HAGAYI 1 - BAIBEL (BSI)

Achineki shikithe nikeu Zahkutsu

¹ Darus no Persia lo akukatou shikeu ampe akiniulo aqhi akutsughou atsala atughiulo AMPEU no tungkupu Hagayi vechewo atsape tsuke. Tiye Juda lo ahng shiakeu Shealti-el nu Zerubabel ngo Jehozadok nu Achinetou Joshua pama lau pipuwuke.

² Aqokitikhi MPEU no Hagayi vilo pi, “Timi hipaqo no pikeuno Achineki shikithe puku nikeu ghuloki hiye achipi shimphie pike.”

³ AMPEU no tileno tungkupu Hagayi vechewo atsape hipau timiqo lau tsuke:

⁴ “Iwu timiqo, kushiye nonguye aki kivilo ngo ani puzu iAchine kiye ixapiniyi anipe kya?

⁵ Nongu shou kiu shi ikughi ani keno nonguye ithumla kesha?

⁶ Nonguno athi kumzapu xusu ani ikemu aghulo likhi ghile hulu ani. Nonguye achuqupu chukepuye ani ikemu nongu pelo lukumkha shi peithalu kepu shiamoe. Nonguye atsayiji shokepu ani ikemu yeleqolei kepu kuhae! Nonguye aphimini ani ikemu nongu pelo luvuyi lukepu lukumkha shi kuhae. Qeleqe qechukemino aqe qepewo jolabo akighipe akeulo suve ani.

⁷ Kushiye hikithipu shiani kela nonguye ithulumo kesha?

⁸ Naghutolo iqholo, takuta pughilo eno Achineki shikithe pukulo; tithiuno ino amlo qi nani eno imlla kuzupu qhemi lono mllalu kepu shi nani.”

⁹ “Nonguno kumzapu ghile huniye juake ikemu aghulo likhi shi aghike. Kughou nonguno ghile hupusu akilo pughi keno ino fuleve tsuke. Niye kushiye tipau shi kya? kughengu nonguno pututa shelo pututa kilo mighimghai mula ani puzu iAchine kiye ixapinyi ani kehue.

¹⁰ Tighenguno tsughuqhimoe eno kiumu ipeghimlae.

¹¹ Ino qhaikeu tsala aghakhulo sughi, naghutoqo shou, aghilu shou atsayilu shou, oliv xathili shou, ayeghi lono ipeghiche keu xabo shou, timi ngo lhoxuqo shou eno nonguno chichekeu jeli kumtsu shou sughike.”

Timiqono AMPEU Zahkutsu pelu

¹² Tileno Zerubabel ngo Joshua eno Babilon lo puxu puaghikemi khunoqo ideighi keno tipaqo kumtsuno AMPEU no panoqo vilo kiu shilopi keno tipau shike. Panonguye musave eno AMPEU tsapeu tungkupu Hagayi ghokulu shike.

¹³ Tileno Hagayi no AMPEU tsape pesu timiqo tsuke: “Ino nongu sasu anani, tiye ishoqhike.”

¹⁴ AMPEU no timi kumtsu Achinekilo kumlapu mulape nike panongu mlo hakuthotsuke: Juda lo ahng Zerubabel, Achinetou Joshua eno halepheve keu lono puxu puaghikemi ideighikeqo kumtsu hakutho tsuke. Panonguno Aqokitikhi MPEU, panoqo Lhou Achine ki kumlapu mlathuve,

¹⁵ tiye Darus no akukatou shikeu ampe akiniulo aqhi akutsughou atsala muku abidiu lono huthuke.