EZEKEL 5 - BAIBEL (BSI)

Ezekel no Asa Miyeleve

¹ AMPEU no pi, “Thinikuau timio, azuta tsughaminhei keu lakhi ikhi pesu okichimhi ngo okutsusa miyevelo. Tipathiu asaqo pesu akimighipu lono mighilo eno tipau pesu amqo kuthu shi kijevelo.

² Aphughi khasupe leakeu tave kethiuno asamqo kuthu gholo lakhi pesu tipau alouno pitilo. Asa amqo lakhiu ikhi pesu aphughi nguno khalau wuche kelono ozuta pesu ghitha pinyivelo. Asa mqo lakhiu akeuye amlhu gholo kuthole velo eno tiye ino izuta pesu tipau hananike.

³ Asa kitila qhipuaghilo eno tipaqoye ophi shelo ghopeqhilo.

⁴ Itaghi tipaqo gholo kitila ikhipesu amilo vesulo eno tipaqo pitive pelo. Tipaqo launo ami ipeghi puzu Israil shiayeh kumtsu lau nhakhawo nanike.”

⁵ Akughushu MPEU no pi, “Jerusalem julo. Ino li pesu ayeghiqha mtalo qhitsuke eno ayeghi kutau pelo li vehomxa pesu qhitsuke.

⁶ Ikemu Jerusalem no ino azah tsukeu hebideke eno liye ashiayeh kutami kumtsu nguno alau lhoksakugha shi pephe piyeke eno li suhupe akeu yeghiqha kutau nguno alau aghekulu kumo shike. Jerusalem ye ino ahza tsukeu pevetsu eno iyezah penikeu milivetsuke.

⁷ Tighenguno inilo O Jerusalem, ni Akughushu MPEU no kiu piani keno inijulo. Iyezah pelumovekeu eno ino ahza tsukeu papemove keu lono noye ashiayeh kutami osumxape akeqo nguno alaushi kupuna keu shivetsuke. Nono ashiayeh kutami khuayeh papewuveke.

⁸ Tighenguno, ni Akughushu MPEU no ovilo pianike niye oghumike. Ashiayeh kutamino ithukulupua lono ino oshou kughakuthabe nani.

⁹ Ino mithichekeu jeli kumtsu nono shikeu ghenguno ino Jerusalem ghimeqhi nani tiye puzuu ino khilemu shipuamo keuke eno itaghi khilemu shinichemo keuke.

¹⁰ Tishikeulo, Jerusalem lo apuazaqono atianuli chu nani eno atianulino pano puazaqo chu nani. Ino oshikighime nani eno khuu puxupe puaghini keno tipaqo aqha kumtsulo hakughutsuve nani.

¹¹ “Niye xuakeu Lhou ke ghenguno Akughushu MPEU tsaye hike - nonguno alhoksa jeli pesu ichineki kitiqevetsu, aphikumqhupu jeli nono shikeu ghenguno, kimiyemomithe puzu ino omicheveni cheni.

¹² Owu timi kikije kuthulo lakhiye kusukini ngo akhuava shipuzu aphughi lono thi nani; kikije kuthulo lakhiye aphughi nguno khalauno azutano ghiqhile nani; eno kikije kuthulo lakhi ashekhau huye ino amlhulo halesu nani eno azutakihi pesu panoqo haqhi nani.

¹³ “Noye imlo kighide ngo ixukighide kumka kumtsu ithi nani tiye ino ighaqivemoke kutolo tishi nani. Kughono hipaqo kumtsu shini keno tileno nonguno ni, AMPEU no nongu vilo pikepi mutsumishei ithi nani, nongu mikuchokumo lo niye shishe aloghu ideve kepi ithi nani.

¹⁴ No sumxape akeqo shiayeh khunoqono vechesu wunikeno ojukunatha nani eno putouno wuve nani.

¹⁵ “Ino amlo ide eno muqhumza nikelo ashiayeh nongu sukumxalo akemi kumtsuno msaichive nani. Panonguno aphumuqhuyi oju ithulu nani eno othaigha nani.

¹⁶ Ochuqupu sughiche keu laghi ino hekhavetsu nani eno opelo akhuava shipe nani. Okutsave peniye apiji tsughaminhei ka puwukeu toi noye akhuavano sukutu keu ithi nani.

¹⁷ Ino akhuava ngo tughashi puwu puzu notianuli heqhivepe nani eno kusukini, ghiqhi heqhi eno aghukishi puwu puzu nongu pithive nani. Ni, AMPEU no pivae.”