IBRIMI 1 - BAIBEL (BSI)

Alhou Nu vechewo Piye

¹ Khaghi ghuloki loye Alhou no tungkupumi vechewo ajeli-ajeli lono ghuthu kutomo apu-asuqo vilo picheke.

² Ikemu itehi ashekhalau tsalaloye pano Anu lakhi vechewo ningu vilo pivae. Alhou no pa vechewo atsutsu ayeghi kumtsu lhoke eno pa pelo thwokhalo amheghi kiyighiu shitsuke.

³ Paye Alhou kimthejukuvu wu mulapuyi yebidekeuke, paye Alhou lhoaye sasu aphiphishi kimihi anike eno tsutsu yeghi thwokha kumtsu pa tsalo akuka akeu huno sukimepe anie. Timiqoye axine lono shikimthe kulupushi pano shivetsu kethiuye, paye kungughalo Akughushu Lhou uajeu iqae.

Anu ye Kungumi nguno Akijeu

⁴ Anuye kungumi nguno akijeu shilupeke, tiye Alhou no aje pa tsukeu huno kungumi je nguno akijeu kehue.

⁵ Kughengu Alhou ye khilemu pawu kungumi lakhi vilomu ishipi puamoe, “Noye iNu; Ishitsalano ino oPu shiluvae.” Momu kungumi khuvilomu ishi pimoe, “Ino paPu shive nani eno paye iNu shive nani.”

⁶ Ikemu kughou Alhou no pa Nu anoghiu ayeghiqhalo puwuniye akeno, pano highi ishi pipuani, “Alhou wu kungumi kumtsuno pa mllalo.”

⁷ Ikemu Alhou no kungumi pesu ishi pipuani: “Alhou no pawu kungumi pesu amulhu shitsu, pano pa ghinimi pesu ami mili shitsue.”

⁸ Tishiepimu, Anu ghenguye Alhou no ishi pike: “O Alhou, okuka-lakhuye alhokupuju ghenguno ache nani! Nono amikucho pesu okukaqhalo ayehpeke.

⁹ Noye achipishi keu kimiye eno achipi kumouye mithike, Tipau ghenguno Alhou oLhou no okisheluke; Eno okusami tsukeu nguno shishe gihukepu lokivi pesu otsuvae.”

¹⁰ Pano highi pipuani: “No Ampeu no abothu lono ayeghi lhopheke, Eno kungughaye o-uno shipe puakeuke.

¹¹ Hi kumtsu hauve nani, ikemu noye ache nani; Hikumtsu aphimini toi aqa shive nani.

¹² Heku-uphi toi nono tipaqo kuqhucheve+ nani. Eno tipaqoye aphimini toi kilive nani. Ikemu noye pulhapuju aphiphike, noye khilemu ashekha shimo nani.”

¹³ Ikemu Alhou ye pawu kungumi lakhi vilomu ishi pipuamoe: “Ino oghumiqo pesu opukhuno nepuku kepu shitsumphi kutolo, Hile i-u ajeu iqalo.”

¹⁴ Tishiaye, kungumiye Alhou ghini shichekemi qoke eno pano tipaqo puwu puzu xakulupu ithuluniye akemiqo kuphu chenipeke.