi tsuqupeni nolo, kughengu Alhou ye pano piqhikeu penani kepi ninguno pa pukhulu nani.

²⁴ Ninguye kisheno kimiyekileni eno akumla kivi shinikeno lakhino lakhi hakuthonike alokumsu shini nolo.

²⁵ Timi khami toi shimo puzu, ninguye kuho-kumqo chekeu kughuchovemoni nolo. Kughuchove nike zuqhulo, Ampeu Tsalaye kupunu wochekeu nonguno ithulu anikehu ningu alaushi lakhino lakhi shikumto ani nolo.

²⁶ Kughengu kuchou kighithi ithuluve puzu ninguno puthaputsano axine shiauveaye axine ikhisuwuve tsukepu aghashikeu kiumu khilemu kuhavae.

²⁷ Tipa zuqhulo, musa khokhoshi, kughathabe keu eno Alhou wu ami loghuno pa mujochilekemi kutsave nike wochekeu kheaniae.

²⁸ Timi khuno Muse yezah hebide nikeno, timi kini momu kuthuno paye pimiveakepi shikeu vechewo kiumu kimiyekeu shimono pithive cheke.

²⁹ Tishiaye, timi khuno Alhou Nu pesu aphimuqhu nikeno, pa shikimthekeu puloshoqhi jih shikuchhubeve nikeno eno Alhou wu kupukini Ghungu thaigha nikeno, timi tipauye shishe aghime lhoksa kiutoi ithulukepu shinani kela kumsujulo!

³⁰ Kughengu khuno, “Ino amukhulu nani, ino lochiletsu nani,” ipi pikeno eno itaghi khuno, “Ampeu no pawu timi shou kughatha nani,” ipi pikeno, tipau ninguno ithi ani.

³¹ Akuxupu Lhou ulo ikiqi ilolu keuye kumsakimishipu lakhike!

³² Ikemu wovekeu tsalaqolo Alhou wu akuvuno nongu shou yepuvuve kethiu nonguye kishivekeno kumsuchilejulo. Nonguno kutuu puzu aghimeshi shilukusa sasu kushoke.

³³ Khaniloye aqo zulono nongu thaigha eno peithapusake, khaniloye timino hitoi khunoqo peithapusa keno tipaqo sasu nonguno aghime kusajeke.

³⁴ Nonguno akughumi sasu imekuqhae eno kughono nongu wu tinhemgha kumtsu sukisheluvetsu keno nongu mlo hauvemono kutuuluveke, kughengu nonguye kuakini akiviu khikhino alhokupuju ache nani keno tipau achephikepi nonguno ithi akehue.

³⁵ Tighenguno nongu mlo kumto shichelo, tipauno ajume kije sughi chenike.

³⁶ Nonguno Alhou pulou shilu kepushi eno pano piqhipuakeu ithulu kepushi nonguye kutuu keu avehupu shiani.

³⁷ Ishi pikeu toi: “Hinguno ado kitila apuzu, Milakhi ighiniye akeuno ighi nani — Paye munuvemo nani.

³⁸ Iwu amikuchomiye akupulu lono xulu nani; Ikemu pano athiu tsughuchile wove aye niye pa shou ilokiqi kuhave nani.”

³⁹ Ninguye athiu tsughuchile woveno puhavekemi kumoe. Ninguye akupulu akemiqoke eno Alhou no ningu puxulukemiqoke.