EZEKEL 36 - BAIBEL (BSI)

Israil shou Alhou Kukumgha

¹ AMPEU no pike, “Thinikuau timio, Israil lo naghutoqo putsalo eno panoqo vilo atsape khipau,

² ni Akughushu MPEU no panoqo tsuakeu inilo pi pilo: Israilmiqo ghumino pike,’Itehiye khaghilomi toghiqoye niwu ake!’ ”

³ Tighenguno tungkuptsa pilo eno ni, Akughushu MPEU no kiu piani keno pesu asheshulo. Kughono acheaxulo kuami ashiayehqono Israil lo naghutoqo khathaluve eno tipaqo tuleve keno panoqo kumtsuno Israil thaighavae.

⁴ Tighenguno ni, Akughushu MPEU no naghutoqo, atoghiqo, aghokitiqo eno akhilaqo vilo ixapiniyi qhivekeu-a vilo eno qhivekeu phughi khipaqo acheaxulo ashiayeh akeqono lepuwuve eno jukuchhubeve akeno tipaqo vilo kiu piani keno inilo.

⁵ “Ni, Akughushu MPEU no iloghu kighide lono acheaxulo ashiayehqo shou piani eno akhotoshi Edom shou piani. Alovi ilhe eno phimo gihumo puzu panonguno iyeghi khathaluve eno tipaulo aluza pighi auveke.

⁶ “Tighenguno Israil ghakhu shou tungkuptsa pilo; naghutoqo, atoghi, aghokiti eno akhila vilo ni Akughushu MPEU no anheshu kelauno piakeu pilo tiye ashiayehqono kiu gholauno panoqo shiputha eno shikukujo keu ghengunoke.

⁷ No, Akughushu MPEU no thonhei shieno tushoqhi anike acheaxulo ashiayeh qoye shikukujove nani.

⁸ Ikemu Israil naghutoqolo asuboqoye itaghi anipa mini nani eno nongu iwu timi Israilmi ghenguno axathi pithitsu nani. Nonguye itheno noghakhulo ighini cheni.

⁹ Niye nongu kudau ani eno ino mutsuqheino noyeghiye itaghi hokide eno tilehi apiti yisulupe nani.

¹⁰ Ino nowu timi lhoxu thuwulupe nani. Nonguye aphughilo kughuna nani eno ixapinyi akeu kumtsu shikithe nani.

¹¹ Ino timi ngo pichepighi alau ikowolupe nani. Nonguye puzuu nguno kutomo shive nani eno nonguye atianuli kutomo shi nani. Nonguno puzuu achekeu toi ino nongu pelo tilehi xulupe nani eno ino nongu pelo puzuu nguno kinikulu shilupe nani. Tileno niye AMPEU kepi nonguno ithi nani.

¹² Ino nongu, iwu timi Israilmi aghakhulo kughuna kithe penike saideghi nani. Ayeghiye nowu shive nani eno tipauye nongu tianuli pelo itaghi khilemu akhuava shipemo nani.

¹³ “Ni, Akughushu MPEU no piani, timino aghakhu pesu timi tsukuchuu kepi kutsukeuye kuchouke, eno panonguno pikeuno tipau ghakhuno ashiaye tianuli luvetsu cheni pikeu hu kuchouke.

¹⁴ Ikemu hinguno hilauye tipauye nongu tianuli luvetsu chekeu, timi tsukuchuu shimove nani. Ni, Akughushu MPEU no pivae.

¹⁵ Aghakhuye ashiayehqono tipau thaighakeu hinguno hilauye ini kepu shimo nani momu timiqono tipau phimo akeu ithulu kepu shimo nani. Aghakhuye ashiayeh tianuli luvekeu shimove nani. Ni, Akughushu MPEU no pivae.”

Israil Kuxu Kithe

¹⁶ AMPEU no ivilo pi,

¹⁷ “Thinikuau timio, Israilmi pano ghakhulo kughuna achekelo, panono xuchekeu ghola eno mla ithakeu pesu tipau shipixiveke. Niye panoqo wu ghusho ghili pesu akhuayelo mithemokeu shi kihicheke tiye totimino aqhi aqhilo aji pochekeu toike.

¹⁸ Panonguno aghakhulo ghiqhi heqhikeu eno asu-atu julho pesu tipau shipixiveke ghenguno ino panoqo pelo iloghu kighide pupeke.

¹⁹ Panonguno xuchekeu eno mla ithachekeu jupesu ino panoqo kideqhiveke eno ashiayeh kutami gholo eno pano ghumi ghakhulo hale puwuveke.

²⁰ Panonguno wukeu-a kumtsulo ije kimthe pipusakeu sughicheke, kughengu kutamino ishi picheke, ‘Timi hipaqoye panoqo Lhou no pano tsukeu yeghi qhive kepushiveke.’

²¹ Israilmino khilehi wukeno tipa-a kumtsulo ije kimthe pipusakeu sughiche kehu tipaulo ilokumsupu shiveke.

²² “Tighenguno, ni Akughushu MPEU no Israilmi ghenguno atsape kiu ani keno tipau pesu panoqo tsulo: Ino kiu shini cheni keno tiye nongu Israilmi je ghenguno kumoe ikemu ije kimthepu ghenguno shinike, nonguno wupuakeu ghakhu kumtsulo aje tipau pipusaveke.

²³ Kughono ashiayeh kutamiqo lau ije akimtheshi kije shiakeu shipiyeni keno, nonguno panoqo gholo pipusa pekeu je shipiyeni keno tileno niye AMPEU kepi panonguno ithi nani. Ni, Akughushu MPEU no piveake. Ino nongu peitha puzu ashiayeh kutamiqo lau niye akimthe kepi shipiye nani.

²⁴ Ashiayeh eno aghakhu kutau akeu gholono ino nongu salu nani eno noyeghilo sachile saghi nani.

²⁵ Ino nongu shou azu kutsughu kuzutepuku nani eno nowu asu-atu julhoqo launo eno thwokha jelino nongu kitiqevekeqo launo nongu shikimthetsu nani.

²⁶ Ino amlo kithe eno akukumsu kithe nongu tsu nani.

²⁷ Ino ighungu nongu lolo sutsu nani eno ino ayezah ngo ahza nongu tsupuakeu nonguye pelu eno papelu ani kemo keno ino jutsu nani.

²⁸ Tithiu nonguye ino nopuasu tsupua keu yeghilo xulu nani. Nonguye iwu timi shi nani eno ino nongu Lhou shive nani.

²⁹ Nongu kitiqeve chekeu jeli thwokha launo ino nongu xalu nani. Ino athi jeli pelo kupukuno shilu penike ahza tsu nani tishianguno nonguye puqumiye kithemo nani.

³⁰ Ino nongu xathibo eno nonguno aluchikeulo alothi alau pithipe nani tishianguno ashiayehqo gholo akelo puqumiyekeuno nongu shikukujove pemo nani.

³¹ Nonguno nokumla lhoksa ngo achipikumo mlapuakeu kumsu chilelu nani eno noxineqo eno kuchhube kumla shipuakeulo nolikhi nojupe aphimuqhuve nani.

³² Israilmi nongu pelo hi ithipe nishi anike niye nongu je ghenguno hipaqo shitsuni chenike kumoe. Nonguno kiu shiani keno tipaulo niye nongu pelo akukujo kumza keu ithilu penishi. Ni, Akughushu MPEU no pivae.”

³³ Akughushu MPEU no piani, “Nongu xine launo ino nongu shikimtheve kethiuno, ino nongu pelo ixapinyivekeqo shipuku kithelupe nani.

³⁴ Nongu luzaqolo chesu wukemi kumtsuno tipaqoye kishi aghasa shi ghoghoi itsunhave akeno ithuluke ikemu ino nongu pelo tipaqo chi kithelupe nani.

³⁵ Ayeghi hipau atughuloye aghasa keloye kishi puzu itehiye Eden Ghutu kimihi shiluvea eno aphughi hipaqo puzuuye tuleqhive, xulepuwuve eno ixapinyi qhive keno itehiye kughunauve eno aliwono putukhave akelapi timi kumtsuno pi nani.

³⁶ Tileno acheaxulo ashiayeh akeqo puxupe puaghi keqono ni, AMPEU no aphughiqo ixapinyive keu shipuku kithevetsu, aluza hailovekeu shosukithetsu kepi panoqono ithi nani. Ino hipau shitsu nani kepi ni, AMPEU no tushoqhivae eno ino shitsuni putsake.”

³⁷ Akughushu MPEU no piani, “Itaghi ghuthu lakhi ino Israilmi pelo ivilo akukuphu khu peni cheni eno ino panoqo pelo bheri loji lakhi toi alau ikowolu penani.

³⁸ Aphughi itehi ixapinyi akeqo tithiuye timi chhitoive nani, tiye khaghi Jerusalem lo tiqhetini ghulokilo bheri heqhipe mllakeulo bheri kumzapu achekeu toi nani. Tithiu panonguno niye AMPEU kepi ithi nani.”