EZEKEL 42 - BAIBEL (BSI)

Achineki phivilo Aki Kini

¹ Tipathiu timi huno isasu akikhala khalaulo wu eno Achineki jibo ahuu kudau aki lakhi akeulo sailo, tiye Achineki kulola kudau shekichilo aki akeu lono kushuwa kumolo.

² Aki hipauye akushulau miter lhopungu eno aqha lau miter muku punguke.

³ Tipauki tuxauno Achineki phivilo a-a miter chighi akeu sholu ae eno tuxauye akikhala khalau kudau akeulo qhapuakeu sholu ae. Tiye ajolha kuthu shi shipuake, kungu jolhaye aqhou nguno athiu kudau kushomhighi shike.

⁴ Hipau ki ahuu kudau phivilo ala lakhi ae tiye aqha lau miter pungu eno akushu lau miter lhopunguke, eno tikudauno ikulola ghi shepe pua.

⁵ Kunguu jolhalo achebo akeqoye amutau ngo aqhou jolhalo akeqo nguno mughughuike kughengu tipaqoye athiu kudau shipe qhikehue.

⁶ Ajolha hipano kuthulo achebo akeqoye akisheqho-la shou ake eno atsukuchono choqhepe puamoe, akikhalalo aki kutauqo toimoke.

⁷ Ajolha aqhoulo khalau kudau aki puwu puakeuye miter mukupungu shishoi ake, tipau khitohi keno tipau tuxake; eno tipau achili tuxa loye acheboqo ake.

⁸ Ajolha kunguu ashekhau loye aki khitohi keno titohilo acheboqo ake.

⁹ Achebo hikuma qholo aki ashekha lau kipelau khilehi puwukeu huthu keno, tilehi akikhala khalaulo ikulola lakhi ake.

¹⁰ Achineki apeu kudau aki lakhi tipau ki kimihi Achineki kulola shekichilo aki akeu lono kushuwa kumolo ae.

¹¹ Acheboqo zuu ala lakhi ake tiye ahuu kudau akeu paphike. Tiye akimighi ghi atho, koghekughu ghi aphiphi eno ikulola ghi aphiphike.

¹² Aki apeu kudau ajibolo acheboqo qhou ahukikha lakhi ake, kipela kudau ashekichi shiakeulo khilehi puwuakeu huthu akeno tipauloke.

¹³ Timi huno ivilo pike, “Aki hikuma kinikujo akimtheke. Aki hipaqo lono achinemi khunoqono AMPEU zulo ilocheni keno tipaqono akumllagho akimtheuqo chuchenike. Acheboqoye akimtheke ghenguno achinemiye tilehi akimthe kumllagho hipaqo qhitsu cheni: athi kumllagho eno axine momu lochilekeu kumllagho tsukeu.

¹⁴ Kughou achinemino Achinekilo apuzu akikhala khalau ipe nishini keno panonguye AMPEU mlla akelo pepu akeu phimini achebo hipaqolo qhive masake. Panonguye timino khilehi kumqo ani keno tipaqhalo wumphi lono aphimini kutau pepu masake.”

Achineki qha Mighiju

¹⁵ Kughou timi huno achineki qha alou kudau mighi tave keno pano isasu kipelau ahukikha akeu vechesu wupuzu khalau qha mighike.

¹⁶ Pano mighikeu qhaqhi ikhipesu kipela kudau mighi kelo tiye miter 250 shiaghi.

^17-19 Pano ahuu apeu eno kulola kudau mighikelo lakhi khilo akushulau aphiphi shiaghi, miter 250 ke,

²⁰ ikehu puwupuakeu tupikiye alou ako lakhi khilo miter 250 ae. Puwupuakeu tupikiyeno kiuno akimthe eno kiuno mthekumo keno kututa keu shicheke.