HOSIYA 6 - BAIBEL (BSI)

Kuchoushi Xaideghimo

¹ Timiqono pi, “Ningu AMPEU lau xaidewoni nolo! Pano ningu ghuzake ikemu kuchouno pano ningu shipivi nani; pano nighuzake ikemu pano nighuzaku khavetsu nani; paye tishimo nani kesha?

² Ghulo kini dolono pano nixukithe tsu nani eno akuthuniye pano ni sunheqhe nani eno ninguno pa zulo xu auve nani.

³ Ningu AMPEU ithinike pukaputsa juni nolo. Paye kuchouno inaqhe vuipeghi keshi ighi nani, ghixu tsalalo tsutsughuno ayeghi shou ghupuku keshi paye kuchouno ighi nani.”

⁴ Ikemu AMPEU no pi, “Israil ngo Juda okujo, niye okujo pesu kiu shive tsulopi kya? Nonguno ikimiye chekeuye inaqhe akimhi toi pai hauve cheni; tiye atsuzuno inaqheno hauvekeu toike.

⁵ Tighenguno ino iwu tungkupmi lau kughathabe keu ngo kutsakungo keu pesu puwu nani. Ino nongu launo lunishi akeuye mutsumishei hike:

⁶ Niye nongu wu iqemokeu kikimiye lunishi ani kethono lhoxu heqhipe mllakeu khuamoe. Niye heqhipe piti imllakeu nguno alauno iwu timiqo pelo ni-ithipe nishike.

⁷ “Ikemu panonguno Adam toi ayeghi lo ighi kemtsa ino panoqo sasu puloshoqhi shikeu kubolevetsu.

⁸ Gilead ye alhoksami ngo ghikiqhimino chhitoi akeu phughike.

⁹ Tilehi achinemiqoye timi chekeu khe aketoike. Shekhem akimthe-a lo kuwulalo ghi panonguno timi ghiqhike. Panonguno puthaputsano alhoksa hipaqo kumtsu shi cheni!

¹⁰ Niye akuighupu lakhi Israil lo ithulu puani; iwu timiqono ajulho mllakeu lono shipixi khavae.”

¹¹ “Nongu Juda lo akemiqo ghengu ghi nonguno kiu shi ani keno tipaqo ghenguno ino nongu ghimeqhi kepu do lakhi kutopuani.”