EZRA 4 - BAIBEL (BSI)

Achineki Shikithenikeu Lakhae

¹ Kughou Judami ngo Benjaminmi ghumino, hakughutsuve kemino Jerusalem lo ideighiveno Israil Lhou AMPEU chineki shikithe ayea pikeu chilukeno

² aghumino Zerubabel eno pa gholo sakiphemiqo lau ighi puzu pi. “Nighi nongu gholo Achineki shikuqhanie kughengu nighi nonguno kiutoi noLhou mlla acheni keno titoi Asiriya lo akukau Esarhadon no nisasu hile ighi ke lono ishi kutolo pa mlla achenie.”

³ Ikemu Zerubabel ngo Joshua eno Judami sakiphemi kuqhano khochile pi, “Moe, nonguye hipau kumlalo nongu saje kuhae. Israilmi Lhou chinekiye akukau Cyras no ahza tsuketoi Israilmi ninguno shi nani putsae.”

⁴ Tileno tipa yeghilo xuakemino Judami mlo shikuloti tsu eno panongu pelo aki shimove peniye panoqo shikumsake.

⁵ Panoqono Persia lono kijemi ighikeqo zuizaveno panoqo kumla lakha auvepe. Timi tipaqono Cyras yehkipe ghuloki lono Darus yehpe ghuloki kutolo akumla vekukhatsu ache.

Jerusalem Shikithenike Lakha

⁶ Akukau Ahaserus kuka hukuthu ghulokilo Juda eno Jerusalem lo akemiqo ghumino kaku yepesu panoqo shou akumou tsa sughi.

⁷ Persia lo Akukau Ahaserus no ka ake ghulokilo ghi Bislam, Mithredat, Tabeel eno panongu kusamino akukau lau yekili yepuwu, tiye Aramaimi tsauno yeno phisukelo pekili ghi shi.

⁸ Aghakhu bocholo Ahng Rehum ngo akiyetou Shimshai no Ahaserus lau Jerusalem ghili hitoi yepuwu:

⁹ “Aghakhu bocholo ahng Rehum, akiyetou Shimshai pama kusamiqo, kughakuthami kijemi eno inahuuye Erek ngo Babilon eno Elam yeghilo Susa akeu lono saighikeqo ti

¹⁰ akijeu eno akumtou Ashurbanipal no hakiqe sasu Samaria phughilo Eufrati kulola kudau aghakhulo akeulo sawo qhivekemiqo launo yekili ani.”

¹¹ Yekili lo hitoi yepuwu: “Akukatou Ahaserus lau Eufrati kulolau pa qemi akeqo launo.

¹² ‘Ninguno akukau pelo ithi penishi akeuno aghakhu kutau qha lono ighikemi Judamino Jerusalem lo ngoluvae, alhoksau eno hekibide phughi hu shikithe ani. Panonguye aphughi kupuwu shikithe thuvae eno kushuwo kumolo tipau shiqhiveni cheni.

¹³ O Akukau, aphughi hipau shikitheluveno tipau kupuwu shiqhiluve aye timiqoye zahme otsu move nani eno okuka zahme jeli ithulu chekeuye mikheve nani.

¹⁴ Ninguye akukau qhoqhu chekemike ghenguno tikithipu shi vepeni shi amoe, tighenguno ninguno akukumsu tsu akeuno

¹⁵ opuasu yekikithi kaku lhekide kudayi penike ahza tsupe nishi ani. Nono lhejupe aye aphughi hipauye pulhapujulo hebide che keu eno khaghi nomu aghakhu bocholo kukami ngo ayehpemi akupuna tsu ighikeu lhelu nani. Tighenguno aphughi huye kutsa leveke.

¹⁶ Nino thebei ithive ake aphughi hipau shikitheve eno tipau kupuwu shiqhiluve aye Akukau noye Eufrati kulolau aghakhu bocho akeu qhasumlave nani.’ ”

¹⁷ Akukatouno khochile hitoi tsupuwu: “Aghakhu bocho ahng Rehum ngo akiyetou Shimsai eno pama kusami Samaria ngo Eufrati kulola qhalo akemi lau petha tsu ani.

¹⁸ ‘Nonguno ilau yekili tsupuwu keu hu pekideno phisuvae.

¹⁹ Phujukide kudaju penike ino ahza tsu ke eno kuchouno phulu keuno Jerusalem ye khaghi ghu loki lonomu akuka yezah hexa ache eno hekibidemi ngo akupuna kutsumino tipau chhitoi ache.

²⁰ Kukami kumtomino tilehi ayehpe che eno Eufrati kulola qhalo ayehpeno zahme jeli ngo akuka zahme qhalu cheke.

²¹ Tighenguno ino ahza tsukithemo ke kutolo tipau phughi shikithe pemonike lakhavelo.

²² Mtazu hipau shivelo tishianguno imlo ghuza pemonike.’ ”

²³ Kughou akukatou Ahaserus wu yekili Rehum ngo Shimsai noqo phipiye keno panonguno mtazu Jerusalem lo wuno Judamiqo anguka lono lakhave.

²⁴ Tighenguno Persia lo Darus no kakeu mpe akiniu kutolo Achinekilo akumla lakhave eno kiumu shimove.