HOSIYA 10 - BAIBEL (BSI)

¹ Israil lo akemiqoye atsayibo lakhilo atsayithi kumzapu pithi akeu toike. Panonguno khijehi kinikulu shilu keno tijejehi akumlla kiptia mlape qhike. Pano yeghino vikitheuveno axa ala ipeghikeulo panonguno mllakeu tuqu tsukucho jukighilepu shi shipeqhike.

² Timi khunoqo mlolo pishikiqhi acheni keno itehiye pano xine ghenguno ime masake. Alhou no pano kumllagho kipti-a tulevetsu nani eno panoqono chinichekeu tsukucho kutsave nani.

³ Kushuwa womono timi hipaqoye ishi pi nani, “Ninguno AMPEU sumsamoke ghenguno ninguye akukau kuhake. Ikemu akukau ye nighenguno kiumu shitsu luni chemoe!”

⁴ Panonguno alatsa likhi zacheni eno kichileu shoqhi shi cheni eno avehu kuhakeu puloshoqhi shi cheni. Alu hokidepe puakeu lulo tughu lupi thuwu akeshi kuchou xakuthaye kichileu xakutha shivetsuke.

⁵ Samaria phughilo kughuna akemiqoye musaichive nani eno Bethel lo shunayino shikeu mishitsu puhavekeu ghenguno mloqa nani. Timiqo ngo achinemi khunoqo ajulho tipau qecheni keno tipau ghenguno qa nani. Kughono tipau shunayi jukighilepu shi akeu xavetsuni keno panonguye ihu-igha qa nani.

⁶ Ajulho shisukeu huye asuqha kumlhoshi pesu Asiriya lo akukatou lau xapuwuve nani. Israil ye shikukujove nani eno kujomzaqhive nani, kughengu mijetsukeulo lino papewuveke.

⁷ Azulo asulo yipe chekeshi Israil kukau xapuwuve nani.

⁸ Naghuto toghilo Aven chinichekea, khilehi Israilmino asu-atu mlla cheni keno tipauye kutsaleve nani. Asahu ngo alupino tipaqo akumllagho kipti-a qunhaluve nani. Timiqono naghutoqo vilo, “Ni-kughutshuluvelo!” eno atoghiqo vilo, “Ni-nhaluvelo!” ipi nani.

Israil shou Kughathabe Piqabe

⁹ AMPEU no pi, “Israil lo akemiqoye panonguno Gibea lo axine shikeu ghuloki lono itehi kutolo ishou axine shikeu tave mphie. Tighenguno Gibea lono aghukishino panoqo haluve nani.

¹⁰ Ino hi axine shiakeu timiqo leni cheni eno panoqo ghimeqhini cheni. Ashiayeh kutamino kuqhano panoqo shou ighi nani eno panoqo xine kumzapuke ghenguno aghime sholupe nani.”

¹¹ “Ghuthu lakhilo Israil ye akivishi qophevekeu mishi alhothe lakhi athi qonike kutokupuyi eno puloniqhiyi aketoi ke. Ike ino li ku-o jukivi shou kuokhasu pipe nikeu shike eno akumla kusho li pelo shipeniye kutoe. Ino Juda pelo hokide kuphu sunhepe eno Israil pelo aniba khuwa sunhepe.

¹² Ino pi, ‘Nosala ayeghi kithe hokidelo, amikucho shosulo eno nonguno ilau amlo tsuqhiyikeu huno kukumgha xakulupu shilo. Itehi nonguye ni, nongu AMPEU lau xaideghi kepu ghuloki shivae, ino ighi puzu nongu shou kukumgha lepukutsu nani.’

¹³ Ikemu tishi nike zuqhulo nonguno alhoksa shosuve eno tipau xathi xoluke. Nonguye nongu kimki pesu lhophekeu xathi chuvae. “Nonguno nowu khurkulu pukhu eno nowu aghushimi kutomo shivekeu shou pukhuke ghenguno

¹⁴ aghukishino nowu timiqo shou ighi nani eno nonguno aliwo putukeu kumtsu kutsaleve nani. Tiye kughou akukau Shalman no aghushi lono Betharbel phughi kutsale puzu aza ngo atianuli chineqhi pithive keu tsala toi nani.

¹⁵ Tikithipushi nongu Bethel lo akemiqo shou shi nani kughengu nonguno alhoksa akumou shipuani. Aghukishi huthu kemtsano Israil kukauye thive nani.”