HOSIYA 1 - BAIBEL (BSI)

¹ AMPEU tsa hipau Beeri nu Hosiya lau tsukeuye, Uziya, Jotham, Ahaz eno Hezekiya ishino Juda lo kukami shicheke ghulokilo eno Jehoash nu Jeroboam no Israil lo akukau shiake ghuloki lono ke.

Hosiya Nipu eno Atianuli

² Atughushi AMPEU no Hosiya vechewo Israilmi vilo ishi pike, “Wuno anipu lakhi lulo; onipuye amikucho kumomi lakhi shi nani eno otianuli ghi li paphi shi nanike. Tipa tho lono iwu timiqoye iqhiveake eno amikucho kumomi shiwuveake.”

³ Ike Hosiya no wuno Diblaim nga Gomer luve eno lino mishiluve puzu anu lakhi punu.

⁴ Tileno AMPEU no Hosiya vilo pi, “Pa je Jezrel kutsulo, kughengu ado kushuwa womono ino Israil kukau ghimeqhini cheni, tiye pa puasu Jehu no Jezrel lo aji pelepua keu ghenguno ke.

⁵ Tipa ghulokilo ino Jezrel khila lono Israilmi wu aghushi kuka kumto kutsalevetsu nani.”

⁶ Gomer no anga akiniu punu, ishiu loye totimi lakhi. AMPEU no Hosiya vilo pi, “Lije Lo-Ruhama kutsulo, kughengu niye khilemu Israilmi kimiyeni chemo momu panoqo xine qhitsumo nani.

⁷ Ikemu Juda lo akemiqo lau ino kikimiye tsu nani. Ni, AMPEU panoqo Lhou no panoqo xalu nani ikemu niye aghukishi momu azutakihi momu asuzu eno apiji momu khurshi eno khurshi shou ikukemi pesu tipau shini chemoe.”

⁸ Gomer no li nga atotiu khove kethiu liye itaghi mishi luve eno anu kutau lakhi punu.

⁹ AMPEU no Hosiya vilo pi, “Pa je Lo-Ami kutsulo, kughengu Israil lo akemiqoye iwu timi kumo eno niye panoqo Lhou kumoe.”

Israil Sachilelunikeu

¹⁰ Israil lo akemiqoye azughilo asaye paphi shive nani, panoqoye kihikhamla eno mighiwo tomla kepu shive nani. Itehiye Alhou no panoqo vilo, “Nonguye iwu timi kumoe.” ipike, ikemu pano panoqo vilo ishi pinikeu tsala wocheni, “Nonguye akuxupu Lhou nuliqoke!” ipi pi nani.

¹¹ Juda lo akemi ngo Israil lo akemiqoye pekuqhave nani. Panonguno kuqhano panoqo wu sakipheu lakhi kisheluve nani eno itaghi panonguye pano yeghilo thuwuve eno alau ikowove nani. Iye, Jezrel tsalaye atsala kije lakhi shi nani!