EZRA 8 - BAIBEL (BSI)

Ezra gholo Ideighi Kemi

¹ Ahaserus no Babilon lo ka akelo Ezra gholono Jerusalem lo ideighikemi sakiphemi eno panongu kughukoqo je:

^2-14 Fineha lagha lono Gershom, Ithamar lagha lono Danel, Shekania laghalo David limi lono Hatush, Parosh lagha lono Zekharia eno kutami 150 Zerahia nu PahatMoab lagha lono Eliehonai eno timi 200, Jahazel nu Shekania ti Zatu lagha lono eno pa gholo timi 300, Adin laghalo Jonathan nu Ebed eno timi lhopungu, elam laghalo Athalia nu Jeshaia eno lhotsuni, Shefatia laghalo Mikhail nu Zebadia eno timi lhotache. Joab laghalo Jehiel nu Obadia eno timi 218, Bebai laghalo Bebai nu Zekharia eno timi muku tache, Bani laghalo Joshifia nu Shelomit eno timi 160, Azgad lagha lo Hakatan nu Johanan eno timi 110 Adonikam lagha launo Elifelet, Jeuel, Shemaia eno kutami lhotsugho panonguye athiuno ighi, Bigvai lagha lono Uthai, Zakur eno kutami lhotsuni.

Ezra no Achinemi Phulu

¹⁵ Ino panongu sawo Ahava kudau qowuakeu ghokilo kumqono tile tsala kuthu aghazu shipe ngo eno timi ighikulumi hekutsuju kelo achinemi aghie ikemu Levi laghaqo lakhimu kuhae.

¹⁶ Tighenguno ino Levi laghami pano toku kupuwuke - Eliezar, Ariel, Shemia, Elnathan, Jarib, Elnathan, Nathan, Zekharia eno Meshulam noqo kusaighipe. Shikukami kini Joiarib ngo Elnathan pamaghi ku.

¹⁷ Ino panongu hape Kasifia noghalo sakipheu Iddo lau puwu eno pa thikuzumi eno achineki juche kemiqo vilo Jerusalem lo Alhou chinekilo mlanikemi nilau puwu tsu lopi iniju.

¹⁸ Alhou no tucho kivi qholono panonguno timi thaikemi lakhi Sherebia ngo panuliqo eno pa thikuzumi chighi tache puwutsu. Sherebia ye Mahli laghami Levimi lakhike.

¹⁹ Panonguno Merari lagha lono Hashobia ngo Jeshaia pama gholo panu eno pa thikuzumi muku ghi puwu.

²⁰ achineki lo akumlami timi 220 Levi lagha kukuphumi khaghi David ghuloki lono achinekilo akumlami shipenike pichetsu keqo ghi tilehi ae. Panongu kumtsu lakhikhi je yepe puae.

Ezra no Timiqo sasu Kumvu

²¹ Ninguno Ahava ghokilo ngo akelo ningu Lhou sukumsa piyenike kumvu nike piputotsu, eno ningu pelo akivishi chewulu, ni sushotsu, nitinuli eno ni nhemghaqo sasu chelu penike khuinilu.

²² Ino akukau vilo pikeuno khunono niLhou mlla chenikeno ni Lhou no pa susho cheni eno shiluksa aghimeye pa mthave kemi lau ighi cheni ipi pipua kehu akukau vilo ni ghuzulalo aghumi launo ni khe sasu wupenikemi ghushimi eno khurshi ghushimi akukau vilo khunike kujove.

²³ Tighenguno nino kumvu no niju tuchotsu penike Alhou vilo khu eno pano tishi khochile tsu.

Achineki Kumllagho

²⁴ Ino achinemi sakiphemi chighikini kishelu Sherebia, Hashabia eno kutami chighi.

²⁵ Akukau, pa mijekutsumi eno Israilmi tile akeqono ni Lhou kumllaki ghenguno akumllagho tsandiyi, shuna eno akhu ajukhu tsukeqo ino mighipe panongu tsu.

^26-27 Ino Pisa aho shiju eno panongu tsukeu kuqhakelo - tsandiyi no metrik ton mukukini, tsandiyili akhu 100 tsukelo tiye kilogram lhotsuni, shunayi kilogram 3,400, eno shunakhu muku kelo kilogram tacheno tuxa eno amekusho alazayi akhu kini ghi tile a, shuna me qhemi shiae.

²⁸ Ino panongu vilo pi, “Nonguye shikimthe pe nongu puasu Lhou tsuvae eno akiniqo khikhi ningu MPEU Alhou lau kumsagho tsupuwu keno tighi shikimtheve tsuae.

²⁹ Hi akiniqo Achineki tomokelo akivishi khekutolo eno achinemi, Levi laghalo sakiphemi eno Jerusalem lo kichimiqo lau lakhimu puhamono achineki lono mighi pesu tsulo.

³⁰ Tighenguno achinemi eno Levi laghaqono tipaqo pewo Jerusalem lo Alhou chinekilo qhivenikeu makho puluve.”

Jerusalem lo Idewo

³¹ Ningu Ahava ghoki lono aqhi atughiu atsala chighi akiniulo ningu tileno ixasu Jerusalem lo wu. Alhou no ni sache eno alalo nighumi launo ni sushope che.

³² Ninguno Jerusalem lo ighi eno tile atsala kuthu ngove.

³³ Atsala abidini nino Achinekilo wu eno tsandi, shuna khu jukhuqo hu mighipe Uria nu Meremot achineu tsu, pa gholo Fineha nu Eleazar eno Levi laghami, Jeshua nu Jozabad eno Binui nu Noadia noqo ulo suvetsu.

³⁴ Ti kumtsu kihi eno ahoshi puzu apasu shi yepe qhive.

³⁵ Tipa ghulokilo khunoqono hakughutsu keu lono ideighi keno piti kumlla kepu pe Israil Lhou tsu. Israilmi kumtsu ghenguno amshitsu chighi kini, bheri lhotoku tsugho, bheriti lhotsuni tsuni pesu mllae, anetsu chighikini pesu panoqono pano shikimthe keu shipesu mllae. Hi lhoxu kumtsu Alhou lau agha shikeu shi pitipe mllae.

³⁶ Akukau yezah kaku ghi panonguno pesu Eufrati kulola ghakhulo ahng eno pa qholo kijemi shiakeqo lau tsuve eno tinguno tilauye timi qono Alhou chineki shikimthe keulo kuphu acheuve.