EZRA 3 - BAIBEL (BSI)

Achinekilo Mllathuve

¹ Kughou aqhi tsuni shivekeno Israilmiye aphughilo kumqoluve eno timi kumtsu Jerusalem lo hekutsu luve.

² Alhou wu timi Muse Yezahlo yepuakeu toi Jehozadak nu Joshua no pa kusami achinemi sasu eno Sheltial nu Zerubabel no pa laghaqo sasu Israil Lhou kumlla kiptia mlave eno tipa shouno piti kumllagho pe tsuve.

³ Pitikumlla-a huye puzuu shikeu alo shi eno panonguye tipa ghakhulomi msave ikemu inakijili AMPEU lau piti-kumlla gho pe mlla auve.

⁴ Ayezahlo aketoi panonguno Apusholo Ngokeu pine pinyi eno atsala lo tipa tsalalo heqhi mllani keu kihitha tsukeu pesu aghashi che.

⁵ Tithiuye tamono pitikumllaghoqo, aqhi kithe pinikelo mlla akeu gho eno AMPEU mllanike kumqokelo mllakeugho ishi pesu mlla cheuve, tinguno alaughi puloniqhiyi AMPEU mllakeu gho ghi pesu tsue.

⁶ Timiqoye Achineki shikithe keu huthumono akemu aqhi akutsuniulo atsala atughiu lono panonguno AMPEU lau piti kumlla gho tsuthuve.

Achineki Shikithe Thuve

⁷ Panonguno atu eno asu kumlamiqo pisa tsu eno akuchu kushopu ngo oliv teli pesu Tur ngo Sidonmi tsupuwu no kedarsu Libanon lono puighitsu penike kilhishove eno azughi vechesu Jopa lo pu ighi tsu penikeu shi, hipaqo kumtsu akukau launo ahza lupuzu shike.

⁸ Panonguno Jerusalem lo ighi keu mpe akiniu aqhi akiniu lono achineki phu-alo ighi puzu akumla huthu. Akumlaye ideighi kemiqono shi eno Sheltial nu Zerubabel, Jehozadak nu Joshua eno panongu kusami, achinemi eno Levi laghaqo kuqhano akumla shilu.

⁹ Akukughu kumtsu pesu Jeshua, Kadmiel, Henadad eno panoqo limi eno alagha no Achineki shikitheni keu kumlalo kutupo kuqhaluve.

¹⁰ Kughou akumlamino Achineki boqha qhaluve keno achinemino pano phi nhemgha pepuluveno afuko igha nike pesu ngoluve eno Asap lagha Levimino alazayi kuyighanike puthugho ngoluve. David akukauno shipiye ketoi panonguno AMPEU sheqhetsue.

¹¹ Panonguno hipau lephe pesu AMPEU akishe tsu hitoi pheide ae: “AMPEU ye aloe, pa kikimiye eno pa kukupu Israilmi lau lhokta kuto acheni.” Timi kumtsuno akiqheu lono igha AMPEU she, kughengu achineki boqha kumla shiluveke hu.

¹² Ikemu achinemi kichimi kutomo, Levi laghaqo eno sakiphemi kichimi khunoqono puzuu chineki ithulu puakeno eno itehi chineki boqha qhakeu juapuzu ighono igha qa auve, ikemu khami ye alokivi lono igha ae.

¹³ Akuqa ngo alokivi ghugha kuqha keuno putou ghi chiluae eno alokivi ghugha ngo akuqa ghugha kimchimlave.