EZEKEL 8 - BAIBEL (BSI)

EZEKEL NO KUNGUNHETSU LONO ALHOU ITHULUKEU AKINIU ( 8.1—10.22 ) Jerusalem lo Ajulho Mlla

¹ Ni haphe puwuve keu mpe akutsughoulo aqhi akutsughou atsala apunguni, Juda lono haphe puwuvekemi sakiphemiye ikilo igholo iqa kuho ake. Zuleno Akughushu MPEU kuka ishou ighive.

² Ino pishipuku kunguu jukelo kungunhetsu lono timi lakhi ju akoghe toikeu ithulu. Pa phimpi achita nguno aqouye ami toi ithulu eno pa chita nguno kunguuye alazayi toi mlapuyi yebide pesu ake.

³ Pano au lakhi toikeu chhopuwo puzu ikutsusa lono itsuquluve. Kungunhetsu hipau lono Alhou ghunguno amlhu kunguu ipeqheluve eno Jerusalem lo isawuve. Pano Achineki lo ilochekeu ahuu kikha alou Alhou loghu kighide pushi ajulho qhipuakeu alo isa ilove.

⁴ Tileno Israil Lhou achekeu piyekeu shi saghu saghuyi keu kuvu ino ithulu, tiye ino Kebar ghoki phivi lono tipau ithulupe puakeu thoke.

⁵ Alhou no ivilo pi, “Thinikuau timio, ahuu kudau jupuwulo.” Ino jupuwu ikelauye iloghichekeu ahukikha phivilo agho kiptia kupunulo Alhou loghu kighide pushi chekeu julho hu ino ithulu.

⁶ Alhou no ivilo pi, “Thinikuau timio, kiu shiani keno noye ithulu anima? Israil lo akemino hilau kuchhube kutsula kiu shiani keno julo, ikimthe-a lono putosu kithe ihapheve anike. Hinguno alau kujomzakepu thime nono ithulu nani.”

⁷ Pano akikhala khalau ikulolalo isawu eno akuputulo akikighipe lakhi akeu ipiye.

⁸ Pano pi, “Thinikuau timio, hileno akuputu hepho ilolo.” Ino tipau hepho ilokelo akikha lakhi ithulu.

⁹ Pano ivilo pi, “Alou ilolo eno panonguno tilau kuchhube kutsula alhoksa shiakeulo jupukulo.”

¹⁰ Ike ino alou ilo eno jupuku kelo akuputulo apighi ngo mithekumo lhoxuqo eno thime kutau khipaqo Israilmino mlla acheni keno tipaqo yekuxapuku keuno nhachhipe ae.

¹¹ Israilmi sakiphemi lhotsuni tile ae, tipa gholo Safan nu Jazaniya ghi ake. Panongu milakhi khino tsungquita kiptibo lakhikhi peae eno tungquita lono amchhi phoikughi ake.

¹² Alhou no ivilo ishi iniju, “Thinikuau timio, Israilmi sakiphemino kusuuno kiu shiani keno noye ithulu anima? Panongu kumtsu achebo lakhilo ajulho chhitoi akeulo mlla anike. Panoqono jekukivi shiakeuye: ‘AMPEU ye ningu ithulu amoe! Paye aghakhu qhive ake.’ ”

¹³ Tipathiu AMPEU no ivilo pi, “Hinguno kuchhube kutsula alau panoqono shichekeu nono ithuluni aphike.”

¹⁴ Ike pano Achineki ahuu kudau akeu khagholo isasu wu eno tilehi totimiqono Tamuz lhou thivekeulo mloqa akeu ipiyeke.

¹⁵ Pano ishi iniju, “Thinikuau timio, noye hupau ithulu anima? Kuchhube kutsula hinguno alau ghi nono ithuluni aphike.”

¹⁶ Ike pano Achineki kikhala alou kudau isasu wu. AMPEU ghunoalo ahukikha kichi phivilo agho kiptia ngo ikulola dolo timi muku pungua ake. Panonguye AMPEU ghuno-a kudau panoqo zupo kughopuwoveno kipelau kudau itsaiqi puzu tsukinhe ipechekeu mlla ae.

¹⁷ AMPEU no ivilo pi, “Thinikuau timio, noye tipau ithulu anima? Juda lo akemiye kuchhube kutsula thime nono ithulukha keu hu tipaqo shiche keu likhiye aghaqimovae eno heqhi buqhikeu aghakhuqha kumtsu nhakha akeu likhiye aghaqimovae. Panonguye Achineki alou ghi ighieno shiauvae eno ipelo alau aloghu ide anipeke. Julepi, panonguye ihulo molokeu shi itha igha auveake!

¹⁸ Ikemu panonguye iloghu kighide kumtsu pumasa nani. Niye panongu pheveni chemoke momu panongu jupe imlo iqiveni chemoke. Panonguno shiluke thaqhu ighamuku ilau khuini nani ikemu niye panoqo tsa initsumo nanike.”