EZEKEL 41 - BAIBEL (BSI)

¹ Tipashelo, timi huno achebo amtalo ilo, tiye Akimthe-a. Tipaulo ilokeu laghilo pano mighiju kelo tiye akutholau miter kuthu ke

² eno akije lau miter pungu eno tuxa tuxalo putukeu tupikiye no akishilau miter kinino tuxa shiake. Pano achebo mighiju kelo tiye akushulau miter muku eno akijelau miter chighike.

³ Tithiu pano alou chebolo ilo. Tipaulo ilokeu laghi pano mighiju, tiye miter lakhi thoilo ae eno akije lau miter kuthu eno tuxa tuxalo putukeu tupikiyeno akishi lau miter kuthuno tuxake.

⁴ Pano achebo mighijukelo tiye ako bidi kujolo miter chighike. Tileno pano ivilo pike, “Hiye Shishe Akimthe-a ke.”

Putukeu tupikiyelo Shidapuku

⁵ Timi huno achineki shipuakeu lo puwu puakeuye kishi shishoyi ani keno mighiju eno tiye miter kuthu shia. Akuptu tipaulo shidapuku ghi, Achineki vehomxa pesu, achebo aghulolo akijelau miter kinini ajoshi shipua.

⁶ Achebo hipaqoye aki jolha kuthulo ake, ajolha lakhi khilo achebo shighi ghi ake. Achineki puwu puakeu khalau kudau huye, ajolha aqhou kuptu nguno akughupuu shike, ikehu acheboqoye akuptulo mumupe ake eno tipaulo fupe ngokeu shimoke.

⁷ Ikehu achineki puwu puakeqoye khalau kudauno junikeloye iku akutsuqa kutolo akishi lau aphiphi shi akeu toi ithuluke. Achineki kuptu khalau kudau dape akeulo, ti acheboqo ashou kudauno ikukepu laghi kini kije kuxaiku ghi shipe puae tishianguno ajolha aqhou lono amutau ngo kunguu jolha kumalo veho ikulu kepu shike.

⁸ Achebo hipaqo ashou kudau puwu puakeu huye akishi lau miter kinino tuxake;

⁹ Achineki ahuu kudau akeqo chebolo ahukikha lakhi ake eno apeu kudau akeqolo lakhi ishi ake.

¹⁰ Achineki veho mxa pesu ala lakhi qhape pua, tiye akije lau miter kinino tuxa shipuakeu ino ithuluke; eno tiye ayeghi lono miter kuthu peqhepesu shipuake eno tiye achineki puwu puakeu phivilo acheboqo boqha sasu aphiphishi kulaqape puake.

¹¹ Ala qhapuakeu ngo achinemino peitha chekeu ki kuma dolo a-a shepesu puae tiye akije lau miter chighi eno tiye Achineki jibo ihje ghi shepe qhike.

Kulolau shipuakeu Ki

¹² Achineki jibo kulolau akeu kudau a-a kumsashi akeu shekhalo aki lakhi shipua tiye akushulau miter lhobidi pungu eno akije lau miter shighi punguke eno tipau puwu puakeu tupikiye ye aqha kumtsulo miter kinino tuxake.

Achineki Mighiju

¹³ Timi huno achineki ashou kudau mighiju kelo tiye akushulau miter lhopunguke. Eno achineki zupouno a-a kumsa akeu kathawu puzu kulolau aki shipuakeu jibo kutolo, tighi akushu lau miter lhopunguke.

¹⁴ Achineki gizuu eno tilau a-a kumsa hula hilau akeu kuqhakelo ghi miter lhopunguke.

¹⁵ Pano kulolau kutolo aki shipuakeu khitohi kela mighijuke, tiye hula hila akishe akeu sukuqha ghi mighiju kelo miter lhopunguke. Achinekilo ilochekeu chebo ngo Akimthe-a eno Shishe Akimthe-a

Achinekilo thime akeqo

¹⁶ kumtsu aghuza lono alasheqo kutolo alpa pesu pheyi dapua. Alashe hipaqoye nhakulupu shike.

¹⁷ Achineki puwu puakeu alou kudauye, ti ahukikhaqo nguno kunguu kudauye

¹⁸ amsabo toikeu subo eno kerubimqo jukogheno aqha kuchopulo shisu puku pepua. Amsabo toikeu subo eno ti lhoxu hekiveli ghi shike, lakhino lakhi shelo shike eno tiye achebo qhoi vehomxa pesu shike. Kerubim lakhikhino agi kinini puake:

¹⁹ Tuxauno timi gi toikeu no amsabo kudau shi eno abongushu gi toikeuno tuxau asubo kudau shiake. Puwu puakeu vehomxa pesu hikithipu likhi shipuake

²⁰ eno tiye aghuza lono ahukikhaqo shou kutolo tishi ake.

²¹ Akimthe-a lo atsukuchoqoye aqhemi shi ako bidike. Shishe Akimthe-alo ilochekeu gizulo kiu kela lakhi qhipe pua tiye jukelo asuno shikeu akipti-a lakhi toike.

Asuno shikeu Akipti-a

²² Tiye akiqhelau miter lakhino tuxa eno aqhalau miter lakhi. Tipau tsukucho eno abo kudau eno ajibo kumtsu asuno shipepua. Timi huno ivilo pi,” Alpa hipau ye AMPEU gizulo puthughope achekeuke.”

Ahukikhaqo

²³ Akimthe-alo ilokeu laghi shekhalo ahukikha lakhi ake eno itaghi Shishe Akimthe-alo ilo keu laghi shekhalo lakhi ake.

²⁴ Tiye ahukikha alhakini shikeu, amta lono khaqhiphelu keu.

²⁵ Akimthe-a hukikhaqolo amsabo toikeu ngo kerubim lhoxu shisupua, ti puwu puakeulo shisu puakeu paphike. Ilochekeu chebolo ahukikhala khalau kunguu asuno shikeu pesu nhaqhi puake.

²⁶ Hipau chebo jibolo alasheqo ae eno puwupuakeu huye amsabo toikeu subono koghekughu shipuku puae.