FILIPIAMI 2 - BAIBEL (BSI)

Khristo Qhokigheno Kuchuqu

¹ Khristo laumi shikeu lono nonguye aghuthi puxulu, kimiyekinino nongu lokughunotsu, nonguye Aghungu lono kuposhulu, lakhino lakhi jupesu kimiyeqhiyi eno ivuilayi anima?

² Tishiaye, nonguno akukumsu aphiphishi, kimiyekeu aphiphishi, kuloni kughuvuyi shi eno akukumsu lakhi shikeu lono ilokivi kuputsulo.

³ Alikhi asuqhekeu momu qheza lakikeu pesu kiu kiumu shikevilo, ikemu aqhokigheu shipuzu kutamino onguno akiviu kepi kihilo.

⁴ Olikhi opulou kumono kutami pulou shikile nikeu jukutolo.

⁵ Khristo Jisu lolo ache keu nongu gholo ghi alulo:

⁶ Paye Alhou lho-aye qhemilo anamu tsuyikhomo Alhou qhemi shi amasakepi kumsumoe.

⁷ Tishi nike zuqhu pa likhi pano ti kumtsu liqhive, Eno aqemi lhoaye pepuve, Ningu toi timi lakhi shi pa punu, paye timi kimihi lono ipeghi:

⁸ Pa likhi pa pesu aqhokigheu shi eno kros lono thikeu kutolo aghokulushike.

⁹ Highenguno Alhou no a-a akiqheulo pa xuputhu puku, Eno aje kutau kumtsu nguno akiqheu je pesu pa tsue,

¹⁰ Tishianguno kungughalo, ayeghi shou ayeghiqha qhou eno lhoxu kumtsuno Jisu je gihughi panonguno qhoqhunhe nani.

¹¹ Apu Alhou jekipipu shighi timi lhoxu jeli kumtsuno Jisu ye Ampeu ke ipi asheshu nani.

Ayeghilo Akuvu toi Yepuvuakeu

¹² Tishiaye, ino kimiyechekeqo ikualo nonguno pulhapuju aghokulushi ketoi itehiye ino nongu gholo ngomove kelomu alaushi aghokulu shilo, tino alau akhotouke. Nongu xakulupu shikupunike ghenguno musa khokhoshi mla alo;

¹³ kughengu Alhou zukuvupu akivi mlalupeni eno pulolupe nike ghenguno Alhou no nongu lolo mla acheni.

¹⁴ Xishikile eno kutsalakile mono thwokha mlalo,

¹⁵ tishianguno nonguye jekujeli kuhano viwotokulumi shipe nike, eno chighi chilaikemi ngo kusakughami gholo tukutiye kuhakemi Alhou nuliqo shipeniyeke. Nonguye ayepuqono yevuqai aketoi panongu gholo ayeghilo yepuvu masae,

¹⁶ tiye nonguno akuxupu tsa phemono pekishe tsukeu vechewono, tishianguno niye adou lono pokive koha puamo momu adou lono ime mla puamo kepi Khristo Tsalalo ino akijivile nanike.

¹⁷ Aghakishilo ihji pesu lepuku keuno nongu kupulu Alhou lau tsukulupu shiaye tiye ilokivipu nongu kumtsu sasu kusajelu anike.

¹⁸ Nongu ghi alokivishi masae eno nongu lokivi isasu kusajelo.

Timothi ngo Epafrodita

¹⁹ Ampeu Jisu pulou shiaghiaye kighithe Timothi nongu lau puwuni, tishianguno nongu sutsano ishi kumto tsu nanike.

²⁰ Nonguye kiutoi anikelapi kumsukimgheyi tsunikemi igholo pa toi kutami kuhae.

²¹ Kughengu kumtsuno Jisu Khristo pulou kumono pututano pulokeu kumlalo likhi amlo tsuani.

²² Ikemu Timothi ye amekuapu kiu ani keno nonguno ithi ani; anuno apu sasu mla akeshi atsakiviu ghenguno pano azukinishi isasu mla acheni.

²³ Tighenguno niye kishive nani keno ithive kemtsa ino nongu lau pa puwunikeu kumsu ani.

²⁴ Ni ampi ghi kushuwa womono nongu lau ighinike ghenguno niye Ampeu pukhube ani.

²⁵ Ni thikuzuu Epafrodita nongu lau puwu kepushi aniepi ino kumsuluvae. Paye ikusau shi kumtsa mla cheni, isasu aghushi kumtsa acheni, pano nongu ghinikishiu shighi ikuphu eno ihiju cheni.

²⁶ Paye nongu kumtsu sasu kushoni shikeu khekulhoshi ani, pano kusukini shivekeu nonguno chiluveapi kelo pa mlo save.

²⁷ Kuchouno paye akithi kumlhoshi suveke, ikemu Alhou no pa shou kimiyekeu qhitsuke; pa shou likhi kumono ishou ghike, tishikeu lono ipelo amlo ghimeno kishekibe pemoniyeke.

²⁸ Tighenguno niye nongu lau pa puwu nikeu khekulho shi ani, tishianguno kughou nonguno pa ithulu nikeno nongu lovi kithe peni, eno imlokusa shipuhave niyeke.

²⁹ Ikehu Ampeu lono athikuzuu toi alokivishi pa ikhilulo. Timi hitoikemi gihu chemasae,

³⁰ kughengu Khristo kumla ghenguno, eno nonguno ikuphukeulo shiwotomono akeu shikuputsu nike ghenguno pa kuxu pephetsuke eno paye kitilano thono thiveni cheghike.