HOSIYA 3 - BAIBEL (BSI)

Hosiya ngo Kutuqhaliu

¹ AMPEU no ivilo pi, “Wukithelo eno totimi alojipumi sasu salha akeu lau okikimiye piyelo. Israilmino ilauno tsughusu wuveno atsayithi kipiki pesu ajulho shisukeu lau akumllagho tsu auve pinamu itehi kutolo ino panoqo kimiye ake toi noye atotiu kimiye masae.”

² Ike ino tsandiyi atachu chighi pungu eno asho thi kilogram 150 pe li qhuluve.

³ Ino li vilo pikeuno liye kutuqhalimi momu salhamo puzu ado kushuwa ikhe kepu shi nani kepi li vilo pi; eno tipa ghulokilo ino li khenikeu pike.

⁴ Hipau paphi lono Israil lo akemiqoye ado kushuwa kutolo kukami momu sakiphemi kuha nani, aghashi mllakepu momu chinikepu tuqutsukucho ngo ajulho shisukeu eno asu atu julho shisu pesu asaqhi chekeu kuha nani.

⁵ Tithiuno Israil lo akemiqono AMPEU panoqo Lhou lau eno panoqo kukau David laghami lau xaideghi kithe nani. Tithiuno panonguno AMPEU sumsa nani eno pa gho kivi ikhilu kepu shi nani.