EZRA 9 - BAIBEL (BSI)

Kutshukungo Xuuvekeu Ithi

¹ Ikemu tipathiu Judami sakiphemi ilau ighi eno pano dolo kutomono, achinemi eno Levi laghami ghi sukuqha no tipa ghakhulomi lhoaye peluvae eno Kananmi, Hatimi, Perizimi, Jebusimi, Amunmi, Muabmi, Ijipmi eno Amarimi no kuchhube kutsula kumla hipaqono shichekeu lo panongu ghi kutshu kungo mithekumo yeh pewuva pi ivilo pi.

² Kughengu Judamino timi tipaqo nga sasu kulakupu shiveno Alhou wu akimthemi qoye shipunhaveke, tile ayehpemi eno sakiphemi no akhotoshi pimive.

³ Kughou ino ti chilukeno ino iphinhemgha suxu, ikutsusa eno ikichimhi phijoveno ikiqi iqano amlo kughuta shi ngo auve.

⁴ Ino amlo ghimeshi puzu avelau aghashikeu do tomoke kutolo ngoa kelo, Israil Lhou no hakughutsuveno ide ighi kemi xine ghili pikelo musakhokhoyive kemi kumtsuno isuhope ngoluve.

⁵ Avelau aghashi mlla keu dolo ino kumvu akeu phi nhemgha suxuvekeu xapu ithu khoqhunhe luveno AMPEU iLhou, lau iwu sukhopeno igha pi.

⁶ “O iLhou, ino olau igi peqhe pe juni keghi akukujono igi chijiphe nike shivae, kughengu ningu xineno ningu vesuvae eno ni kipimino atsutsu tohi ashekha kuhavae.

⁷ Nipu asu tsala lono ishi kutolo owu timiqono ighono pimi ighivae, ni xine ghenguno ni kukami eno ni chinemi pe Alhou kumthami kukami ulono pithiveke eno ishi ninguno sholu ake kutolo titoi tishi khathaluve, suxaluve eno shikighime veke.

⁸ Ikemu itehi ado ikhonhei alokughuno ningu tsu ani, kughengu nono ningu khami ghupe puaghi tsu eno akimthe-a hipaulo xuaghilu pe, nono akutsugha kughu lono akuxu kithe pe ningu tsuke.

⁹ Kughengu ninguye akutsughalo acheke ikemu akutsugha lono ni Lhou no niqhive moe eno nono Persia kukatomi pelo ningu kimiyeno xuaghipe puzu ochineki shikithe eno shipsavekeqo shikithelu penike eno Juda ngo Jerusalem lono sukusho phulupeniyeke.

¹⁰ “Itehi O Alhou, ninguye tinguno alau kiu piluni kya? kughengu ninguno itaghi ozahqo hebidevae eno oqhivae

¹¹ khikhi owu tungkupumi vechewo nono nitsukeu. Ninguno ngoniye akeu yeghiye timi tile akeqo ghiliayeh tuchechei vimo eno ayeghi shekha lono ashekha kutolo mithemovae ipi panonguno ningu kutughu tsuke.

¹² Ningu ngaqo pe pano nuqo kilo puwo kevilo momu panonga pe ningu nuqo pelo lupe kevilo eno kiu laghilo nomu pano shiyeh kuphu kevilo ipike. Nino titoi pelu aye ninguye kinikulu shiyeh shinani eno alhokuthu ajekipi ahukulu shi peithano ati anu kutolo amheghi pekishe nani ipi pitsuke.

¹³ Ningu kipimi ghenguno aghime ithuluno haphevepe namu ni ghime kuzupu nguno akimkheu nighime tsuke eno tishimu ningu khami ghupuaghi tsuke.

¹⁴ Nino itaghi ozahqo hexavetsu ghi timi mthekumoqo sasu kishi puzu kiyeshi ani kya? Ninguno tishi aye noye nishou ologhu ideveno ningu kutsaveno ninguye milakhimu ghupe qhitsumove nanike.

¹⁵ O AMPEU Israil Lhou: Nono kuchou Lhou ke, ninguye ishi tsala hipaulo achili shi pojo ighi kulumiqoke. Nino nixine pesu ozulo puthugho anie. Ninguye ozulo ighi kuzu kumoe.”