EZRA 1 - BAIBEL (BSI)

Cyrus no Judami Idewope

¹ Persia Yeghi shou akukau Cyrus no kake mpe atughiulo Alhou tsa Jeremiya kichi lono pikeu shikupu penike AMPEU no akukau Cyrus kipekulhu puzu pa yeghiqha kumtsu lau asheshu eno akiyelo ghi qhivepe.

² “Cyrus akukauno hitoi pi ani, kungugha Lhou no ayeghilo yehpe kuka itsuvae eno Juda yeghilo Jerusalem lo pa ghenguno achineki lakhi shitsu lopi ipichevae.

³ Ayeghiqhalo Judami pawu timi kumtsu Juda lo Jerusalem lo ideighino Israil Lhou AMPEU ki mlanike ideighilu nani. Alhou no nongu kumtsu kumghatsu peniu.

⁴ Alhou Achine ki Jerusalem lo akeu ghenguno pulokiniu kumllagho tsu keu nguno alau Judami khunoqono wumoni keno panoqono wunikemiqo ghenguno tsandiyi, shuna, tinhemgha eno lhoxuqo pe kuphu puwu ni.”

⁵ Alhou no Juda ngo Benjamin laghalo sakiphemi, achinemi eno Levi laghaqo lau hakutho tsuno achineki shikithe penike mtazu ide ighipe.

⁶ Panoqo sukumxalo achekemi khunoqo Persia yeghilo achekeno tipaqono, tsandiyi khu-ajukhu, shunayi, tinhemgha, akhokupu lhoxuqo eno amekusho nhemgha eno achineki ghenguno akumllagho pesu tsupuwu.

⁷ Akukau Cyrus no puzuu Nebukadnezar no Jerusalem chinekilo pewuveno pano lhou chinekilo puavekeqo shunakhu eno kutau amekusho nhemghaqo pe tsuchile.

⁸ Pano Persia yeghi lo akini pighiu Mithredat ipikeu vilo agho tipaqo pe Juda lo idewo chekemi gholo sakipheu Sheshbazar ulo suvetsulo pive.

^9-10 Cyrus no tsukeqo hitoi: Akumllagho ghenguno Shunakhu 1,000 Akumllagho ghengu tsandiyi khu 1,000, ilakhu muku toku, shunakhu aghulolo shighi tsandiyi khu aghulolo 2410 eno kutau tachutaghu 1,000.

¹¹ Kumtsu kuqha kelo shuna ngo tsandi nhemgha 5,400 ke, tiye hakughutsuve kemi Babilon lono Jerusalem lo saighi keqo gholono Sheshbazar no sughike.