EZEKEL 7 - BAIBEL (BSI)

Israil shekha Kupunuva

¹ AMPEU no iputsa puzu ivilo pike,

² “Thinikuau timio, ni Akughushu MPEU no Israilmi yeghi vilo piakeuye hike: Ashekha shivae!

³ “O Israil, ashekha hu ighivae. Nonguye iloghu puniake kughengu nonguno kiu shipuani keno tipau ghenguno ino kughatha beni chenike. Nonguno kuchhube keu kumla shike ghenguno ino olochileni cheni.

⁴ Niye nongu phepupoveni chemoe momu kimiyeqhiyini chemoe. Nonguno kuchhube keu jeli shiveke ghenguno niye nongu ghimeqhini cheni tishi anguno niye AMPEU kepi nonguno ithi nani.”

⁵ Akughushu MPEU no piakeuye hipauke, “Nongu shou kutsa kungokeu lakhino lakhi papesu ighi nani.

⁶ Ashekha hu ighi ani, hiye ashekhake. Nonguye kishekhave niake.

⁷ Nongu ayeghilo akemi ghengu ashekhaye cheake. Naghutolo achine-alo ahukulu ghugha shimove nikeu aghulokiye kupunuvae, muqhu-mzai keu likhi shiniake.

⁸ “Itehiye itheno ino nongu shou iloghu kighide kumgho pukuni cheni. Nonguno kiu shipuani keno tipau ghenguno niye nongu shou kughathabe ani eno nonguno kuchhube keu mlake ghenguno ino nongu lochileve nanike.

⁹ Niye nongu phepupoveni chemoe momu kiumu nongu kimiyeni chemoe. Nonguno kuchhube keu jeli mlapuakeu ghenguno ino nongu ghimeqhini cheni, tishi anguno niye AMPEU ke eno ino nongu ghimeqhi ani kepi nonguno ithi nani.”

¹⁰ Israil ghenguno kutsakungo keu tsala cheni. Heqhi buqhikeu alau shi anike. Aqhekuzaye akutsuqalo anike.

¹¹ Heqhi buqhikeu kusakugha shi thuwu iku anie. Tipaqo lakhimu panoqo ghenguno kuhave nani, panoqo kinikulu na aje kughushu na momu ajekipi shi akeumu lakhimu kuhave nani.

¹² Aghulokiye cheake. Atsalaye kupunu ighivae. Qhukemi na jekemi namu alokivishi momu amloksa shiakepu kuhake kughengu Alhou no kumtsu shou aphiphi shi ghimeqhi nani.

¹³ Kuqhukilimi khumu xuaghi puzu pano kiu puhapighive keno ithulukitheni chemoe kughengu Alhou loghuye milakhi khi shou auve nani. Alhoksami kumu akuxu puxupe qhini chemoe.

¹⁴ Afuko kuighake eno thwokha kumtsu kutokupui luve; ikemu khunomu aghukishilo wumoe kughengu Alhou loghuno kumtsu shou aphiphi shi ikughive nanike.

Israil xine ghenguno Aghime

¹⁵ Alaghila lono aghushi akelo akiqoloye kusukini ngo akhuava shiake. Timi khuuno aluzalo wuni keno aghu shikeu lono thi nani eno khuuno aphughilo ani keno kusukini ngo akhuavano kutsaqhi niae.

¹⁶ Panongu khamiye akhilalo achekeu miqhedu hakumsavekeu toi naghutoqolo pokawuve nani. Panoqo kumtsu pututa xine kumsu pesu isughughuyi anani.

¹⁷ Panongu kumtsu au qei eno akhonheno khokho shive nani.

¹⁸ Panonguno yeqhiye phi pepu puzu akumsano thuthu shi nani. Panoqo kutsusa miyelevetsu nani eno agilo akukujopu shi anani.

¹⁹ Panonguno xinexigha toi alaghilalo panowu shunayi ngo tsandiyi peve khave nani, kughengu AMPEU no pa xukighide leqhikeulo shunayi pina tsandiyi pinamu panoqo xamla nani. Panonguye tipaqo peitha puzu pano khuamzu ghapiqimla momu panoqo po sunhei mla nani. Shunayi ngo tsandiyino axinelo panoqo musu sawuveke.

²⁰ Ghuthu lakhiye panonguye panowu achiku achila jukivi jupesu qheza cheke, ikemu tipaqo peitha puzu kuchhube kutsula julho shipeqhi cheke. Tishike ghenguno AMPEU no panoqo pelo pano kini kulu jupesu aphimuqhu vepeke.

²¹ AMPEU no pi, “Ino inaghami pelo panoqo pukaqhi peni eno ayezah hexachekemino pano kinikulu kumtsu luvetsu nani eno tipau kitiqeve nani.

²² Kughou ichineki amekusho jeli achekeu shipixi akelo niye panoqo launo igi kungusu wuve nani; kupkamino hepho ilo puzu tipau shipixi nani.

²³ “Thwokha kumtsu kubangkeu shi anike, aghakhulo ghikiqhimino chhitoi ani eno aphughilo hekiqhi bukiqhi no chhitoi anike.

²⁴ Ino ashiayehqo gholo alhoksau shiayeh hilau saighi puzu nongu ki-alu luvepe nani. Kughono ino ashiayeh kutamiqo pelo nonguno mllachekeu-a shipixi peni keno tilano nongu gholo akumtou timiqo ghi pano mlo kumto hauve nani.

²⁵ Kughono amlo hauveni keno nonguno alokiqi phuju nani ikemu khilemu phumla nani.

²⁶ Kutsa kungo keu lakhino lakhi papesu ighi nani, eno asutsa lhoksano lakhino lakhi shelo sughi anani. Nonguno tungkupmi vilo kiu kungunhetsu ani kela phuwu nani. Achinemino timiqo vilo kutsupiye kepu ayezah kiumu kuhave nani eno muchomiqono akukumsu kivi tsukepu kiumu kuhave nani.

²⁷ Kukamino mloqa nani, sakiphemino laju achekeu pheve nani eno timiqono akumsano khokho shive nani. Nonguno kiu shipuani keno tipau ghenguno ino nongu ghimeqhi nani eno nonguno kutau shou kughathabe ketoi tipaphi shi ino nongu shou kughathabe nani. Hipau lono niye AMPEU kepi nongu piyeni cheni.”