FILIPIAMI 4 - BAIBEL (BSI)

¹ Tishiaye, ino kimiye eno ino kusholu nishi achekemi ithikuzumiqo, ilopivi chekeqo eno ikijipivi tsu chekeqo, ino kupuchekeqo, nonguno Ampeu gholono xuakeulo hikithipushi mutotoi puthugho akepuke.

Hakitekilekeu Tsa

² Ino Ewodia ngo Suntokhe pama hakite anike. Ampeu lono okujoye akukumsu pulo kuqhaluvelo.

³ Eno puqhe kumtsa chekeu ikusau, ino ovilo ghi qhuiniju ani, noye totimi hipama kuphutsulo, kughengu pamaye Klemento ngo ikusami kumtsa mlachekemi kutami ishi gholono isasu atsakiviu vekupha nikeulo shishe mlacheke, panongu jeye akuxupu kakulo anike.

⁴ Pulhapuju Ampeu lono alovilo, ino itaghi pi ani: alovilo!

⁵ Timi kumtsu pelo nonguye kutu-ukulumi kepi ithipelo. Ampeu ye kupunukhoi ani.

⁶ Kiu lonomu amlokutakihi kevilo, ikemu nongu kighini kumtsulo nonguno kiu avehupu shinikeno Alhou vilo khulo, pulhapuju shikimthikeu mlo pu puzu nonguno khuinilo.

⁷ Alhou lokiqipu khikhi timino ithikuthulukeu nguno alau keno, tino Khristo Jisu lono nongu mlo eno nongu kukumsu xaqhetsu anani.

⁸ Athikuzumiqo, ashekhashi kiuno kuchou, kiuno gihukuzupu, kiuno achipiu, kiuno mutsumisheyi, kiuno alokepu, kiuno kupukinipu keno akivipu eno shekepushi aghiaye tipaqo thime shou kumsupuku alo.

⁹ Nonguno ilauno kiu shikaluvea, ikhiluvea, chiluvea eno ithuluve akeno tipaqo pewolo; eno alokiqipu tsuchekeu Lhou no nongu gholo anani.

Agho ghengu Shikimthi

¹⁰ Ampeu lono ino shishe alovi ani ike ado kushuwa thiuno nonguye ihijukithe nikeu huthu ani. Nonguye ihiju nikeu kumsulu akeniake, ikemu adokivi ithumlano ake.

¹¹ Ino hi piakeuye ikughuchove keghenguno pianike kumoe, kughengu kiukiu kuxulo aghinamu amlo qi-qhiyi anikeu ino puju shijuno ithivae.

¹² Akumlhoye kishive cheni keno ino ithi ani, nibonileyi keuye kishive cheni keno tighi ino ithi ani. Kutamino mthakeu ino shijuno ithikeuno khilekhile anamu, kiu kiulo anamu, kupukunoshikeu na akhuamzu na nibonileyikeu na kuhave namu niye amlo qi-qhiyi acheni.

¹³ Khristo no ishikumtokeu vechewono niye thwokha shikulupu kuka anie.

¹⁴ Ikeghi nonguno iwu shilukusa ithitsukeu ghenguno ighono alovae.

¹⁵ Nongu Filipiamino akivishi ithi ani ike, atsakiviu hipau pikulha tughu shikelo, kughou ino Makedonia qhiveno wuchekelo nongu likhino tsujekeu eno ikhilukeu isasu kuloji kethono akukuhou khunomu tishimoke.

¹⁶ Thesalonia lo akelo ino akukuphu avehupu shive keloghi nonguno ghuthu kutomo ilau tsupuwuke.

¹⁷ Niye agho ichhepe nikeu phuche nike kumoe; ikemu nonguno Alhou lau kike achekeulo alaushi thuwulu penishi chenike.

¹⁸ Nonguno kiu itsupuani keno tipaqo kumtsu ino ithuluvae ipikeu hike eno hiye kughokumoke, nonguno Epafrodita gholono agho ilau tsupuwukeu ithulu puzu ighakiqi shivae. Hipaqoye Alhou lau tsungquyikeu pesu mllakeu hutoike, pa lau amlokiqipu eno ikhikulupushi ghiqhipe mllakeu lakhike.

¹⁹ Eno iLhou no Khristo Jisu gholo kinikulushi akeu lono nongu vehupu kupukuno shitsu nani.

²⁰ Ningu paPuh Alhou lau alhokupuju ghenguno akimthe jukuvu shialo. Amen.

Ashekha Petha

²¹ Khristo Jisu lono Alhou timi kumtsu lau petha shi ani. Athikuzumi igholo akeqono petha nongu tsu ani.

²² Hilau Alhou timiqo, eno akhotono Rom yehkipeu Kaisar kibolomino petha tsupuwu ani.

²³ Ampeu Jisu Khristo wu kupukinino nongu kumtsu gholo apeniu!