EZEKEL 34 - BAIBEL (BSI)

Israil lo Sakiphemi

¹ AMPEU no ivilo pi,

² “Thinikuau timio, Israil lo ayehkipemi shou tungkuptsa pipukulo. Panoqo vilo tungkuptsa pilo eno panoqo vilo ni, Akughushu MPEU no kiu piani keno tipau pilo: Nonguye ahasapuke! Nongu Israil khemiqo! Nonguye nolikhi nohiju kutoke ikemu bheriqo khilemu tuchomoe.

³ Nonguno akichhizu sho cheni, amhino ghokeu phimini pepu cheni, eno bheri akiviu heqhipesu chu cheni. Ikemu nonguye bheriqo khilemu tuchomoe.

⁴ Nonguye miqemilei keqo tucho heju puamoe, suakeqo shipivi tsumoe, izapu akeqo kha kide kudaimoe, itsu susu wuvekeqo sachile saghi puamoe. Tishinike zuqhulo nonguno ayikusa shi panoqo peithake.

⁵ Bheriqoye akheu kuhake ghenguno panonguye hapiye pighivae eno tughashino panoqo heqhi puzu tsuchuvae.

⁶ Ikehu iwu bheriqoye qhemghai keu toghilo eno naghutolo itsusu wuve cheni. Panonguye ayeghiqha kumtsulo hapiye pighivae eno khunomu panoqo jumoe momu panoqo phuwu nike pukaputsamoe.

⁷ “Tighenguno nongu akhemiqo, ni AMPEU no nongu vilo kiu piani keno inilo.

⁸ Kuchouno niye xuakeu Lhou ke nonguye itsa initsu kepue. Iwu bheriqoye tughashino heqhi chuvae kughengu akheu kuha kehue. Iwu bherikhemiye bheri phu nike pukaputsamoe. Panonguye pano likhi pano tuchoheju auve kethono bheriqo jukutomoe.

⁹ Tighenguno nongu bherikhemiqo itsa inilo.

¹⁰ Ni, Akughushu MPEU no pianike niye nongu ghumike. Ino nongu launo iwu bheriqo xapheluve nani eno nongu pelo panoqo chupemoke.

Akiviu Bherikheu

¹¹ “Ni, Akughushu MPEU no nongu vilo pianike ilikhi ino iwu bheriqo junani eno panoqo tuchohiju nani.

¹² Bherikheuno paw bheri hami hapiye pighivekeqo phujuwu puzu saghi kithe keshi ino iw bheriqo phuwu nani. Ti akuzu eno kutsapinyive keu tsalalo a-a khipaqolo panoqo hapiye pighive keno tilauno ino panoqo sachile saghi nani.

¹³ Ino inaghami ghakhu lono panoqo saipeghi, puzu panoqo hekutsu kumqono pano yeghilo sachile saghi nani. Ino panoqo Israil naghutoqo eno aghokitiqo lo sachile saghi nani eno atsuni kivilo panoqo achukumza nani.

¹⁴ Ino panoqo pelo Israil lo naghuto tsani eno akhilalo eno atsuni kuxu yeghi kumtsulo musa ighumono achu muzape nani.

¹⁵ Ni ampino iwu bheriqo kheu shive nani eno panoqo pelo ngope nike ghenguno ino a-a lakhi phutsu nani. Ni, Akughushu MPEU no pivae.

¹⁶ “Khunoqo puha pesu ani keno ino juwuni, itsu itsuwuvekeqo saide saghini, izavekeqo khakide kudaive tsuni eno suaghikeqo shipivi tsuni; ikemu atha pubei eno mutotoi keqoye ino kutsave nani kughengu niye achipiu shichekeu bherikheuke.

¹⁷ “Tishiaye, iwu bheri lojiqo, ni Akughushu MPEU no nongu vilo pianike ino nongu milakhi khi shou kughatha nani eno akivi ngo alomokeu kututa shi nani, bheri ngo ane kututa shi nani.

¹⁸ Nongu hamiye atsuni akiviu chuchekeu aghaqimono anike; nonguno chumonikeu ghi nonguno nedaqodake! Nonguno azu kutsughu yecheni eno nonguno yemokeuye puqove cheni!

¹⁹ Iwu bheri kutauqoye nonguno nedaqodavekeu tsani chu cheni eno nonguno puqovekeu zu ye chenike.

²⁰ “Tighenguno, ni Akughushu MPEU no nongu vilo pianike nongu chochiyikeu bheri ngo miqemilei keu bheri dolo ino kughatha nani.

²¹ Nonguno bheri kusukini shiakeqoye aqo gholono kodapheve eno shoda puwuve chenike.

²² Ikemu ino iwu bheriqo xapheluve nani eno hinguno hilauye panoqo peitha pusa pemo nani. Ino iwu bheri lakhikhi shou kughatha nani eno alomokeu ngo akivi kututa shitsu nani.

²³ Panoqo shou akheu lakhi shipe nike ino iqeu David toikemi akukau lakhi panoqo tsu nani eno panoqo tuchohiju nani.

²⁴ Ni, AMPEU no panoqo Lhou shi nani eno iqeu David toikemi akukau lakhino panoqo shou ayehkipeu shive nani. Ino pivae.

²⁵ Panoqo pelo ithapemo nikeu shi ino panoqo sasu puloshoqhi lakhi shi nani. Aghakhulo akumsapu lhoxu kumtsu ino hapupovetsu nani tishianguno iwu bheriqoye aluzalo sushokulushi xulu nani eno aghasalo zulu nani.

²⁶ “Ino panoqo kumghatsu nani eno panoqo pelo iwu akimthe toghi sumxa xupe nani. Tilauno ino tsutsughu ghuqhitsu puzu panoqo kumghatsuni, kugho kughomu panonguno tipau avehupu shikelo ino tsunike.

²⁷ Asubono axathi pithi nani, alulo axabo ipeghi nani eno timi kumtsu pututa lulo ithamono xulu nani. Kughou ino iwu timiqo tshupuakeu yikichhe suthavetsu puzu panoqo kughapesu aquaxemi shipekemi launo iwu timiqo kuqhophe nikeno tileno niye AMPEU kepi panonguno ithi nani.

²⁸ Hinguno hilauye Alhou kumthami shiayehqoye panoqo lepuwumo nani eno tughashiye panoqo heqhi puzu chumo nani. Panonguye ithamono xulu nani eno khunomu panoqo shikumsamo nani.

²⁹ Ino aghuma luza panoqo tsu nani eno aghakhulo akhuava kishekhavetsu nani. Ashiayeh kutamiye hinguno hilauye panoqo gihu nani.

³⁰ Kumtsu ghano ino Israil putupe acheni, eno panonguye iwu timiqo kepi ithi nani. Ni, Akughushu MPEU no piveake.

³¹ “Nongu iwu bheri lojiqo, ino lojiche keqoye iwu timiqoke eno niye nongu Lhou ke,” ipi Akughushu MPEU no pike.