HOSIYA 5 - BAIBEL (BSI)

¹ “Nongu achinemiqo, hipau inilo! Israil lo akemiqo amlo tsuqhiyi inilo! Nongu kukami bolomiqo, hi inilo! Nonguye achipiu xakutha pesu kughathabe kepuke tighenguno nongu shou kughathabe keu ikughi nani! Nonguno Mizpa lo alichhe lakhi ilhouveke, Tobor toghilo akhame sukhope akeu shiveke,

² Akasia phughilo aqokutho lakhi shiveke, tighenguno ino nongu kumtsu ghimeqhi nani.

³ Israil ye kiutoi keno ino ithi ani, liye ilauno itshuwuve mlake. Liye amikucho kumo shive eno li timiqoye imlla nike akuzupu kumoveke.”

Ajulho Kumlla Lakha

⁴ Timiqono alhoksa shivekeuno panoqo Lhou lau ideighi nikeu lakha auve cheni. Ajulho shikeu mllakeuno akumto shi panoqo tsuqupe auve cheni eno panonguye AMPEU ikhilumove cheni.

⁵ Israil qhekuzano panoqo zulo ashepe shianie. Panoqo xineno panongu pelo kupuxa pesu veqhive eno Juda lo akemi ghi panoqo gholo veqhi kuqhae.

⁶ Panonguno amshi ngo bheri heqhipe AMPEU mllaniye shi cheni ikemu tino panoqo ghenguno akivipu shilu chemoe. Panonguye pa phumla nani kughengu paye panoqo pheveake.

⁷ Panonguno AMPEU lau amikucho shimoke; panoqo tianuliye pawu kumoe. Tighenguno itehiye panongu ghi eno pano yeghi ghi itheno kutsaleveni cheni.

Juda ngo Israil dolo Aghukishi

⁸ Gibea lo afuko kuyighalo! Rama lo kutughukeu sutsa shilo! Bethel lo aghule kulo! Aghulo wulo, Benjamin lo timiqo!

⁹ Aghime tsala cheni eno Israil ye shipsakhave nani. Israil lo akemiqo, hiye kuchochono shi nani putsake!

¹⁰ AMPEU no pi, “Niye axu ide ani, kughengu Juda lo sakiphemiqono Israil leke eno li yeghi pukaluve tsuke. Tighenguno panoqo shou azukuqo lakhi toi aghime kitikhi ino lepuku nani.

¹¹ Israil ye nedaqodaqhi, li chipiu akeu ayeghi luvetsuae kughengu lino tsuyikhomo khunoqono kiumu tsukepu kuhakeno tipaqo kuphu niye shike.

¹² Ino Israil shou kutsakungo keu sughi nani eno Juda lo akemi shou shikupusa sughi nani.

¹³ “Kughono Israil no liye kishi su ani keno eno kughou Juda no li likhi li ghuzakuqo ithulu keno Israil no Asiriya lo akukatou akijeu vilo akukuphu khuniye wu nani, ikemu paye panoqo shipivi tsumlave momu panoqo ghuzaku vilumo nani.

¹⁴ Ino abongushu lakhi toi Israil lo eno Juda lo akemiqo hakuqoqhi nani. Ni ampino panoqo aleqhi shi sutha pinyiveno panoqo qhive nani. Kughou ino panoqo sunhe susu wuve nikeno khunomu pano xamla nani.

¹⁵ “Iwu timiqoye panoqo xine ghenguno lukumkha shi aghime shimoke kutolo eno iphusu ighimoke kutolo niye panoqo pheve nani. Kutomu panonguno aghimeshi kelono iphu nike pukaputsa nani keniake.”