EZRA 5 - BAIBEL (BSI)

Achineki Kumla Huthu Kithe

¹ Tipa ghulokilo tungkupumi kini Jerusalem ngo Juda yeghilo ae, Hagai ngo Iddo nu Zakharia pama.

² Pamano Israil Lhou lau no asutsa pesu Shealtiel nu Zerubabel ngo Jehozadak nu Joshua pama lau sughi, pama vilo itaghi Jerusalem chineki mlathu penike pitsu eno mlathuve eno tungkupmi pama ghi panoqo kuphu.

³ Tileno Eufrati nguno kulola yeghiqhalo ahng Tatenai ngo Shethar Bozenai eno pa kusami Jerusalem lo ighi no iniju. “Khuno achineki hipau shikithe penike eno aliwo mlave lopi ahza nongu tsu kya?

⁴ Timi khunoqono tile mula anikeno panongu jeghi tsulo.”

⁵ Ikemu Alhou no Judami sakiphemi shou jupukupe akehu Persia kijemiye Darus lau hipatsa yepuwu puzu khokichile ighimoke kutolo kiumu lakukha kugha shitsumoe.

⁶ Panonguno asutsa hipau pesu akukatou lau tsupuwu:

⁷ “Akukatou Darus, noye alokughuno lono ayehpelu peniu.

⁸ Akukau pelo ithipeni shi akeuno ninguno Juda ghakhulo wuno ithulu keuno Alhou akijeu Achine ki ye atu kuloghi pesu shikithe eno amkhusu pesu puwukeulo suno mla ani. Akumlaye kutsha kughashi ajuiche mla anie.

⁹ “Tile ninguno sakiphemiqo vilo Achineki shikithe nikeu eno tipaulo anhemgha pewo sunikeu zah khuuno panongu tsu kyapi iniju.

¹⁰ Ninguno panongu je ghi iniju tishianguno akumla hipaulo atsu kupumiqo je ovilo pini yeke.

¹¹ “Panonguno khochile, ‘Ninguye kungugha eno ayeghi Lhou qemiqoke ampe kutomo shivae, Israil kukami akumtomi lakhino khaghino hi shiqhino anhemgha pewo sukeu chineki hu ninguno shikithe anie.

¹² Ikemu ningu puasuno Kungugha Lhou gha shikighideveno pano Khaldi kuka lagha lono ighikeu Babilon kukau Nebukadnezar pelo panoqo leluvepeke. Achinekiye kutsaleve eno timiqoye Babilon yeghilo hakughutsuve.

¹³ Ike Akukau Cyrus no Babilon lo akukatou shikeu mpe atughiu lono pano Achineki shikithe peni keu ahza tsue.

¹⁴ Nebukadnezar no Jerusalem chineki lono shuna ngo tsandiyi khu ajukhu pewo Babilon chinekilo qhive keqo hu Cyrus no tsu chileveke. Pano hipaqo khu ajukhu pesu Juda lo Ahng shipenike kishelu keu Sheshbazar tsue.

¹⁵ Akukatouno pa vilo tipaqo pesu Jerusalem chinekilo tsu chileve penikeu eno Achineki puzuu kiphualo shikithe peni keu shi pitsu

¹⁶ tighenguno Sheshbazar no ighi puzu tipau boqhalo qhalue eno tipa tsala lono ishi kutolo akumla shi aphike, ikemu Achinekiye itehi kutolo shiqhilu mphie.’

¹⁷ “Itehiye, Akukau pulou shi aghi aye Babilon lo kukami ghili yekikithi kakulo Cyrus ye Jerusalem lo Achineki shikithe penikeu zah tsukeo mokeno lheju pelo eno hipau vehulo opulou pesu ni pithitsulo.”