HOSIYA 13 - BAIBEL (BSI)

Kughakutha Ashekhau

¹ Wovekeu tsalalo, kughono Efraim laghano atsa pikelo Israil lagha kutamiqoye musave cheke; Israil lo Efraim peqhepuku cheke. Ikemu panonguno Baal mlla keu lono axine shive eno hipau ghenguno panonguye thive nani.

² Panonguno mllanike ayi pesu ajulho shikeu lono axine shi acheni, timi kukumsu lono tsandiyi pesu ajulho kutshakughashi shikeu eno timi uno mlakeu! Tishi puzu panonguno pi, “Lhoxu heqhipe tipaqo mllalo!” Kishi puzu timino ajulho shisukeu, amshitsu julho kimihi lono shikeu muma cheni kela!

³ Tighenguno timi hipaqoye inaqhe akimhi toi hauve nani eno inaqhe itheno atsuzu hauvekeu toive nani. Panonguye athi qochekeualo amlhuno aghijini fupewuve keu toike eno amiphoki lono ipeghikeu michhi toike.

⁴ AMPEU no pi, “Niye nongu Lhou AMPEU ke, Ijip yeghi lono nongu saipeghikeu Lhou ke. Inguno alau nonguye kutau Lhou kuhae. Ilikhino nongu xakuluuke.

⁵ Asayeqha qhaikeu yeghilo ino nongu tuchohijuke.

⁶ Ikemu nonguno ayeghi kivilo iloghilu kelauye nonguye nibomilei eno aghaqiluke eno tishi puzu qhezawuveno ikumsumaveke.

⁷ Tighenguno ino abongushu toi nongu le nani. Angushu toi nonguno wuchekeu lalo itshu puzu khe nani.

⁸ Ino avaqu lakhi no ati puhaveno akelo toi nongu le nani eno ino nongu suthapinyi pe qhive nani. Abongushu lakhi toi tsuqhikea lono nongu tsaqhi nani eno tughashi lakhi toi nongu suthapinyive nani.

⁹ “Israil lo akemiqo! Ino nongu kutsaleve nani. Tithiuye khuuno nongu kuphuluni kya?

¹⁰ Nonguno akukau lakhi eno sakiphemi khuke ikemu panonguye kishi puzu noshiayeh xaluni kya?

¹¹ Ixukighide lono ino kukami nongu tsuke eno ino muqhumuza akelono ino panoqo ikhisuwuveke.

¹² “Israil xine ngo kuqupuakeqoye yekutsupe qhivae eno yekikithi kakuqoye akivishi hekutsupe puavae.

¹³ Israil ye xukulupu dokivi sholuke eno tipau lunikeulo izuzuveke, anga lakhi pununiye shiakelo atita lono ipemopi auvekeu toike.

¹⁴ Niye kithimi yeghi lono timi hipaqo xalumo momu akithi kuka lono panoqo xaphelumoe. Akithio, owu pusa jeliqo sughilo! Niye timi hipaqo shou kimiyeqhiyikeu kuhaveake.

¹⁵ Israilmino alupi toi azunihoyi thuwu aghi pinamu ino asayeqha kudauno kipela mulhu shukuthuyikeu eno tipauno panoqo zukikhe ngo azupuki fuputhove nani. Amekuapu jeli thwokha kumtsu tipauno pewuve nani.

¹⁶ Samaria no ishou hebideke ghenguno aghime tsumasae. Tilehi timi akeqoye aghukishi lono thi nani; anga kughunuqoye ayeghilo vedaqhi pithi nani eno mishipu aghikemi po ghilevetsu nani.”