HOSIYA 12 - BAIBEL (BSI)

¹ Israil lo akemiqo inaqheno putho kutolo shikeu adou likhi eno kutsakungove kepu likhike. Kichileu ngo heqhi buqhikeu kumla panoqo gholo ikowo ani. Panonguno Asiriya sasu kulashikile eno Ijip sasu lhidi lhighi shike.’

² AMPEU ye Juda lo akemiqo shou ngukukepu lakhi sughi kepu shiani; paye Israil lo akemino kishi mla itha cheni keno tipau ghenguno aghime tsuni cheni. Panoqono kiu mlapuani keno tipau ghenguno pano panoqo lochile nani.

³ Panoqo puasu Jakob no aza polo pamu Esao sasu kumtsa aphilonomu pamu sasu kusuxake. Kughou Jakob no kichimi shive keno paye Alhou sasu kumjoke,

⁴ pano kungumi lakhi sasu kumjo eno toluke. Pano qanimlo kukumgha lakhi khu. Bethel lo ni Lhou no nisu Jakob lau ighike eno pa putsake.

⁵ Hiye AMPEU, aqokitikhi Lhou ke pa je AMPEU ipi puzu pa mlla nikeu shike.

⁶ Ike itehiye nongu Jakob polo kughukomiqo, nongu Lhou pululo eno pa lau ideighilo. Pa qhoqhu eno achipiu shilo eno nongu Lhou pelo shipe nike kutu-ukulushi khealo.

Kughathabekeu Tsa Alau

⁷ AMPEU no pi, “Israil lo akemiqoye Kananmiqo toi kuchou kuhamithe; panonguno ahhu kichile pesu pano nhemgha qhunikemi pishiqhi cheni.

⁸ Panonguno ishi pi, ‘Ninguye kinimi ake,’ ‘kinikulu nisala xapuwo qhiluvae. Khunomu nino kuchou kumo lono akini xapuwo qhilukeu ni-nguku lunichemoe.’

⁹ Ikemu, ni, nongu Lhou AMPEU khuno Ijip lono nongu sa ipeghi keno ino nongu pelo itaghi aphikilo ngokithepe nani, tiye ino timi kughunamoke-alo nongu lau ighikelo nonguno achekeu toi shi nani.

¹⁰ “Ino tungkupmi putsake eno kungunhetsu kutomo panoqo tsuke eno tungkupmi vechewo iwu timiqo vilo ino kutughu che.

¹¹ Ikeghi Gilead lo ajulho shisukeu mlla acheni eno khunoqono tipaqo mlla cheni keno thi nani. Gilgal lo amshitsu heqhi mllae, ikemu tilehi akumllagho kiptiaqoye aluza thoqhalei keulo atu kumqopuakeu shive nani.”

¹² Nisu Jakob ye Mesopotamiya lo povekepu shive eno tilau anipu luniaye paye kutami ghenguno mla cheke eno timi tipau wu bheriqo jukutsucheke.

¹³ AMPEU no Israilmi Ijip lo aquaxemi shiake lono xaphelu nike eno panoqo tuchomujolu nike tungkupu lakhi puwuke.

¹⁴ Israilmino AMPEU mlo shishe shikighideve tsue; panoqo kumla lhoksa ghenguno panonguye thive kuzupuke. Panonguno AMPEU shikukujo keu sughike ghenguno paye panoqo ghimeqhi nani.