EZEKEL 48 - BAIBEL (BSI)

Alaghaqo dolo Ayeghi Kijelukeu

^1-7 Ayeghi lughi ahuu kudauye Akuloghi Zughi lono chesu kipela kudau Hethlon phughi kuto, Hamat Kakuthala kuto, Enon phughi kuto, Damaska ngo Hamat kukaqha kuma dolo alughi akeu kutoke. Alagha lakhikhino ayeghi kijekeu leqhi lakhi luni, tiye kipelau alughi akeu lono kulola kudau Akuloghi Zughi kutoloke, ahuuno apeu kutolo hipau apasu shikeu ghola lono: Dan eno tipau shelo Asher eno tipau shelo Naftali Manase Efraim Ruben Juda

Ayeghi mtalo pa kutakeu Leqhi

⁸ Ayeghi leqhi tipashelo akeuye pakutakeu lono peitha nike tikutashi qhi puani. Hiye ahuuno apeu kutolo kilomiter chighikinino tuxake eno kipelau no kulolau kuto loye alagha tsuvekeqo leqhi sasu aqhemike. Achinekiye hipau leqhilo ananike.

⁹ Hipau yeghi leqhi mutalo tipau kutakeu qha akushulau kilomiter chighi ye AMPEU lau ikhiphe tsukeu.

¹⁰ Achinemiqoye akimthe qha hipaulo aleqhi lakhi alu nani. Kipelauno kulolau kutolo panoqo salaye kilomiter chighi kinino tuxa eno ahuuno apeu kutolo kilomiter punguke. AMPEU Achine kiye hipaqha muta dolo ananike.

¹¹ Hipau akimthe qhaye achinemi Zadok polo kughukomi salake. Panonguye amikuchoshi iqecheke eno Israilmi kutami gholo supuzu akumou shikeu kuhae, Levi laghami kutamiqo ghi tishiwuve kemu panonguye tishimoke.

¹² Tighenguno panonguye Levi laghamiqo mheghi qha kupunulo pakutakeu aqha lakhi alu nani, eno tiye kumtsu nguno akimtheu qha shi nani.

¹³ Levi laghamiqo ghi pakutakeu qha lakhi alu nani, tiye achinemiqo wu nguno apeu. Tiye kipelauno kulolau kutolo kilomiter chighi kinino tuxa eno ahuuno apeu kutolo kilomiter pungu.

¹⁴ AMPEU lau ikhiphe tsukeu qhaye ayeghi kumtsu nguno akiviuke, tipa-aye lakhimu jemoni, kilikeu shimoni momu kutami lau kiqhepe puwuve moni. Tiye akimtheke eno AMPEU yeghike.

¹⁵ Pakutakeu qha qhipuakeu leqhiye kilomiter chighikinino tuxa akushulau eno akijelau kilomiter kinino tuxa huye akimthe kumoke, ikemu timiqono aqhano peitha nikeu. Timino tipau yeghilo ngoluvi eno tipau yeghi peithaluvi. Aphughi ye tipau mutalo alu nani,

¹⁶ eno tiye kodiboke, ako lakhino miter 2250.

¹⁷ Aphughi vehomxa ghi ako lakhikhilo kiumu shimokeu qha akijelau miter 125 ani.

¹⁸ Aphughi shive kethiu ayeghi qhivekeu, ti akimthe qha apeu kudau akeu qha kipelau akeuye kilomiter pungu akushu lau eno akije lau kilomiter kinino tuxa eno kulolau akeuno kilomiter kinino tuxa, hipau qhaye aphughi kughuna akemiqono alu chichulu nani.

¹⁹ Aphughilo kughuna akemi khukhumu, khuno laghami shiaghi mu tipau yeghi chilu nani.

²⁰ Ikehu ayeghi leqhi mutalo khipau kutashi puanikeno aqha pekuqhakelo kodiboke, ako lakhikhino kilomiter chighi kinino tuxake, eno tiye aphughino ngo akeu ghi sukuqha anike.

²¹ Hipau qha kipelau eno kulolau Achineki alou akeu, achinemi yeghi akeu, Levi laghami yeghi akeu eno aphughi akeu; ayeghi kutau akeuye ayehpe akeu kukapuu yeghike.

²² Tiye kipela kudau sukupha ani, kipelau alughi kutolo eno kulolauno Akuloghi Zughi kuto sukuqha ani, eno tipau ahuuye Juda lagha yeghino bothape ani eno apeuye Benjamin lagha yeghino bothape ani.

Alagha Kutami Yeghi

^23-27 Pakutakeu yeghi leqhi hipau nguno apeu akeu yeghiye alagha kutami akeqo lakhi khino ayeghi leqhi lakhikhi ithuluni, tiye kipelau alughi akeu lono Akuloghi Zughi kutolo ahuuno apeu kudau hipau apasu ghola lono luni: Benjamin eno pa shelo Simon eno pa shelo Isakhar Zebulun Gad

²⁸ Gad lagha tsuvekeu yeghi leqhi apeu kudau, alughiye Tamar lono apeu kulola kudau chesu Kadesh yeghi kiti zu kutoke eno tileno ahuu kulolalo Ijipmi lughi zususu Akuloghi Zughi kutoke.

²⁹ Akughushu MPEU no pike, “Tipa gholauno ayeghiye kijetha pesu aleqhi shino Israil laghami pelo amheghi shilu peniyeke.”

Jerusalem Khagho

^30-34 Jerusalem lo ilolukepu la chighi kini ani. Puwu puakeu tupikiye bidi kelo lakhi khino miter 2250 ke eno ako lakhi khilo khagho kuthuthu anike, lakhikhino alagha lakhikhi je kupe puani. Ahuu puwupua keulo khagho akeuye Ruben, Juda eno Levi jeku puani; kipelau puwupuakeu lo khagho akeuye Josef, Benjamin eno Dan jeku puani; apeu puwupuakelo khagho akeuye Simon, Isakhar eno Zebulun jeku puani; eno kulolau puwupuakeulo khagho akeqoye Gad, Asher eno Naftali jekupe puani.

³⁵ Aphughi puwupuakeu atupikiye ako bidi kujolo akushu lau khitohi keno pekuqhaju keulo tiye miter 9,000 ke. Hinguno hilau aphughi tipau jeye “AMPEU ye hile ani!”