HOSIYA 8 - BAIBEL (BSI)

Ajulho Kumlla Tha

¹ AMPEU no pi, “Kutughukeu sutsa shilo! Aghumino aluqu toi iyeghilo tsuiqighi ani! Iwu timiqoye ino panoqo sasu puloshoqhi shikeu kuboleve eno ino kutsupiye keu shou kumjo anie.

² Panonguno ikugha pesu panoqo Lhou kepi piaghi na, panonguye iwu timiqo eno panonguye ni-ithi anikepi piaghi namu,

³ panonguye akivi kiu keno phevae. Hipau ghenguno panoqo ghumino panoqo papesu hawu nani.

⁴ “Iwu timiqono kukami kisheluke ikemu pano kutoshino tipau shike. Panonguno sakiphemi sukusu shipe qhi ikemu ilauno pulozah lumoe. Panonguno pano likhi pano ghuzapushi shunayi ngo tsandiyi pesu ajulho shipeqhi.

⁵ Niye Samaria lo akemiqono shunayi mishitsu mllachekeu mithike. Niye panoqo shou iloghu ideke. Panonguno ajulho mllachekeu qhivenikeu ado khitohi luniaphi kya?

⁶ Israilmi ayikiyiqimino ajulho shike eno tiye khilemu alhou lakhike kumoe! Samaria shunayi mishitsu mllachekeu huye hepho kighinyive nani!

⁷ Panonguno amlhu yisukeulo pasapagha xolu nani! Athi nimokeuye khilemu pesu asho shimlake. Ikemu shilukepu shiepinamu inaghamino tipau chukhave nani.

⁸ Israil ye ashiayeh kutami inapughami toivae eno ali kughupo toi avehupu kuhavae.

⁹ Israil lo akemiqoye agha gadaha toi kuthovilo puzu panoqo gho apulou lalo wuveke. Panonguye Asiriya launo akukaphu khuniye wuvae eno ashiayeh kutami pelo panoqo susho peniye piqeke.

¹⁰ Ikemu itehiye ino panoqo hekutsu kumqono ghimeqhi nani. Kushuwo womono Asiriya lo akukatouno panoqo qodaqhi eno panonguno sukelauno pidepukhu ihi nani.

¹¹ “Israil lo akemiqono axine ikhipeveniye akumlla khache khijehi shini keno tijejehi panonguye axine shikithe anike!

¹² Ino timiqo ghenguno phikhamla kepushi akukutsu tsa yepe qhi tsuke ikemu panonguye tipaqo pesu akumzaqhiyi eno khilemu panongu vilo pi puamoke toi pevetsuke.

¹³ Panonguno lhoxu heqhipe imlla eno tipau shi chu cheni. Ikemu ni, AMPEU ye panongu shou imlo kiqi kuhae eno itehiye ino panoqo xine kumsuma moe eno tipau ghenguno panoqo ghimeqhi nani; ino Ijip lo panoqo puwu kithe nani!

¹⁴ “Israil lo akemiqoye akighiki shipuakhani ikemu panonguye panoqo Lhokeu kumsumavea. Juda lo akemiqono aliwo kuptu phughi shipe qhiani. Ikemu ino ami puwu puzu panoqo kighiki ngo panoqo phughiqo pitilekhave nani.”