EZRA 6 - BAIBEL (BSI)

Darus no Cyrus pasu Phulu

¹ Tighenguno akukau Darus no Babilon lo khaghi ghili apasughi yepua keqo phuju penike ahza tsuve.

² Tipau pasu Media yeghi phughi Ekbatana lo aghi. Likukuzu lakhilo hitoi yepuaghi:

³ “Akukatou Cyrus no kawo ampe lakhi shi akelo Jerusalem lo Judami no heqhino piti mlla chekeu Alhou ki hu akiqhelau miter mukutsuni akijelau miter muku tsuni shikitheve penike ahza tsuvae.

⁴ Putukeulo atuno ajo kuthu eno pashou asuno ajo lakhi suni eno tipaqo ghenguno puwove kepu kumtsu akukau kinibo lono tsuni.

⁵ Shuna ngo tsandiyi khu ajukhu jeli Nebukadnezar no Alhou chineki lono suwove keqo kumtsu suleghino puzuu achine kilo puache ketoi qhiveni.”

Darus no Ahza Tsukithe

⁶ Tileno Darus khokichile hipau tsupuwu: “Eufrati kulolau ahng shiakeu Tatenai ngo Shethar Bozenai eno Eufrati kulolau nokusami sakiphemi lau tsu ani. “Achineki shikithe akeu lono putosuvelo,

⁷ eno Judami ahng ngo Judami akupuna tsumoni eno panongu pelo thosu kiphu alo shipelo.

⁸ Tinguno alauno nonguno panongu kuphu mayesa keu yezah ino tsu ani. Alhou ki shinike ghenguno kumunu mono Eufrati kulolau akukau suqha qhalukeu jeli kumtsu pe aki kishilo tsuni, tishianguno akumla shipishe pemonike.

⁹ Tinguno alau kiu avehupu shini keno amshitsu, bheriqo piti kumlla pe Kungugha Lhou tsuni keu momu athi, amti, aji, momu teli hipaqo Jerusalem lo achinetomi qono avehupu shi akeu pe atsala kumtsulo vezumono tsuni.

¹⁰ Panongu pelo Alhou mlo kiqipu shi mlla luno ni akukau eno inuliqo kuxu ghenguno akighini shilupe kepushilo.

¹¹ Khuno ahza hipau hebideveni keno pa kisu sujope xukumtsu puzu pa qhuqhivelo eno pa kiye pesu xale kumqove tsulo.

¹² Jerusalem pesu pa mlla penikeu-a shi kishelu keu Lhou pelo kukami momu shiyeh khunono ahza shipixiveni eno Achineki hipau hexanike pukaputsani keno tipaqo haleve peni. Ni Darus no ahza hipau tsu ani. Ahza hipau qhoi papelu masake.”

Achineki Shikimthepe Tsu

¹³ Ahng Tatenai ngo Shethar Bozenai eno panongu kusami kijemiqono akukau Darus zah kutsu tho lono shikuputsu.

¹⁴ Tithiuno Judami sakiphemino pano kumla mlakibe luve eno panonguno tungkupu Hagai ngo Ido nu Zakharia no pikeu huno panongu mlo shikuloghive. Achineki ye Alhou no ahza kutsu toi eno Persia lo kukami Cyrus ngo Darus eno Ahaserus noqono ayezah puwukeu toi shiqhiluve.

¹⁵ Achineki shiqhive keu tsalaye akukatou Darus no kawo ampe akutsughou lo Adar qhi akuthuni no ke.

¹⁶ Achinemi, Levi laghaqo eno timi kutami kutomo ti hakughutsu lono ideighi keqono alokivi kijelono Achineki shikimthepe khaqhilu.

¹⁷ Shikimthe pe khaqhikeu tsalalo amshitsu alhothe 100, bheri 200, bheriti 400 anetsu chighikini Israil shiyeh chighikinino axine shivekeu axine kumllagho ghenguno tsukeu pesu heqhi mllake.

¹⁸ Tithiuno panonguno achinemi eno Levi laghaqo pelo Muse yezahlo akeu kiqi lono Jerusalem chinekilo Alhou kumla jeli shipenike pututa kumla kijeluvepe.

Hechekulu Pinye

¹⁹ Hechekulu pinye huye ampelo aqhi atughiu atsala chighi abidiu lono hakughutsuve kemi ideighikeqono pinilu.

²⁰ Kughengu tipa ghulokilo achinemi eno Levi laghaye panongu shikimthepe ae ike hakughutsuve kemi ideighi keqo ghenguno ngo panongu ghenguno ngo ishi Hechekulu ghakishi kumtsu Levi laghano lhoxuqo heqhitsuke.

²¹ Aghakishi shiye Israilmi hakughutsuve keu lono ideighi keqo ngo timi kutami tipa-alo akumtha laghiqo pheveno Israil Lhou AMPEU mlla wuve keqono chu.

²² Atsala tsuni kutolo panonguno Kholaqhi sumokeu sho Pinye ikhilu. Panonguye alokivino chhitoive kughengu AMPEU no Asiriya Kukatou pelo panoqo shou amlo kiqi shi aghipe ikehu pa pelono Israil Lhou Achine ki shikithe keulo panongu kumlalo kuphulu peke.