EZEKEL 6 - BAIBEL (BSI)

AMPEU no Ajulho mllakeu Kileve

¹ AMPEU no iputsa eno ivilo pi,

² “Thinikuau timio, Israil lo naghutoqo kudau jupuwu puzu itsape pesu panoqo tsulo.

³ Israil lo naghutoqo vilo AMPEU tsa chilulo pilo, ni Akughushu MPEU no naghutoqo, atoqo, akuthokuqo, akhiqaqo vilo kiu piani keno chilulo pilo: timiqono asu-atu julho mllachekeu-a kumtsu kutsave nike ino azutakihi puwuni cheni.

⁴ Akumlla kipti-aqo ye xalepinyive nani eno tsungquikeu kipti-aqoye kuboleve nani. Tile timi akeqo kumtsu panoqo su-atu julho phivi lono pithi khave nani.

⁵ Israil lo timiqo kithikumo ino kuzaleve nani: panoqo saghi pesu akumllagho kipti-a sukumxa kumtsulo ino kuzaleve nani.

⁶ Israil lo aphughi kumtsu kutsaleve nani ikehu panoqo kumlla kiptia ngo asu-atu julhoqoye hepho kighiniyive tsu nani, panoqo wu tsungqui keu kipti-a hepholeve tsu nani eno panonguno mlakeu jeli kumtsu haukhave nani.

⁷ Aqha kumtsulo timiqoye pithive nani eno xuaghilupe keqono niye AMPEU kepi ithikithe nani.”

⁸ “Ino panongu gholo khamiye ghiqhi keu lono poluvepe nani eno ashiayeh kutami gholo apanagha wuvepe nani,

⁹ tilau panonguye hapupove kemiqo shi xuche nani. Tilauno panonguno ikumsu chilelu nani eno ino panoqo ghimeqhi eno shikukujoqhi kepi ithi nani, tiye kutau kumono panonguno akupulu kuhakeu mlo xapusu iqhiveke eno inguno asu-atu julho paviuve kehue. Panonguye pano shou angaghaive nani kughengu panonguno alhoksa ngo niqhunilai keu jeli shiveke.

¹⁰ Eno niye AMPEU kepi panonguno ithi nani eno ino panoqo kutughu chekeu jeliqoye abokumsayi shikichi keu kumo kena ipi ithi nani.”

¹¹ Akughushu MPEU no pi, “Nongu u chunu alo! Nongu pukhu ti alo! Israil lo akemiqo shou alhoksa, kuchhubekeu jeli akeulo, kughengu panonguye aghushi, puqumiyekeu eno kusukini lono thini ae.

¹² Khunoqo putou ani keno kusukini shiuveno thive nani; akupunulo akeqono aghushi lono pithive nani; khunoqo puxupe aghini keno akhuava shi thi nani. Panonguye iloghu kighide kumugho pukepu shi nani.

¹³ Akithi kumono asu-atu julho gholo akumlla gho kipti-a sumxa pesu kuzaleve nani eno atoghi qhemghai keu kumtsulo, naghuto kutsuqa kumtsulo, asubo akuxu shi akeu qholo ngo aphisubo qho kumtsulo, panonguno akumllagho pitiche keu-a kumtsulo kuzaleve nani. Tithiuno panongu milakhi khino niye AMPEU kepi ithi nani.

¹⁴ Ino panoqo shou iu chopuwuno panoqo ghakhu kutsave nani. Apeu asayeqha lono ahuu Ribla phughi kutolo, Israilmino khilehi kughuna aghini keno a-a lakhimu ghutsumo no shipsa khavekeu yeghi ino shivetsu nani. Tithiuno kumtsuno niye AMPEU kepi ithi nani.”