HABAKUK 2 - BAIBEL (BSI)

AMPEU no Habakuk Khochile

¹ Niye ighukhe qoghe zumli ikuno AMPEU no ivilo kiu pilo pinikeno khejuni eno ino muchho akeulo kiu khochile tsuni keno khejuni.

² AMPEU no khokichile hipau itsuke: “Atulipha shou ino kiu opiyesuni keno mutsumisheyi yepesu qhilo, tishianguno tiye jukhavino philu kepu shilo.

³ Hi yepe qhilo kughengu hipau kuchou shi ighinikeu ghuloki kumphike. Ikemu aghulokiye papashi ighi nani eno kiu opiye keno tiye kuchou ighini putsake. Hi ighinike asheshi aghiluvi ikemu tipau khelo; hiye mutsuqheyino shi nani putsa ke eno hiye munuvemo nani.

⁴ Atsape huye hike: ‘Khunoqono alhoksa keno puxumo nani ikemu khunoqono amikucho keno xulu nani kughengu panonguye Alhou lau amikucho shi achenike.’ ”

Achipikumomi ye Thiniputsa

⁵ Kinikuluye pishikiqhi. Aghukha shiche kemiye qheza eno ngosumlae, akithi hutoi panonguye khilemu aghaqi chemoe. Tighenguno pano likhi pano sala ashiayehqo eno timiqo leluve cheni.

⁶ Leluvekemino panoqo leluvekemi cheqhi nani eno thaighakeu panoqo vilo pi nani. Panonguno ishi pi nani, “Owu kumoamu nono luveke, ikemu noye puhaniake! Nongu piagha pua kemi pelo tsuvepe nike anguka vesu puzu ado khitohi nonguye kinimi shikithe ache nani kya?”

⁷ Ikemu nonguno tipau ithi mphi lono nongu kutami leluveche keqoye apiagha pu nani eno anguka lono akighishe tsukepu shipe nani. Aghumino ighi puzu nongu pelo musa khokhoshipe nani. Panonguno nongu xulepuwuve nani!

⁸ Nonguno ashiayeh kutomo xulepuwuke ikemu tipaqo gholo puxupe puaghi keqono nongu xulepuwu nani, kughengu nonguno timi ghiqhileke eno nonguno ayeghiqhalo akemiqo eno panoqo phughi shou a-ubeke.

⁹ “Nonguye puhaveni putsa! Nonguno heqhi buqhikeu lono ikhisughi keu pesu nokibolomi pelo kinikulu shipe eno nokiboqo shikupusa ngo akuyighupu sholu pemoniaye pukaputsake!

¹⁰ Ikemu nongu muquno nokibo shou akukujopu sughike; ashiayeh kutomo kutsalevekeu lono nolikhi noshou shikupusa likhi sughi ani.

¹¹ Putupua keulo atuqu thotsu oshou igha ipeghi ani eno akixuqono tipau ghugha vekuvavatsu ani.”

¹² Nonguye puhaveni putsa! Nonguno heqhi buqhikeu lono aphughi shike eno ghiqhi kilekeu pesu tipau phughi shiqhepukuke.

¹³ Nonguno leluvekeqo shiayehqoye adou kumla shikeu lono lhovae eno panoqono shipukukeu kumtsu amino pitilevae. Aqokitikhi MPEU no hipau shike.

¹⁴ Ikemu azughilo azuno chhitoi akeshi AMPEU kimthe jekipi ithikeuno ayeghi chhitoi nani.

¹⁵ Nonguye puhaveni putsa! Nongu xukighide lono nonguno nokusami pughuqhi eno shikukujoke; nonguno panongu pelo shomzupu akeshi kulokuloyive peke.

¹⁶ Oshelo noghi agigihupu zuqhulo akukujono onhapu nani. Olikhi noghi shopusu kulokuloyive nani. AMPEU no opelo aghime jukhu shope nani eno ogihu chekeu huye akukujopushi kughulhove tsu nani.

¹⁷ Nonguno Libanon ghasu yeqhiveke; itehiye noyeqhive nani. Nonguno tipaulo lhoxu akeqo pithiveke; itehiye lhoxuno nongu shikumsa nani. Hipau shi nani kughengu nonguno timi ghiqhi puanike eno nonguno ayeghiqhalo akemiqo eno panoqo phughi shou a-ubeke.

¹⁸ Asu-atu julhoye kiu vehupu ani kya? Tiye timino kiuala shipe qhikeuke eno tiye akimki kumoaye kiumu nongu vilo pimo nani. Tipau mlaqhikemi pelo tipau pulupe nike kiu akivi shipuani kya? Atsa ghi putsamlakeu lhou ke!

¹⁹ Nonguye puhaveni putsa! Nonguno asu tachu vilo, “Idathuvelo! momu atumqo vilo ithughivelo” ipi nani. Ajulho shisukeuye nongu vilo kiuala piyesulu nani kesha? Tiye shunayi ngo tsandiyino kuzupe aghiluvi ikemu tipaulo akuxu kuhake.

²⁰ AMPEU ye pa Achine ki kimthelo ani; ayeghilo timi kumtsuno pa zulo iquneyi shilo.